കോവിഡ്​:​ വ്യാജ പ്രചാരണം നടത്തിയാൽ 10 ലക്ഷം റിയാൽ വരെ പിഴ

റിയാദ്​: കോവിഡ്​ സംബന്ധിച്ച്​ സമൂഹ മാധ്യമങ്ങളിൽ വ്യാജ പ്രചാരണം നടത്തരുതെന്ന്​ കർശന മുന്നറിയിപ്പ്​. അങ്ങനെ ചെയ്യുന്നവർക്കെതിരെ ശക്തമായ ശിക്ഷാനടപടി സ്വീകരിക്കുമെന്ന് ആഭ്യന്തര മന്ത്രാലയം​ താക്കീത് നൽകി​. കോവിഡ്​ സംബന്ധിച്ച്​ ഊഹാപോഹങ്ങളും വ്യാജ വിവരങ്ങളും പ്രചരിപ്പിച്ചാൽ ഒരു ലക്ഷം റിയാൽ മുതൽ 10 ലക്ഷം റിയാൽ വരെ പിഴ ചുമത്തും.

അല്ലെങ്കിൽ ഒരു വർഷം മുതൽ അഞ്ച്​ വർഷം വരെ തടവുശിക്ഷ നൽകും. കുറ്റത്തിന്‍റെ സ്വഭാവത്തിന്​ അനുസരിച്ച്​ സാമ്പത്തിക പിഴയും തടവുശിക്ഷയും കൂടി നൽകും. കുറ്റം ആവർത്തിച്ചാൽ പിഴ ഇരട്ടിയാകുമെന്നും മന്ത്രാലയം അറിയിച്ചു. കോവിഡ്​ സംബന്ധിച്ച്​ തെറ്റായ വിവരങ്ങളോ ഊഹാപോഹങ്ങളോ പ്രചരിപ്പിച്ചാൽ ജനങ്ങൾ ആശങ്കയിലാകുമെന്നും മുൻകരുതൽ നടപടികൾ പാലിക്കുന്നതിൽ വീഴ്ച വരുത്താൻ ഇടയാക്കുമെന്നും മന്ത്രാലയം വ്യക്തമാക്കി.