ക്രൗൺ​പ്രിൻസ്​ ഒട്ടകമേള നാളെ തുടങ്ങും

ജിദ്ദ: ശനിയാഴ്ച ത്വാഇഫിൽ ആരംഭിക്കുന്ന 'ക്രൗൺ പ്രിൻസ്​' ഒട്ടകമേളക്കുള്ള എല്ലാ ഒരുക്കവും പൂർത്തിയായതായി സംഘാടക സമിതി അറിയിച്ചു. ത്വാഇഫ്​ ഒട്ടകമത്സര മൈതാനത്ത്​ നടക്കുന്ന മേള 44 ദിവസം നീണ്ടുനിൽക്കും. 10​ കിലോമീറ്റർ നീളവും സ്റ്റാർട്ട് ലൈനിൽ 40 മീറ്റർ വീതിയും ഫിനിഷിങ്​ ലൈനിൽ 12 മീറ്റർ വീതിയുമുള്ള റണ്ണിങ്​ ട്രാക്കിന് പുറമെ നിരവധി സൗകര്യങ്ങളും സംവിധാനങ്ങളും മൈതാനത്തുണ്ട്​. സുരക്ഷിതമായ വേലി, മണ്ണിലെ ഉയരം, പ്രത്യേക വെളിച്ചം എന്നിവയുടെ കാര്യത്തിൽ ലോകോത്തര നിലവാരത്തിലാണ് മൈതാനം രൂപകൽപന ചെയ്തിരിക്കുന്നത്. കിരീടാവകാശിയുടെ വാൾ ഉൾപ്പെടെ 56 ദശലക്ഷം റിയാലിന്റെ സമ്മാനങ്ങളാണ് മത്സരവിജയികൾക്കുള്ളത്​. ഏറ്റവും കൂടുതൽ പോയന്റ്​ നേടുന്നയാൾക്ക് ഒരു ദശലക്ഷം റിയാൽ സമ്മാനം നൽകും. പ്രാഥമികം, ഫൈനൽ എന്നീ റൗണ്ടുകളിലായി 591 ഒട്ടകയോട്ട മത്സരങ്ങളാണ് നിശ്ചയിച്ചിരിക്കുന്നത്. ആഗോള പങ്കാളിത്തത്തിനിടയിൽ ഗൾഫ്, അറബ് രാജ്യങ്ങളിൽനിന്നുള്ള വൻകിട ഉടമകൾ മത്സരിക്കാനെത്തും.

മത്സരസമയത്ത്​ മൈതാനത്തിന്റെ സുരക്ഷ വർധിപ്പിക്കുന്നതിന് അകത്തെ റോഡുകൾ പുതുക്കിപ്പണിയുകയും വേണ്ട റിപ്പയറിങ്ങുകൾ നടത്തുകയും ട്രാക്കി​ലെ പഴയ മണ്ണ് മാറ്റി പുതിയത് വിരിക്കുകയും ചെയ്​തത്​ ഏറ്റവും പ്രധാനപ്പെട്ട തയാറെടുപ്പുകളാണെന്ന്​ ഒട്ടകമേളയുടെ ഔദ്യോഗിക വക്താവ്​ അഹമ്മദ്​ അൽബദ്​ർ പറഞ്ഞു.

ക്രൗൺ പ്രിൻസ് ഒട്ടകമേളയുമായി ബന്ധപ്പെട്ട് ഡിജിറ്റൽ പ്ലാറ്റ്ഫോം ഒരുക്കിയിട്ടുണ്ട്. എല്ലാ വിവരങ്ങളും അതിൽ ലഭ്യമാണ്. മേളയുമായി ബന്ധപ്പെട്ട എല്ലാം, അതായത് മത്സരത്തിന്റെ ഷെഡ്യൂളുകൾ, ഒട്ടകങ്ങളെയും അവയുടെ ചരിത്രത്തെയും കുറിച്ചുള്ള വിവരങ്ങൾ, മറ്റ് സാംസ്കാരിക വിവരങ്ങൾ എന്നിവ അതിലുണ്ട്​. സാങ്കേതികം, ഫീൽഡ്, മീഡിയ, ഓർഗനൈസേഷൻ കമ്മിറ്റി ഉൾപ്പെടെയുള്ള മുഴുവൻ സമിതികളുടെയും പ്രവർത്തനത്തിനുള്ള ഒരുക്കം പൂർത്തീകരിച്ചിട്ടുണ്ട്​. എല്ലാ പങ്കാളികളും ഉത്സവത്തിന്റെ ചട്ടങ്ങളും വ്യവസ്ഥകളും പാലിക്കണമെന്ന് സംഘാടക സമിതി ആവശ്യപ്പെട്ടു.