സ്​ത്രീ വിദ്യാഭ്യാസ നിഷേധം: അഫ്​ഗാനിസ്താനിലേക്ക്​ പണ്ഡിത സംഘത്തെ അയക്കും -ഒ.ഐ.സി

ജിദ്ദ: അഫ്​ഗാനിസ്താനിൽ സ്​ത്രീകൾക്ക്​ വിദ്യാഭ്യാസം നിഷേധിക്കുന്ന വിഷയത്തിൽ​ അധികാരികളുമായി ചർച്ച തുടരാൻ പണ്ഡിതന്മാരുടെ രണ്ടാമതൊരു സംഘത്തെ അയക്കുമെന്ന്​ ഇസ്​ലാമിക രാജ്യങ്ങളുടെ കൂട്ടായ്​മയായ​ ഒ.​െഎ.സിയുടെ സെക്രട്ടറി ജനറൽ ഹുസൈൻ ഇബ്രാഹിം ത്വാഹ പറഞ്ഞു. അഫ്ഗാനിസ്താനിലെ സംഭവ വികാസങ്ങളും മാനുഷിക സാഹചര്യവും ചർച്ച ചെയ്യുന്നതിനായി ജിദ്ദയിലെ ഒ.​െഎ.സി ആസ്ഥാനത്ത് ചേർന്ന എക്‌സിക്യൂട്ടീവ് കമ്മിറ്റി അടിയന്തരയോഗത്തിൽ സംസാരിക്കവേയാണ്​ അദ്ദേഹം​ ഇക്കാര്യം വ്യക്തമാക്കിയത്​. പെൺകുട്ടികളുടെ​ സ്കൂളുകളും സർവകലാശാലകളും അടച്ചുപൂട്ടാനും ദേശീയ അന്തർദേശീയ സർക്കാരിതര സംഘടനകളിലെ വനിതകളുടെ ജോലി അവസാനിപ്പിക്കാനും അഫ്ഗാൻ ഭരണകൂടം എടുത്ത നടപടികളുടെ പശ്ചാത്തലത്തിലാണ്​ ഒ.​െഎ.സി അടിയന്തര യോഗം ചേർന്നത്​.

സ്ത്രീകൾക്ക്​ വിദ്യാഭ്യാസം, തൊഴിൽ, സാമൂഹികനീതി എന്നിവക്കുള്ള അടിസ്ഥാന അവകാശങ്ങൾ നിഷേധിക്കുന്നതിനെതിരെ അഫ്​ഗാൻ സർക്കാരിലെ പ്രമുഖരുമായി സംഭാഷണം തുടരാൻ അന്താരാഷ്​ട്ര ഇസ്​ലാമിക് ഫിഖ്ഹ് അക്കാദമിയുമായി സഹകരിച്ചാണ്​​ പണ്ഡിതസംഘത്തെ അയക്കുന്നത്​. ആ രാജ്യത്തെ ദൗർഭാഗ്യകരമായ സംഭവവികാസങ്ങളെ ഒ.​െഎ.സി വലിയ ആശങ്കയോടെയാണ് കാണുന്നത്​. പ്രത്യേക ദൂതൻ മുഖേന ഞങ്ങൾ അഫ്​ഗാൻ അധികാരികൾക്ക് ഈ വിഷയത്തിലുള്ള സന്ദേശങ്ങൾ കൈമാറിയിട്ടുണ്ടെന്നും സെക്രട്ടറി ജനറൽ പറഞ്ഞു​. ഇസ്​ലാം മതത്തിലെ ഉറച്ചതും വ്യക്തവുമായ അടിത്തറയുടെ വെളിച്ചത്തിൽ പെൺകുട്ടികൾക്കായി സ്‌കൂളുകൾ തുറക്കുമെന്ന സർക്കാറി​െൻറ മുൻവാഗ്ദാനങ്ങൾ നിറവേറ്റുന്നതി​െൻറ പ്രാധാന്യം സന്ദേശത്തിൽ പ്രത്യേകമായി ചൂണ്ടിക്കാട്ടിയിട്ടുണ്ട്​. ഈ പ്രശ്നം പരിഹരിക്കുന്നതോടെ അഫ്​ഗാൻ ഗവൺമെൻറും ഒ.​െഎ.സി അംഗരാജ്യങ്ങളും തമ്മിൽ കൂടുതൽ ക്രിയാത്മകമായ സഹകരണത്തിനും ലോകത്തോട് തുറന്നുപറയാനുമുള്ള വാതിൽ തുറക്കുമെന്നും സെക്രട്ടറി ജനറൽ സൂചിപ്പിച്ചു.

എൻ.‌ജി.‌ഒകളിലെ വനിതാ ജീവനക്കാരുടെ ജോലി താൽക്കാലികമായി നിർത്തിവയ്ക്കാനുള്ള തീരുമാനം സർക്കാരിതര സംഘടനകൾ നടത്തുന്ന വിപുലമായ മാനുഷിക, ദുരിതാശ്വാസ പ്രവർത്തനങ്ങളെ ബാധിക്കും. അത്​ ജനതയുടെ താൽപ്പര്യങ്ങൾക്ക് ഹാനികരമാകും. സ്ത്രീകളെ സാമൂഹികമായി ഉൾപ്പെടുത്തുന്നതിനും അഫ്ഗാനിസ്താനിലെ ഇൻറർനാഷനൽ ഹ്യൂമൺ സെക്യൂരിറ്റി നെറ്റ്‌വർക്കി​െൻറ ദൗത്യങ്ങളുടെ തടസ്സമില്ലാത്ത തുടർച്ചക്കും വേണ്ടി നിലവിലെ തീരുമാനം പുനഃപരിശോധിക്കണമെന്ന്​ അഫ്​ഗാൻ ഗവൺമെൻറിനോട്​ സെക്രട്ടറി ജനറൽ ആവശ്യപ്പെട്ടു. ഇത്​ സംബന്ധിച്ച്​ ഒ.​െഎ.സി അംഗരാജ്യങ്ങൾ, ഇൻറർനാഷനൽ ഇസ്​ലാമിക് ഫിഖ്ഹ് അക്കാദമി, വിമൻസ് ഡെവലപ്‌മെൻറ്​ ഓർഗനൈസേഷൻ, മനുഷ്യാവകാശങ്ങൾക്കായുള്ള സ്ഥിരം കമീഷൻ, അൽ അസ്ഹർ, സൗദി അറേബ്യയിലെ മുതിർന്ന പണ്ഡിതന്മാരുടെ കൗൺസിൽ, മുസ്​ലിം വേൾഡ്​ ലീഗ്​ എന്നിവ പുറത്തിറക്കിയ പ്രസ്താവനകളെ സെക്രട്ടറി ജനറൽ അഭിനന്ദിച്ചു. അത്​ സ്ത്രീകളുടെ വിദ്യാഭ്യാസത്തി​െൻറയും ജോലിയുടെയും ആവശ്യകതയെയും പൊതുജീവിതത്തിലെ അവരുടെ പങ്കാളിത്തത്തെയും കുറിച്ചുള്ള ഇസ്​ലാമിക നിയമത്തി​െൻറ നിലപാടിന്​ ഊന്നൽ നൽകുന്നതാണെന്നും അഫ്ഗാനിസ്ഥാനിലെ ഗവൺമെൻറുമായി ക്രിയാത്മകമായ സംഭാഷണം തുടരുന്നതിന്​ ഒ.​െഎ.സി പ്രതിജ്ഞാബദ്ധമാണെന്നും സെക്രട്ടറി ജനറൽ പറഞ്ഞു​.