ബത്​ഹയിൽ വില്ലകൾ കത്തിനശിച്ചു; രണ്ട്​ മലയാളികൾക്ക്​ പരിക്ക്​

റിയാദ്​: ബത്​ഹയിൽ വീണ്ടും തീപിടിത്തം. വിവിധ കമ്പനികളുടെ ജീവനക്കാർ താമസിച്ചിരുന്ന രണ്ട്​ വില്ലകൾക്കാണ്​​ തീപിടിച്ചത്​. രക്ഷപ്പെടുന്നതിനിടെ വീണ്​ രണ്ട്​ മലയാളികൾക്ക്​ പരിക്കേറ്റു. പരിക്ക്​ സാരമുള്ളതല്ല. വില്ലകളിൽ തന്നെയുള്ള ഗോഡൗണുകളും കത്തി വൻ സ്വത്ത്​ നാശമുണ്ടായിട്ടുണ്ട്​. വെള്ളിയാഴ്​ച പുലർച്ചെ രണ്ടോടെയാണ്​ സംഭവം. ബത്​ഹ- ദബാബ്​ റോഡും ശാറ വഷമും സംഗമിക്കുന്ന ഭാഗത്തെ പാലത്തിന്​ സമീപമുള്ള വില്ലകളാണ്​ പൂർണമായും കത്തിയമർന്നത്​. ഉടൻ തന്നെ അഗ്​നിശമനയുടെ നിരവധി യൂനിറ്റുകളും സിവിൽ ഡിഫൻസി​​​െൻറ മറ്റ്​ വിഭാഗങ്ങളും എത്തി തീയണക്കാനും മറ്റ്​ കെട്ടിടങ്ങളിലേക്ക്​ പടരാതിരിക്കാനും ശ്രമം നടത്തി. ഇൗ വില്ലകളുടെ ഇരുവശങ്ങളിലും ബഹുനില ഫ്ലാറ്റ്​ സമുച്ചയങ്ങളും വില്ലകളും എതിർവശത്ത്​ സൗദി ഇലക്​ട്രിസിറ്റി കമ്പനിയുടെ പ്രധാന പവർ സ്​റ്റേഷനുമാണുള്ളത്​. സിവിൽ ഡിഫൻസി​​​െൻറ സമയോചിതമായ ഇടപെടലിലൂടെ തീപടരാതെ തടയാനും വൻ ദുരന്തം ഒഴിവാക്കാനും സാധിച്ചു. തീപിടിത്തത്തി​​​െൻറ കാരണം അറിവായിട്ടില്ല.

ശാറ ഗുറാബിയിൽ പ്രവർത്തിക്കുന്ന ബെരീഖ്​ ഷിമ്മാൽ കാർ ആക്​സസറീസ്​ കമ്പനിയിലെ ജീവനക്കാർ താമസിക്കുന്ന വില്ലയിൽ നിന്ന്​ രക്ഷപ്പെടുന്നതിനിടയിലാണ്​ തിരുവനന്തപുരം സ്വദേശി അമീനും കാട്ടാക്കട സ്വദേശി ദീപുവിനും പരിക്കേറ്റത്​. ഉറക്കത്തിൽ നിന്ന്​ ഞെട്ടിയെഴുന്നേറ്റ ഇവർ പുറത്തേക്ക്​ ഒാടുകയായിരുന്നു​. അതിനിടയിലാണ്​ അമീന്​ കാലിലും ദീപുവിന്​ മുഖത്തും ചെറിയ​ മുറിവുണ്ടായത്​​. ആശുപത്രിയിൽ പ്രവേശിപ്പിച്ച്​ പ്രാഥമിക ശുശ്രൂഷ നൽകി. ഇതേ കമ്പനിയുടെ 23 ജീവനക്കാരാണ്​ ഒരു വില്ലയിൽ ഉണ്ടായിരുന്നത്​. തീപിടിത്തമുണ്ടായതിനെ തുടർന്ന്​ എല്ലാവരും ഉണർന്ന്​ പുറത്തേക്കോടുകയായിരുന്നു. ഇവരുടെയെല്ലാം ഇഖാമ, ഡ്രൈവിങ്​ ലൈസൻസ്​ എന്നിവയുൾപ്പെടെ വിലപ്പെട്ട രേഖകൾ, മൊബൈൽ ഫോണുകൾ, പണമടങ്ങിയ പഴ്​സുകൾ, വസ്​ത്രങ്ങൾ, മറ്റ്​ സാധനങ്ങൾ എല്ലാം ചാരമായി. ഉറക്ക വസ്​ത്രമല്ലാതെ മറ്റൊന്നും അവശേഷിച്ചിട്ടില്ല. മൂന്നുനില കെട്ടിടത്തി​​​െൻറ മുകൾ നിലയിലേക്ക്​ തീപടർന്നില്ല. എന്നാൽ താഴത്തെ നിലകളും ചേർന്നുള്ള ഗോഡൗണും പൂർണമായും നശിച്ചു. ഗോഡൗണിൽ കമ്പനി ഷോറൂമിലേക്കുള്ള സാധനങ്ങളുടെ വൻശേഖരം  സൂക്ഷിച്ചിരുന്നു. ഗോഡൗൺ പൂർണമായും കത്തിയമർന്നെന്നും 10 ലക്ഷത്തോളം റിയാലി​​​െൻറ സാധനങ്ങൾ ചാരമായെന്നും കമ്പനിയുടെ നടത്തിപ്പുകാരായ ബി.ആർ.സി ഗ്രൂപ്​ പ്രതിനിധി കാട്ടാക്കട സ്വദേശി ഷാജഹാൻ പറഞ്ഞു. ഒരു യൂനി​ഫോം വസ്​ത്ര കമ്പനിയുടെ ജീവനക്കാരാണ്​ അടുത്ത വില്ലയിലുണ്ടായിരുന്നത്​. 25 പേരുണ്ടായിരുന്നു. തീപിടിത്തമുണ്ടായ ഉടനെ ഇവരെല്ലാം പുറത്തേക്കോടി രക്ഷപ്പെട്ടു.
 

കത്തിയമർന്ന വില്ലയുടെ ദൃശ്യം

 

ആർക്കും പരിക്കില്ല. ഇതേ കെട്ടിടത്തോട്​ ചേർന്നുള്ള മീഡിയവൺ ചാനൽ മാർക്കറ്റിങ്​ മാനേജർ റിജോ വി. ഇസ്​മാഇൗലി​​​െൻറ താമസസ്​ഥലവും കത്തിനശിച്ചു. സംഭവ സമയം ഇവിടെ റിജോയും സുഹൃത്ത്​ കോഴിക്കോട്​ സ്വദേശി റിയാസുമാണുണ്ടായിരുന്നത്​. പിറ്റേന്ന്​ അവധിയായതിനാൽ രാത്രി വൈകിയാണ്​ കിടന്നതെന്നും കണ്ണിൽ ഉറക്കം പിടിച്ചതും എന്തൊക്കെയോ പൊട്ടിത്തകരുന്ന ശബ്​ദം കേട്ട്​ ഞെട്ടിയെഴുന്നേൽക്കുകയായിരുന്നെന്നും റിജോ പറഞ്ഞു. പെ​െട്ടന്ന്​ പുറത്തേക്ക്​ ഇറങ്ങിയ റിയാസാണ്​ വില്ലകൾ തീഗോളങ്ങളായി മാറിയത്​ കണ്ടത്​. എന്താണ്​ സംഭവിക്കുന്നതെന്ന്​ മനസിലായതോടെ റിജോ പാസ്​പോർട്ടും ഇഖാമയും ഫോണും ലാപ്​ടോപ്പും എടുത്ത്​ പുറത്തേക്കോടി. റിജോയുടെ മുഴുവൻ വസ്​ത്രങ്ങളും മറ്റ്​ സാധനങ്ങളും ടിവി, ഫ്രിഡ്​ജ്​ തുടങ്ങിയ ഗൃഹോപകരണങ്ങളും എല്ലാം കത്തിയമർന്നു. മൂന്നാഴ്​ചക്കിടയിൽ ബത്​ഹയിലുണ്ടാകുന്ന രണ്ടാമത്തെ വലിയ തീപിടിത്ത ദുരന്തമാണിത്​. റമദാൻ അവസാന ആഴ്​ചയിലാണ്​ ബത്​ഹ കോമേഴ്​സ്യൽ സ​​െൻറർ മുഴുവൻ കത്തിയത്​. നൂറിലേറെ വാണിജ്യ സ്​ഥാപനങ്ങൾ അന്ന്​ ചാരമായി​.