റിയാദിലും കിഴക്കൻ പ്രവിശ്യയിലും പൊടിക്കാറ്റ് 

റിയാദ്​​ / ദമ്മാം: റിയാദിലും  കിഴക്കൻ പ്രവിശ്യയുടെ ചില ഭാഗങ്ങളിലും ശക്​തമായ പൊടിക്കാറ്റ്​. റിയാദ്​ നഗരത്തിൽ ചൊവ്വാഴ്​ച വൈകുന്നേരത്തോടെ തുടങ്ങിയ ചുടുകാറ്റ്​ ബുധനാഴ്​ച പകലോടെ ശക്​തമായി. കടുത്ത ചൂടുള്ള ശക്​തമായ കാറ്റാണ്​ വീശിയത്​. പൊടിപടലങ്ങളാൽ അന്തരീക്ഷം നിറഞ്ഞു. ഗതാഗതം പ്രയാസപൂർണമായിരുന്നു. ദുസ്സഹമായിരുന്നു പകൽ. ചൂട്​ 44 ഡിഡ്രി വരെയായിരുന്നു.  പുറംജോലി അസാധ്യമാവും വിധമായിരുന്നു ഉഷ്​ണക്കാറ്റ്​. 
 കിഴക്കൻ പ്രവിശ്യയിൽ ഖഫ്‌ജി, ഹഫറുൽ ബാതിൻ എന്നിവിടങ്ങളിലും വടക്കൻ മേഖലകളിലുമാണ് പൊടിക്കാറ്റ് വീശിയത്. ഹഫറുൽ ബാതിനിൽ കഴിഞ്ഞ ബുധനാഴ്ചയോടെ തുടങ്ങിയ പൊടിക്കാറ്റ് രണ്ട്​ ദിവസത്തോളം നീണ്ടു. ഒരു ദിവസത്തെ ശമനത്തിന് ശേഷം വീണ്ടും കാറ്റ്​ വീശിയടിച്ചതായി പ്രദേശവാസികൾ പറഞ്ഞു. അതിവേഗ പാതകളിലും നഗര ​പ്രാന്തങ്ങളിലും ശക്തമായ പൊടിക്കാറ്റ് ജനജീവിതത്തെ ദുസ്സഹമാക്കി. ദൂരക്കാഴ്​ച തടസ്സപ്പെട്ട്​ വാഹനാപകടങ്ങൾ റിപ്പോർട്ട്​ ചെയ്​തിട്ടുണ്ട്​. ദീർഘ ദൂര യാത്രക്കാരെയാണ് പൊടിക്കാറ്റ്​ ഏറെ വലച്ചത്. ചിലയിടങ്ങളിൽ ജോലി ഭാഗികമായി നിർത്തിവെച്ചു. കാഴ്ചയുടെ ദൂരപരിധി വളരെ കുറവായതിനാൽ വാഹനങ്ങൾ വേഗത നിയന്ത്രിച്ചാണ് സഞ്ചരിച്ചത്. ട്രാഫിക്, സിവില്‍ ഡിഫന്‍സ്, റെഡ്ക്രസൻറ്​, ആരോഗ്യം തുടങ്ങിയ വകുപ്പുകള്‍ രക്ഷാ പ്രവർത്തനങ്ങൾക്ക് നേതൃത്വം നൽകി. കിഴക്കൻ സൗദിയിൽ വരും ദിവസങ്ങളിലും പൊടിക്കാറ്റിന്​ സാധ്യതയുണ്ടെന്ന്​ കാലാവസ്​ഥ നിരീക്ഷണ കേന്ദ്രം വ്യക്​തമാക്കി.