ആരോഗ്യ മേഖലയിൽ കോവിഡ്​ മൂലം മരിച്ച ജീവനക്കാരുടെ കുടുംബങ്ങൾക്ക്​ ധനസഹായം വിതരണം തുടങ്ങി

ജിദ്ദ: സൗദിയിൽ സർക്കാർ, സ്വകാര്യ ആരോഗ്യ മേഖലയിലെ ജീവനക്കാരിൽ നിന്ന്​ കോവിഡ് ​മൂലം മരിച്ചവരുടെ കുടുംബങ്ങൾക്കുള്ള ധനസഹായ വിതരണം തുടങ്ങി. മരിച്ചവരുടെ അടുത്ത കുടുംബങ്ങൾക്ക് അഞ്ച്​ ലക്ഷം റിയാലാണ് സഹായമായി വിതരണം ചെയ്യുന്നത്​. കഴിഞ്ഞ ഡിസംബറിലാണ്​ സൽമാൻ രാജാവിന്റെ അധ്യക്ഷതയിൽ ചേർന്ന സൗദി മന്ത്രിസഭ യോഗം​ ഇതു സംബന്ധിച്ച തീരുമാനം പുറപ്പെടുവിച്ചത്​. ആ തീരുമാനമാണ് ഇപ്പോൾ നടപ്പിലാക്കാൻ തുടങ്ങിയിരിക്കുന്നത്​.​

കോവിഡ്​ സാഹചര്യത്തിൽ സൗദിയിലെ പൗരന്മാരുടെയും താമസക്കാരുടെയും ആരോഗ്യ സുരക്ഷ സംരക്ഷിക്കുന്നതിനിടയിൽ കോവിഡ്​ മൂലം മരിച്ച സർക്കാർ, സ്വകാര്യ ആരോഗ്യ മേഖലയിലെ സ്വദേശികളും വിദേശികളുമായ ജീവനക്കാരുടെ അടുത്ത കുടുംബങ്ങളാണ്​ ധനസഹായത്തിലുൾപ്പെടുത്തുക​. സർക്കാർ, സ്വകാര്യ ആശുപത്രികളിൽ പ്രവർത്തിച്ചിരുന്ന നിരവധി മലയാളി ഡോക്ടർമാരും നഴ്സുമാരുമെല്ലാം തങ്ങളുടെ ജോലിക്കിടയിൽ കോവിഡ് ബാധിച്ച് മരിച്ചിരുന്നു. ഇവരുടെയെല്ലാം കുടുംബങ്ങൾക്കും സൗദി സർക്കാരിന്റെ കാരുണ്യ സഹായം ലഭിക്കും.

കോവിഡ്​ മൂലം മരിച്ച സർക്കാർ, സ്വകാര്യ ആരോഗ്യ മേഖലയിലെ ജീവനക്കാരുടെ കുടുംബങ്ങൾക്ക്​ ധനസഹായം വിതരണം ചെയ്യാനുള്ള തുടക്കം മന്ത്രിസഭയുടെ തീരുമാനം നടപ്പാക്കുന്നതിന്റെ ഭാഗമാണെന്ന്​ സൗദി ആരോഗ്യ മന്ത്രി ഡോ. തൗഫീഖ്​ അൽറബീഅ പറഞ്ഞു. ആരോഗ്യമേഖലയിലെ ജീവനക്കാർ ഉൾപ്പെടെയുള്ള രാജ്യത്തെ പൗരന്മാരോടും താമസക്കാരോടും സർക്കാർ കാണിക്കുന്ന ശ്രദ്ധയും പരിഗണനയും പ്രതിഫലിപ്പിക്കുന്നതാണിത്​.

കോവിഡിനെ പ്രതിരോധിക്കാൻ രാജ്യത്തെ എല്ലാ ആരോഗ്യ മേഖലകളിലെയും ജീവനക്കാർ നടത്തിയ മഹത്തായ ശ്രമങ്ങ​ൾ അഭിനന്ദനാർഹമാണ്​. കോവിഡ്​ സമയത്ത് രോഗികളെ സേവിക്കുന്നതിനും പരിപാലിക്കുന്നതിനും സമർപ്പണത്തോടും ആത്മാർത്ഥതയോടുമാണ്​ ആരോഗ്യ മേഖലയിലെ ജീവനക്കാർ പ്രവർത്തിച്ചത്​. പൗരന്മാരുടെയും താമസക്കാരുടെയും ആരോഗ്യം സംരക്ഷിക്കാൻ ജീവൻ അർപ്പിച്ചവർ അവരുടെ മുൻപന്തിയിലുണ്ട്​. ദൈവം അവർക്ക്​ കരുണയും പാപമോചനം നൽക​​ട്ടെയെന്നും ആരോഗ്യ മന്ത്രി പറഞ്ഞു.

പൗരന്മാരുടെയും താമസക്കാരുടെയും ആരോഗ്യ സുരക്ഷക്ക്​ സൽമാൻ രാജാവും കിരീടാവകാശിയും മുന്തിയ പരിഗണനയും മുൻഗണനയും പരിമിതികളില്ലാത്ത പിന്തുണയുമാണ്​ നൽകിയത്​. രാജ്യത്ത്​ നൽകുന്ന ആരോഗ്യ സേവനങ്ങളുടെ ഗുണനിലവാരം ഉയർത്താൻ നിരന്തരമായ ശ്രദ്ധചെലുത്തുകയുണ്ടായി. പകർച്ചവ്യാധി തടയുന്നതിനും സാഹചര്യം നിയന്ത്രിക്കുന്നതിനും എല്ലാ ശാസ്ത്രീയവും പ്രായോഗികവുമായ മാർഗ്ഗങ്ങളിലൂടെയും അതിന്റെ വ്യാപനം തടയുന്നതിനും സൗദിയിലെ ആരോഗ്യ മേഖലകൾ വലിയ ശ്രമങ്ങൾ നടത്തിയിട്ടുണ്ട്​. ആരോഗ്യമേഖലയുടെ പ്രവർത്തനങ്ങൾ വിപുലമാക്കുന്നതിനും സർക്കാർ വലിയ ബജറ്റ്​ വകയിരുത്തിയിരുന്നതായും ആരോഗ്യ മന്ത്രി പറഞ്ഞു.