മേഖലയിലെ സംഘർഷ സാഹചര്യത്തിനിടെ സൗദി, ഇറാൻ വിദേശകാര്യ മന്ത്രിമാരുടെ കൂടിക്കാഴ്​ച

റിയാദ്​: മധ്യേഷ്യയിൽ സംഘർഷം മൂർച്​ഛിച്ചിരിക്കേ സൗദി വിദേശകാര്യ മന്ത്രി അമീർ ഫൈസൽ ബിൻ ഫർഹാനും ഇറാൻ വിദേശകാര്യ മന്ത്രി അബ്ബാസ് അറാഖ്​ജിയും ചർച്ച നടത്തി. റിയാദിലെ മന്ത്രാലയ ആസ്ഥാനത്താണ്​ ഇരുവരും കൂടിക്കാഴ്​ച നടത്തിയത്​. റിയാദിലെത്തിയ ഇറാൻ മന്ത്രിക്ക്​ ഊഷ്​മള സ്വീകരണം നൽകി​. മേഖലയിലെ പുതിയ സംഭവവികസനങ്ങളെക്കുറിച്ചും പ്രശ്​നപരിഹാരത്തിനായി ഇരു രാജ്യങ്ങളും നടത്തിയ ശ്രമങ്ങളെക്കുറിച്ചും ചർച്ച ചെയ്​ത മന്ത്രിമാർ ഉഭയകക്ഷി ബന്ധങ്ങളെയും വിവിധ മേഖലകളിൽ അവ മെച്ചപ്പെടുത്തുന്നതിനുള്ള മാർഗങ്ങളെയും കുറിച്ച്​ അവലോകനം ചെയ്തു.

ഗസ്സയിലേയും ലബനാനിലേയും ഇസ്രായേൽ കുറ്റകൃത്യങ്ങൾ തടയുന്നതിനുള്ള ചേരിയെ ശക്തിപ്പെടുത്താൻ മേഖലയിലെ വിവിധ രാജ്യങ്ങളിൽ നടത്തുന്ന പര്യടനത്തി​ന്​ തുടക്കം കുറിച്ചാണ്​ ഇറാൻ വിദേശകാര്യ മന്ത്രി റിയാദിലെത്തിയത്​. പ്രാദേശിക വിഷയങ്ങൾ ചർച്ച ചെയ്യുന്നതിൽ ശ്രദ്ധയൂന്നിയാണ്​ മന്ത്രിയുടെ സന്ദർശനമെന്ന്​ ഇറാനിയൻ സ്​റ്റേറ്റ് ന്യൂസ് ഏജൻസി ‘ഇർ​ന’ സ്ഥിരീകരിക്കുകയും ചെയ്​തു.

റിയാദിലെ കൂടിക്കാഴ്​ചയിൽ സൗദി വിദേശകാര്യ മന്ത്രാലയം രാഷ്​ട്രീയകാര്യ അണ്ടർ സെക്രട്ടറി ഡോ. സഊദ് അൽസാത്വി, രാഷ്​ട്രീയകാര്യ ഉപദേഷ്​ടാവ് അമീർ മിസ്​അബ്​ ബിൻ മുഹമ്മദ് അൽഫർഹാൻ, ഇറാനിലെ സൗദി അംബാസഡർ അബ്​ദുല്ല അൽഅൻസി, വിദേശകാര്യ മന്ത്രിയുടെ ഉപദേഷ്​ടാവ്​ മുഹമ്മദ് അൽയഹ്‌യ എന്നിവർ പങ്കെടുത്തു.