മൃതദേഹം കുടുംബത്തിന്​ വേണ്ട; പത്ത്​ മാസത്തെ മോർച്ചറിവാസത്തിനൊടുവിൽ ഇന്ദിരക്ക്​​ സൗദി മണ്ണിൽ അന്ത്യവിശ്രമം

ദമ്മാം: കുടുംബത്തിന് ​വേണ്ടാത്തതിനാൽ തമിഴ്​നാട്ടുകാരി ഇന്ദിര ദണ്ഡപാണിയുടെ മൃതദേഹം സൗദി അറേബ്യയിലെ മോർച്ചറിയിൽ അനാഥപ്രേതമായി​ കഴിഞ്ഞത്​  പത്ത്​ മാസം. നീണ്ട പതിനെട്ട്​ വർഷം പ്രവാസിയായി ജീവിച്ച്​ കുടുംബത്തിന്​ അത്താണിയായിരുന്ന ഒരു ഇന്ത്യക്കാരിക്കാണ്​ സമാനതകളില്ലാത്ത നിർഭാഗ്യം. ജീവിത നൈരാശ്യം മൂലം ദമ്മാമിലെ അൽ അഹ്​സയിൽ ആത്​മഹത്യ ചെയ്​ത ഇന്ദിരയുടെ മൃതദേഹം നാട്ടിലേക്ക്​ വേണ്ടെന്നും അതിന്​ ചെലവാകുന്ന തുക ത​​​െൻറ പേരിലയക്കാനുമായിരുന്നു ക്രൂരനായ ഭർത്താവ്​ ആവശ്യപ്പെട്ടത്​.

രേഖകൾ ശരിയാക്കി അയക്കാൻ ഭർത്താവിന്​ സ്​പോൺസർ പണമയച്ചുകൊടുത്തു. എന്നിട്ടും കാര്യമുണ്ടായില്ല. ഒടുവിൽ നവയുഗം ജീവകാരുണ്യപ്രവർത്തകർ  മുൻകൈയെടുത്ത്​ നിയമ നടപടികൾ പൂർത്തിയാക്കി മൃതദേഹം സൗദിയിൽ സംസ്​കരിച്ചു. രണ്ട്​ പെൺമക്കളും ഒരു ആൺകുട്ടിയുമുണ്ട്​  തമിഴ്​നാട്​ മോട്ടൂർ സ്വദേശിനിയായ ഇന്ദിരക്ക്​. മദ്യപാനിയും കുടുംബത്തെ നോക്കാത്തവനുമായ ഭർത്താവ് കാരണമുണ്ടായ  പ്രശ്നങ്ങളാണ് ആത്മഹത്യക്ക് കാരണമെന്ന് കുറിപ്പെഴുതി വെച്ചാണ്​ പത്ത്​ മാസം മുമ്പ്​ അൽ അഹ്​സയിലെ ജോലി ചെയ്​ത വീട്ടിൽ ഇവർ തൂങ്ങി മരിച്ചത്​.

തുടർന്ന് സ്പോൺസർ ഇന്ദിരയുടെ ഭർത്താവിനെ ഫോണിൽ ബന്ധപ്പെട്ട് മൃതദേഹം നാട്ടിലേക്ക്​ അയക്കാൻ ആവശ്യമായ രേഖകളും സമ്മത പത്രവും അയച്ചു തരാൻ ആവശ്യപ്പെട്ടു. ആദ്യം ഒഴിവുകഴിവുകൾ പറഞ്ഞൊഴിഞ്ഞ അയാൾ രേഖകൾ അയക്കണമെങ്കിൽ പണം വേണമെന്ന് ആവശ്യപ്പെടാൻ തുടങ്ങി. ഒടുവിൽ സ്​പോൺസർ പണം അയച്ചുകൊടുത്തു. എന്നിട്ടും രേഖകൾ എത്തിച്ചില്ല.

നാല്​ മാസം മുമ്പ്​ നവയുഗം ജീവകാരുണ്യ പ്രവർത്തകർ വിഷയത്തിൽ ഇടപെട്ട്​ ഇന്ദിരയുടെ ഭർത്താവുമായി ബന്ധപ്പെട്ടു. ഭാര്യയു​െട മൃതദേഹം ഇങ്ങോട്ട്​ അയക്കേണ്ടെന്നും അതിന്​ ചെലവാകുന്ന തുക തനിക്ക്​ അയക്കാനുമായിരുന്നു ഭർത്താവി​​​െൻറ മറുപടി. തുടർന്ന്​ നവയുഗം പ്രവർത്തകർ തമിഴ്​നാട്ടിലെ സുഹൃത്തുക്കൾ വഴി ഇന്ദിരയുടെ മക്കളെ തേടിപ്പിടിച്ച്​ അവരുടെ അനുമതിപത്രം സംഘടിപ്പിച്ചു. മൂന്ന്​ മക്കളും മുന്നിടങ്ങളിലാണ്​ കഴിയുന്നത്​. അനുമതിപത്രം എംബസി വഴി എത്തിച്ച്​  നിയമ നടപടികൾ പൂർത്തിയാക്കി  മൃതദേഹം അൽ അഹ്​സയിൽ സംസ്​കരിച്ചു. നവയുഗം സാംസ്​കാരികവേദി ജീവകാരുണ്യവിഭാഗം പ്രവർത്തകരായ  ഹൂസൈൻ കുന്നിക്കോട്​,  അബ്​ദുൽ ലത്തീഫ്​ മൈനാഗപ്പള്ളി, സാമൂഹികപ്രവർത്തകൻ മണി മാർത്താണ്ഡൻ എന്നിവരുടെ നിരന്തര പരിശ്രമമാണ്​ ഇന്ദിരയുടെ അനിശ്​ചിതമായ  മോർച്ചറിവാസത്തിന്​ അറുതിയുണ്ടാക്കിയത്​.