ജിദ്ദയിലെ ഫ്ലാറ്റിൽ തീപിടിത്തം; രണ്ട്​ കുട്ടികൾ മരിച്ചു

ജിദ്ദ: ജിദ്ദയിലെ താമസകേ​ന്ദ്രത്തിലുണ്ടായ അഗ്​നിബാധയിൽ രണ്ട്​ കുട്ടികൾ മരിച്ചു. രണ്ട്​ പേർക്ക്​ പരിക്കേറ്റു. ജിദ്ദക്ക്​ കിഴക്ക്​ ഹയ്യ്​ റവാബിയിൽ ഫ്ലാറ്റിലാണ്​ സംഭവം. നാലും അഞ്ചും വയസ്സ്​ പ്രായമായ കുട്ടികളാണ്​ മരിച്ചതെന്ന്​ മക്ക മേഖല സിവിൽ ഡിഫൻസ്​ വക്​താവ്​ കേണൽ സഇൗദ്​ സർഹാൻ പറഞ്ഞു.  മൂന്ന്​ നില കെട്ടിടത്തിലെ മൂന്നാം നിലയിലെ ഫ്​ളാറ്റിനുള്ളിലാണ്​ അഗ്​നിബാധയുണ്ടായത്​. ജനലിനുള്ളിലൂടെ ശക്​തമായ പുകപടലമുണ്ടായിരുന്നു. രക്ഷാപ്രവർത്തനത്തിനിടയിലാണ്​ റൂമിനുള്ളിൽ  നാല്​ പെൺകുട്ടികളുള്ളത്​ കണ്ടത്​.  അത്യാസന്ന നിലയിലായിരുന്നു ഇവർ. ഉടനെ കെട്ടിടത്തിന്​ ​പുറത്തെത്തിച്ചശേഷം   ആശുപത്രിയിലെത്തിച്ചു.  ഇവരിൽ രണ്ട്​ കുട്ടികൾ മരിച്ചു. മൂന്നും ആറും വയസ്സുള്ള രണ്ട്​ കുട്ടികൾ ചികിത്സയിലുണ്ട്​.  ഇതിലൊരു കുട്ടിയുടെ നില ഗുരുതരമാണ്​​. വീട്ടിനുള്ളിൽ പെൺകുട്ടികൾ മാത്രമായിരുന്നു. കുട്ടികളുടെ കളിക്കിടെയാവാം അഗ്​നിബാധ  സിവിൽ ഡിഫൻസ്​ വക്​താവ്​ പറഞ്ഞു.