ഒമാനിൽ നിന്ന് 'റുബ്ബുൽ ഖാലി'യെ കീറിമുറിച്ച്​ ദിൽഷാദ്​ ബൈക്കിൽ സൗദിയിലെത്തി

ദമ്മാം: സദാസമയവും വീശിയടിക്കുന്ന മണൽക്കാറ്റും, മണൽചുഴികളും അവഗണിച്ച്​ ലോകത്തിലെ തന്നെ ഏറ്റവും അപകടം പിടിച്ച, നൂറ് കണക്കിന് കിലോമീറ്റർ നീണ്ടുകിടക്കുന്ന സൗദിയിലെ മ​രുഭൂ ഇടം 'റുബ്ബുൽ ഖാലി' (ഒഴിഞ്ഞ മരുഭൂമി) പിന്നിട്ട്​ മലയാളിയായ സഞ്ചാരി ദിൽഷാദ്​ കഴിഞ്ഞ ദിവസം സൗദിയിലുമെത്തി. മലപ്പുറം ​ചേലാമ്പ്ര പീടിയേക്കൽ വീട്ടിൽ ദിൽഷാദിന്​ തന്‍റെ എൻഫീൾഡ്​ സ്റ്റാ​ന്‍റേർഡ്​ 350 യിൽ സൗദിയിലെ മണ്ണിലെത്തിയപ്പോൾ ഉണ്ടായ ആനന്ദം വിവരണാതീതമാണ്​.

വർഷങ്ങൾക്ക്​ മുമ്പ്​ ഹൗസ്​ ​​​ഡ്രൈവറായി ജോലിചെയ്ത സൗദിയിലേക്കാണ്​ ദിൽഷാദിപ്പോൾ സഞ്ചാരിയായി എത്തിയിരിക്കുന്നത്​. ജനുവരി 29 ന്​ രാമനാട്ടുകരയിൽ നിന്ന്​ പി. അബ്​ദുൾ ഹമീദ്​ എം.എൽ.എ ഫ്ലാഗ്​ഓഫ്​ ചെയ്താണ്​ ദിൽഷാദിന്‍റെ യാത്ര ആരംഭിക്കുന്നത്​. യൂറോപ്പ്​ ചുറ്റാനുള്ള ആഗ്രഹവുമായാണ്​ ദിൽഷാദ്​ തന്‍റെ പുതിയ യാത്രക്ക്​ തുടക്കം കുറിച്ചത്​. രാമനാട്ടുകരയിൽ നിന്ന്​ മുംബെയിലെത്തിയ ദിൽഷാദ്​ കപ്പൽ മാർഗ്ഗമാണ്​ ദുബായിൽ എത്തിയത്​. അവിടെ നിന്ന്​ ബൈക്കിൽ ഒമാനിലെത്തിയ ദിൽഷാദ്​ മാസങ്ങൾക്ക്​ മുമ്പ്​ തുറന്ന സൗദി ഒമാൻ പാത വഴിയാണ്​ കഴിഞ്ഞ ദിവസം ദമ്മാമിലേക്ക്​ വന്നത്​. സാഹസിക സഞ്ചാരികൾക്ക്​ പോലും എന്നും പേടി സ്വപ്നമായിരുന്ന 'റുബ്ബുൽ ഖാലി' കീറിമുറിച്ചുള്ള 700 കിലോമീറ്റർ അധികം നീളമുള്ള പാത വർഷങ്ങൾ നീണ്ട ശ്രമഫലത്തിന്​ ശേഷമാണ്​ യാഥാർത്ഥ്യമായത്​.

ഇപ്പോഴും മണൽക്കാറ്റുകൾ ചീറിയടിക്കുന്ന ഇതുവഴിയുള്ള യാത്ര ഏറെ ദുർഘടം പിടിച്ചതു തന്നെ. ഇത്​ കീറിമുറി​ച്ചെത്തുന്ന ചരിത്രത്തിലെ തന്നെ ആദ്യ ബൈക്ക്​ യാത്രികനായിരിക്കും ദിൽഷാദ്​. ഒമാനിൽ നിന്ന്​ യാത്ര തിരിക്കുമ്പോൾ അധികൃതർ മുന്നറിയിപ്പ്​ നൽകിയിരുന്നു. 'ഇടയിലെങ്ങും തങ്ങാൻ അവസരമില്ല. വിശ്രമമില്ലാതെ 700 കിലോമീറ്റർ വണ്ടി ഓടി​ച്ചുപോയാലേ ജനവാസകേന്ദ്രം ലഭ്യമാവുകയുള്ളു'.വെല്ലുവിളി ഏറ്റെടുത്ത്​ 'റുബ്ബുൽഖാലി'യിലുടെ താൻ നടത്തിയ യാത്ര അവസ്മരണീയ അനുഭവമായിരുന്നുവെന്ന്​ ദിൽഷാദ്​ 'ഗൾഫ്​ മാധ്യമ'ത്തോട്​ പറഞ്ഞു. പലപ്പോഴും റോഡിൽ മണൽ മൂടിക്കിടന്നു. അതീവ ശ്രദ്ധയി​​ല്ലെങ്കിൽ മണൽകൂനകളിൽ കയറിയോ ശക്​തമായ കാറ്റിൽ പെട്ടോ അപകടത്തിൽ പെടാം. തനിക്ക്​ തൊട്ടുമുന്നേ യാത്ര ചെയ്ത ടയോട്ട കാംറി കാർ മണൽകൂനയിൽ കയറി മറിയുന്നതിനും ദിൽഷാദ്​ സാക്ഷിയായി.

ഒറ്റ ദിവസം 900 കിലോമീറ്റർ വണ്ടിയോടിച്ചാണ്​ ദിൽഷാദ്​ സൗദി തീരത്തെത്തിയത്​. നേരത്തെ ചെറിയ ചെറിയ യാത്രകൾ ചെയ്തിരുന്ന ദിൽഷാദ്​ 2019 ൽ തന്‍റെ എൻഫീൾഡ്​ സ്വന്തമാക്കിയതിന്​ ശേഷമാണ്​ ദീർഘയാത്രകൾ ആരംഭിച്ചത്​. ആദ്യ യാത്ര കാശ്മീരിലേക്കായിരുന്നു. പിന്നീട്​ ഇന്ത്യ മുഴുവൻ ഗ്രാമഗ്രാമന്താരങ്ങളിലുടെ സഞ്ചരിച്ചു. ഇന്ത്യയിലെ ഏഴ്‌ സഹോദരിമാർ എന്നറിയപ്പെടുന്ന വടക്ക്​ കിഴക്കൻ സംസ്ഥാനങ്ങളിലെ ഗ്രാമഭംഗി വിവരണാതീതമാണന്ന്​ ദിൽഷാദ്​ പറഞ്ഞു. ''ഇന്ത്യയെ അറിയുകയായിരുന്നു ഞാൻ. സ്​നേഹം തന്ന മനുഷ്യരെ ഞാൻ കണ്ടു. അവർ എത്ര ഇഷ്ടത്തോടെയാണ്​ കേരളത്തിൽ നിന്നെത്തിയ എന്നെ ചേർത്ത്​ വെച്ചത്​.

വൈവിധ്യങ്ങൾ കൂടിച്ചേർന്ന ഇന്ത്യ ഈ ലോകത്തി​ന്‍റെ ചെറിയ പതിപ്പാണ്''.​ ദിൽഷാദ്​ ആവേശത്തോടെ പറഞ്ഞു.'കാശ്മീർ' ദേശം പോലെ ത​ന്നെ സുന്ദരമാണ്​ അവിടുത്തെ ജനങ്ങളും. ഇപ്പോഴുള്ള യാത്രയിലും ലോകത്തെ വിവിധ ആളുകളുടെ സഹായങ്ങൾ ഉള്ളിൽ നിറഞ്ഞു നിൽക്കുന്നു. പാകിസ്ഥാനികൾ പോലും ഇന്ത്യൻ പതാകയുമായുള്ള എന്‍റെ യാത്രയെ ഒരുപാട്​ ഇഷ്ടത്തോടെയാണ്​ ചേർത്തുവെച്ചത്​. ഭക്ഷണം വാങ്ങിത്തന്നും കൈവീശിക്കാണിച്ചും അവർ ഇഷ്ടം പ്രകടിപ്പിച്ചു. എവിടെ ചെന്നാലും ഒരു മലയാളിയെ എങ്കിലും കാണാൻ കഴിയുന്നു എന്നതാണ്​ ഏറെ സന്തോഷമെന്ന് ദിൽഷാദ്​ പറഞ്ഞു. ലോകത്തിന്‍റെ അതിരുകളില്ലാത്ത ഇടങ്ങളിലേക്ക്​ തന്‍റെ ബൈക്കോടിച്ച്​ ദിൽഷാദ്​ യാത്ര തുടരുകയാണ്​.