മക്ക, മദീന നഗരങ്ങളിൽ റിയൽ എസ്​റ്റേറ്റ്​ മേഖലയിൽ മുതൽ മുടക്കാൻ വിദേശികൾക്കും​ അനുമതി

ജിദ്ദ: മക്ക, മദീന നഗരങ്ങളിലെ റിയൽ എസ്​റ്റേറ്റ്​ മേഖലയിൽ പണം മുടക്കാൻ വിദേശികൾക്കും​ അനുമതി. ഇരു നഗരങ്ങളുടെയും അതിർത്തിക്കുള്ളിൽ ഭൂമി, കെട്ടിടനിർമാണ ഇടപാടുകളിൽ ഭാഗികമായോ പൂർണമായോ നിക്ഷേപം നടത്താൻ വിദേശികളെ അനുവദിക്കാൻ ഫിനാൻഷ്യൽ മാർക്കറ്റിങ്​ സ്ഥാപനങ്ങൾക്ക് കാപിറ്റൽ മാർക്കറ്റ്​ അതോറിറ്റിയാണ്​ അനുവാദം നൽകിയത്​.

റിയൽ എസ്​റ്റേറ്റ് ഇടപാടുകൾ കൈകാര്യം ചെയ്യുമ്പോൾ സൗദികളല്ലാത്തവരുടെ ഉടമസ്ഥതയിലും നിക്ഷേപത്തിലുമുള്ള സ്ഥാപനങ്ങൾ നിശ്ചയിച്ച വ്യവസ്ഥകൾ പൂർണമായും പാലിച്ചിരിക്കണമെന്ന്​ ഫിനാൻഷ്യൽ സ്ഥാപനങ്ങളോട് അതോറിറ്റി ആവശ്യപ്പെട്ടു​. വൈവിധ്യമാർന്ന ഫിനാൻസിങ്​ ചാനൽ എന്ന നിലയിൽ സാമ്പത്തിക വിപണിയെ ശക്തിപ്പെടുത്തുന്നതിന്​ തീരുമാനം സഹായിക്കുമെന്ന് അതോറിറ്റി സൂചിപ്പിച്ചു.

സൗദി സാമ്പത്തിക വിപണിയിലേക്ക്​ പ്രാദേശിക, വിദേശ നിക്ഷേപങ്ങളെ ആകർഷിക്കുക, സമ്പദ്‌ വ്യവസ്ഥയെ വികസിപ്പിക്കുന്നതിലും അതി​െൻറ വരുമാന സ്രോതസ്സുകൾ വൈവിധ്യവത്കരിക്കുന്നതിലും നിർണായക പങ്ക് വഹിക്കുക എന്നിവയും ഇതിലൂടെ ലക്ഷ്യമിടുന്നതായി അതോറിറ്റി പറഞ്ഞു. തീരുമാനം എല്ലാത്തരം റിയൽ എസ്​റ്റേറ്റ് ഫണ്ടുകളിലും നല്ല ഫലങ്ങൾ ഉണ്ടാക്കുമെന്ന്​ കാപിറ്റൽ മാർക്കറ്റ് ഫണ്ട് മേഖല മേധാവി അലാ അൽ-ഇബ്രാഹിം പറഞ്ഞു.

പല നിക്ഷേപകരും മക്കയിലും മദീനയിലും റിയൽ എസ്​റ്റേറ്റിൽ നിക്ഷേപിക്കാൻ ആഗ്രഹമുള്ളവരാണ്​. പുതിയ തീരുമാനത്തിലൂടെ രാജ്യത്തുള്ളവർക്കും വിദേശത്തുള്ളവർക്കും നിക്ഷേപിക്കാനുള്ള വലിയ തടസ്സം നീക്കിയിരിക്കുകയാണെന്നും അദ്ദേഹം പറഞ്ഞു.