ദമാം-തിരുവനന്തപുരം ജെറ്റ്​ എയർവേ​സ്​ മുടങ്ങി; യാത്രക്കാർ ദുരിതത്തിൽ

ദമാം: ശനിയാഴ്​ച രാത്രി ദമാമിൽ നിന്ന്​ തിരുവനന്തപുരത്തേക്ക്​ പുറപ്പെടേണ്ടിയിരുന്ന ജെറ്റ്​ എയർവേസ്​ വിമാനം മുടങ്ങിയതിനെ തുടർന്ന്​ യാത്രക്കാർ ദുരിതത്തിൽ. ഫൈനൽ എക്​സിറ്റിൽ നാട്ടിലേക്ക്​ പോകാനെത്തിയവർ ഉൾപ്പെടെ 13 മണിക്കൂറിലേറെയായി ഭക്ഷണമോ വെള്ളമോ ലഭിക്കാതെ ബുദ്ധിമുട്ടുകയാണ്​. രാത്രി 11.55 നാണ്​ വിമാനം പുറപ്പെടേണ്ടിയിരുന്നത്​. തിരക്കേറിയ സമയമായതിനാൽ പലരും രാത്രി എട്ടുമണിയോടെ തന്നെ വിമാനത്താവളത്തിൽ എത്തിയിരുന്നു. 

11.30 ഒാടെ വിമാനം വൈകുമെന്നും 12.35 ന്​ മാത്രമേ പുറപ്പെടുകയുള്ളുവെന്നും അറിയിപ്പ്​ വന്നു. പക്ഷേ, കനത്ത മൂടൽമഞ്ഞായതിനാൽ വിമാനം എത്തിയിട്ടില്ലെന്നും യാത്ര റദ്ദാക്കുകയാണെന്നും ഒരു മണിയോടെ യാത്രക്കാരെ അറിയിച്ചു. റീ എൻട്രിയിൽ പോകാനെത്തിയവരോട്​ പിന്നീട്​ വിവരം അറിയിക്കാമെന്ന്​ പറഞ്ഞ്​ വിമാനത്താവളത്തിന്​ പുറത്തു പോകാൻ അനുവദിച്ചു. പക്ഷേ, ഫൈനൽ എക്​സിറ്റിൽ ഉള്ളവരോട്​ വിമാനത്താവത്തിൽ തന്നെ ഇരിക്കാൻ നിർദേശിച്ചു. 

ഞായറാഴ്​ച ഉച്ചക്ക്​ ഒന്നര വരെയും പ്രത്യേകിച്ച്​ എന്തെങ്കിലും അറിയിപ്പ്​ അവർക്ക്​ നൽകിയിട്ടില്ല. അവർക്ക്​ വേണ്ട ഭക്ഷണമോ വെള്ളമോ മറ്റ്​ അവശ്യ സംവിധാനങ്ങളോ ഒരുക്കാനും ​െജറ്റ്​ എയർവേസ്​ അധികൃതർ തയാറായിട്ടില്ലെന്ന്​ യാത്രക്കാർ പറയുന്നു. ഏതാണ്ട്​ 30 ലേറെ ഇത്തരം യാത്രക്കാർ വിമാനത്താവളത്തിൽ കുടുങ്ങിക്കിടക്കുകയാണ്​. 

രാവിലെയോടെ വ്യോമഗതാഗതം പുനഃരാരംഭിക്കുകയും നിരവധി വിമാനങ്ങൾ വരികയും പോകുകയും ചെയ്​തിട്ടും ​തിരുവനന്തപുരം വിമാനം എപ്പോൾ പുറപ്പെടുമെന്ന്​ അറിയിക്കാൻ പോലും എയർവേയ്​സ്​ അധികൃതർ തയാറായിട്ടില്ല. കാര്യങ്ങൾ തിരക്കാൻ വിമാനത്താവളത്തിൽ വിമാന കമ്പനി ഉദ്യോഗസ്​ഥരെ ആരെയും കാണാനുമില്ലെന്ന്​ യാത്രക്കാർ പറയുന്നു.