ഭക്ഷണം പാഴാക്കുന്നത്​ ശിക്ഷാർഹമാക്കാൻ ആലോചന

ജിദ്ദ: സൗദി അറേബ്യയിൽ ഭക്ഷണം പാഴാക്കുന്നത്​ ശിക്ഷാർഹമാക്കാൻ ആലോചന. ഇതുസംബന്ധിച്ച കരട്​ നിയമം ​ശൂറ കൗൺസിൽ ഉടൻ ചർച്ചക്കെടുക്കും. 13 അനുഛേദങ്ങളുള്ള നിയമമാണ്​ പരിഗണനയിലുള്ളത്​. മൂന്നാം അനുഛേദത്തിൽ ഭക്ഷണ ഉപഭോഗം ഗുണപരമായി നിയന്ത്രിക്കുന്നതിന്​ രാജ്യത്തെങ്ങും പ്രത്യേക സ​​െൻററുകൾ സ്​ഥാപിക്കാൻ വ്യവസ്​ഥ ചെയ്യുന്നു. ഹോട്ടലുകളിൽ നിന്നും മറ്റ്​ ഭക്ഷണവേദികളിൽ നിന്നും ഭക്ഷണം ബാക്കിവെച്ച്​ പോകുന്ന കുടുംബങ്ങൾക്കും വ്യക്​തികൾക്കും​ ബിൽ തുകയുടെ 20 ശതമാനം വരെ പിഴ ഇൗടാക്കാനാണ്​ ശിപാർശ. 

പാർട്ടികൾ, ചടങ്ങുകൾ, ആഘോഷങ്ങൾ എന്നിവയിൽ ഭക്ഷണം പാഴാക്കിയാൽ സ്​ഥാപനങ്ങൾക്കോ ഉടമകൾക്കോ 15 ശതമാനം പിഴ ലഭിക്കും. ബാക്കിയാകുന്ന ഭക്ഷണം കൊണ്ടുപോകുന്ന കുടുംബങ്ങൾക്കും വ്യക്​തികൾക്കും സ്​ഥാപനങ്ങൾക്കും പിഴയിൽ ഇളവ്​ നൽകും. പരിസ്​ഥിതി, ജല, കാർഷിക മന്ത്രാലയത്തി​​​െൻറ റിപ്പോർട്ട്​ പ്രകാരം ആഗോള തലത്തിൽ ഭക്ഷണം പാഴാക്കുന്നതിൽ മുന്നിലാണ്​ സൗദി അറേബ്യ. രാജ്യത്ത്​ പാചകം ചെയ്യപ്പെടുന്ന ഭക്ഷണത്തി​​​െൻറ 30 ശതമാനവും പാഴാക്കപ്പെടുകയാണ്​. ഇതുവഴി പ്രതിവർഷം 49 ശതകോടി റിയാലി​​​െൻറ നഷ്​ടമാണ്​ സംഭവിക്കുന്നത്​. വർഷത്തിൽ 250 കിലോ ഭക്ഷണമാണ്​ രാജ്യത്ത്​ ഒരാൾ ശരാശരി പാഴാക്കുന്നത്​. 115 കിലോയാണ്​ ആഗോള ശരാശരി. ഡിന്നർ പാർട്ടികൾ, വിവാഹം, റെസ്​റ്റോറൻറുകൾ, ഹോട്ടൽ ബുഫെകൾ എന്നിവയിലാണ്​ ഭക്ഷണം ഏറെയും പാഴാക്കപ്പെടുന്നത്​.