ദമ്മാമിൽ പാചകവാതകം ചോർന്ന്​ തീപ്പിടിത്തം; കൊല്ലം സ്വദേശി മരിച്ചു

ദമ്മാം: താമസസ്ഥലത്ത് പാചകവാതകം ചോർന്നുണ്ടായ തീപ്പിടിത്തത്തിൽ മലയാളി മരിച്ചു. കൊല്ലം കരുനാഗപ്പള്ളി സ്വദേശി തൊടിയൂർ വെളുത്തമണൽ വില്ലേജ് ജങ്ഷനിൽ ചെറുതോപ്പിൽ പടീറ്റതിൽ വീട്ടിൽ അസീസ് സുബൈർകുട്ടി (48) ആണ് ദമ്മാമിൽ മരിച്ചത്. ഒരാഴ്​ച മുമ്പ്​​ തീപ്പിടിത്തമുണ്ടായി പരിക്കേറ്റ്​ ചികിത്സയിലിരിക്കെയാണ്​ മരിച്ചത്​. ദമ്മാമിൽ ഹൗസ് ഡ്രൈവറായി ജോലി ചെയ്തിരുന്ന അസീസ് ജോലികഴിഞ്ഞ്​ തിരിച്ചെത്തി റൂമിൽ ഉറങ്ങാൻ കിടന്നതായിരുന്നു. രാവിലെ ഉണർന്ന്​ ലൈറ്റി​െൻറ സ്വിച്ചിട്ടപ്പോൾ തീയാളിപ്പിടിച്ചു. പാചകവാതകം ചോർന്ന് മുറിയിൽ നിറഞ്ഞിരുന്നത് അറിഞ്ഞിരുന്നില്ല. വലിയ ശബ്​ദത്തിൽ പൊട്ടിത്തെറിയുണ്ടായി. മുറിയിലാകെ തീയും പുകയും നിറഞ്ഞു. ഗുരുതര പരിക്കേറ്റ് അബോധാവസ്ഥയിലായ സുബൈറിനെ ദമ്മാം സെൻട്രൽ ആശുപത്രിയിലെത്തിച്ചു. ഒരാഴ്ചയായി തീവ്രപരിചരണ വിഭാഗത്തിൽ ചികിത്സലായിരുന്നു. അതിനിടയിലാണ്​ മരണം സംഭവിച്ചത്​.

നാട്ടിൽ ഓട്ടോറിക്ഷാ ഡ്രൈവറായിരുന്ന അസീസ് ജീവിത പ്രാരാബ്​ദങ്ങൾ മൂലം രണ്ടര വർഷം മുമ്പാണ് ദമ്മാമിൽ ഹൗസ് ഡ്രൈവർ ജോലിക്കായി എത്തിയത്ത്. രണ്ട്​ പെൺകുട്ടികളുടെ പിതാവായ അസീസ് മൂത്ത മകളുടെ വിവാഹം നടത്തിയിരുന്നു. പഠനം പൂർത്തിയാക്കിയ ഇളയ മകളുടെ വിവാഹം നടത്തലും വീട്​ പണിയലുമുൾപ്പ​െട നിരവധി ആവശ്യങ്ങളും സ്വപ്നങ്ങളുമായാണ്​ ഡ്രൈവർ ജോലിക്ക്​ സൗദിയിലെത്തിയത്​. നാല് മാസം മുമ്പാണ് ആദ്യ അവധിക്ക് നാട്ടിൽ പോയി മടങ്ങിയെത്തിയത്. മരുമകൻ അൻസാർ ദമ്മാമിലുണ്ട്​. ഭാര്യ: ഷീജ, മക്കൾ: ജാസ്മിൻ, തസ്നി. നിയമനടപടികൾ പൂർത്തീകരിച്ച് മൃതദേഹം സൗദിയിൽ ഖബറടക്കുമെന്ന് ജീവകാരുണ്യ പ്രവർത്തകൻ ഷാജി വയനാട് അറിയിച്ചു.