ആഭ്യന്തര തീർഥാടകരിൽ 12 മുതൽ 18 വയസ്സു വരെയുള്ളവർക്കും ഉംറക്ക്​ അനുമതി

ജിദ്ദ: ആഭ്യന്തര തീർഥാടകരിൽ 12 മുതൽ 18 വയസ്സു വരെയുള്ള കുട്ടികൾക്കും ഉംറക്കും ​മസ്​ജിദുന്നബവി സന്ദർശനത്തിനും അനുമതി നൽകിയതായി​ ഹജ്ജ്​ ഉംറ മന്ത്രാലയം വ്യക്തമാക്കി. ഇവർ വാക്​സിൻ രണ്ട്​ ഡോസ്​ എടുത്തിരിക്കണമെന്ന്​ നിബന്ധനയായി നിശ്ചയിച്ചിട്ടുണ്ട്​. ഈ പ്രായക്കാർക്ക്​ ഉംറ നിർവഹിക്കാനും മസ്​ജിദുന്നബവി സന്ദർശിക്കാനും 13,000ത്തിലധികം അനുമതി ഇതിനകം നൽകിയെന്നും ഹജ്ജ്​ ഉംറ മന്ത്രാലയം പറഞ്ഞു.

ഉംറക്കും മദീന സന്ദർശനത്തിനും​ അനുമതി നൽകുന്നത്​ ഇഅ്​തമർനാ, തവക്കൽനാ ആപ്ലിക്കേഷനിലൂടെയായിരിക്കുമെന്ന്​ ഹജ്ജ്​ ഉംറ സഹമന്ത്രി ഡോ. അബ്​ദുൽഫതാഹ്​ ബിൻ സുലൈമാൻ മശാത്​ ആവർത്തിച്ചു വ്യക്തമാക്കി.

ഈ വർഷ​​​ത്തെ ഉംറ സീസൺ ആരംഭിക്കുന്നതിനു മുമ്പ് ബന്ധപ്പെട്ട മറ്റ് വകുപ്പുകളുമായി ഏകോപിപ്പിച്ച് തീർത്ഥാടകർക്ക് അവരുടെ യാത്രയിലുടനീളം സുരക്ഷിതവും എളുപ്പവുമായ അന്തരീക്ഷം സൃഷ്ടിക്കാൻ വേണ്ട നടപടികൾ ഹജ്ജ്​ ഉംറ മന്ത്രാലയം മന്ത്രാലയം സ്വീകരിച്ചിട്ടുണ്ട്​. തീർഥാടകരുടയും അവർക്ക്​ സേവനം ചെയ്യുന്നവരുടെയും സുരക്ഷക്ക്​ നിശ്ചയിച്ച ആരോഗ്യ നടപടികൾ എല്ലാവരും പാലിക്കണമെന്നും ഹജ്ജ്​ ഉംറ ഡെപ്യൂട്ടി മന്ത്രി പറഞ്ഞു.