അവദേശിന്​ നാട്ടിൽ വീട്​ പണിതുകൊടുക്കുമെന്ന്​ ഹാദി ബിൻ ഹമൂദ്​

ദമ്മാം: സൗദി ജയിലിൽനിന്ന്​ മോചിതനായ ഉത്തർപ്രദേശ്​ ബീജാപൂർ സ്വദേശി അവാദേശ്​ ശേഖറി​ന്​ നാട്ടിൽ വീട്​ പണിതുകൊടുക്കുമെന്ന്​ മോചനത്തിന്​ വേണ്ടി രംഗത്തിറങ്ങിയ സൗദി സാമൂഹികപ്രവർത്തകൻ ഹാദി ബിൻ ഹമൂദ്​. അവാദേശിെൻറ മോചനത്തിനായി പണം സ്വരൂപിക്കാൻ ഇറങ്ങിയപ്പോഴുണ്ടായ അനുഭവങ്ങളെ കുറിച്ച്​ ‘ഗൾഫ്​ മാധ്യമ’ത്തോട്​ സംസാരിക്കുന്നതിനിടെയാണ്​ അദ്ദേഹം ഇക്കാര്യം​ പറഞ്ഞത്​.

ജയിൽ മോചിതനായെത്തിയ അവാദേശ് ശേഖറിനെ എല്ലാ സൗകര്യങ്ങളും നൽകി നാട്ടിലയക്കാനുള്ള ഒരുക്കത്തിലാണ് ഹാദി ഹമൂദും സംഘവും. ജയിലിൽ കിടന്ന കാലമത്രയും കണക്കുകൂട്ടി ശമ്പളത്തിന് തുല്യമായ തുകയും അവദേശിന്​ നൽകും. അതിന്​ പുറമെ അയാൾക്കും കുടുംബത്തിനും ജീവിക്കാൻ നല്ല ഒരു വീടും നാട്ടിൽ പണിതുകൊടുക്കും. ത​െൻറ ജീവിതത്തിൽ സംഭവിക്കുന്ന അത്ഭുതങ്ങൾ കണ്ട് വിസ്മയിച്ചുനിൽക്കുകയാണ് അവദേശ്​. നന്ദി പറയാൻ വാക്കുകളില്ലാതെ ആ മനുഷ്യൻ വിതുമ്പിക്കരയുന്നു.

ഇയാള​ുടെ മോചനത്തിനായി പണം സ്വരൂപിക്കാൻ ഇറങ്ങിയപ്പോൾ മറക്കാനാവാത്ത നിരവധി അനുഭവങ്ങളാണുണ്ടായതെന്ന്​ ഹാദി ബിൻ ഹമൂദ്​ പറഞ്ഞു. പകുതിയോളം പണം സ്വരൂപിച്ച ഘട്ടത്തിൽ ഒരു സ്വദേശി പൗരൻ ഹാദി ഹമൂദിനെ ബാങ്കിലേക്ക് വിളിച്ചുവരുത്തി. അവിടെ ചെന്നപ്പോൾ ബാക്കി വേണ്ട നാല്​ ലക്ഷത്തോളം റിയാൽ സമ്മാനിച്ച്​ അദ്ദേഹം ഞെട്ടിച്ചെന്ന്​ ഹാദി പറയുന്നു. ത​െൻറ പേർ എവിടെയും വെളിപ്പെടുത്തരുതെന്ന്​ പ്രത്യേകം പറഞ്ഞാണ്​ പണം നൽകിയത്​. തൊട്ടു പിന്നാലെ വ്യവസായ പ്രമുഖയായ സ്വദേശി വനിത വിളിച്ച്​ പണം പൂർണമായും താൻ തന്നുകൊള്ളാമെന്ന് അറിയിച്ചു. എന്നാൽ അപ്പോഴേക്കും ആവശ്യമായത്രയും പണം തികഞ്ഞുകഴിഞ്ഞിരുന്നു. അതിനാൽ ദൗത്യം പൂർണമായെന്നും ഇനി പണം ആവശ്യമില്ലെന്നും അറിയിച്ചു. ഇനി ഇതുപോലുള്ള ആവശ്യം വരു​േമ്പാൾ ബന്ധപ്പെടണമെന്ന്​ പറഞ്ഞാണ്​ അവർ ഫോൺ വെച്ചതെന്നും ഹാദി ഹമൂദ് പറഞ്ഞു.