പ്രാർഥനാ മുഖരിതമായി മിന, അറഫ സംഗമം നാളെ

മക്ക: ഹജ്ജിന്റെ സുപ്രധാന കർമങ്ങൾ തുടങ്ങാൻ മണിക്കൂറുകൾ ശേഷിക്കേ തീർഥാടകരെല്ലാം മിനായിലേക്ക്​. ഭക്തിനിർഭരമായ അന്തരീക്ഷത്തിൽ ‘ദൈവത്തി​ന്റെ വിളിക്കുത്തരം നൽകുന്നു’ എന്ന്​ അർഥമുള്ള ‘ലബൈക്’ മന്ത്രങ്ങളുമായാണ് രണ്ട്​ ദശലക്ഷത്തോളം തീർഥാടകർ തൂവെള്ള വസ്ത്രധാരികളായി മിനായുടെ താഴ്വാരത്തിലെത്തുന്നത്. വ്യാഴാഴ്ച വൈകീട്ടുമുതൽ തന്നെ തീർഥാടകർ തമ്പുകളുടെ ഈ താഴ്​വര ലക്ഷ്യമാക്കി നീങ്ങിത്തുടങ്ങി. മഹാമാരിക്കുശേഷം ഏറ്റവും കൂടുതൽ തീർഥാടകർ പ​ങ്കെടുക്കുന്ന ഹജ്ജ്​ എന്ന പ്രത്യേകതയുണ്ട്​ ഇത്തവണ. 160ൽപരം രാജ്യങ്ങളിലെ മുസ്​ലിംകളെ പ്രതിനിധാനംചെയ്താണ്​ തീർഥാടകലക്ഷങ്ങൾ ഹജ്ജിൽ പങ്കെടുക്കുന്നത്. വെള്ളിയാഴ്ച ഉച്ചയോടെ ഭൂരിഭാഗം തീർഥാടകരും മിനായിലെത്തും. മിനായിൽ പ്ര​ത്യേകിച്ച്​ കർമങ്ങളൊന്നുമില്ല. ഹജ്ജിലെ പരമപ്രധാനമായ അറഫ സംഗമത്തിന്‌ മനസ്സും ശരീരവും പാകപ്പെടുത്തി ഒരുങ്ങുക മാത്രമാണ് മിനായിൽ ഹാജിമാർ നിർവഹിക്കുന്നത്. അഞ്ചു നേരത്തെ നമസ്‍കാരങ്ങൾ തമ്പുകളിൽ സമയത്ത്​ നിർവഹിക്കും. അറഫ സംഗമം ശനിയാഴ്​ചയാണ്​. തിരക്കൊഴിവാക്കാൻ തീർഥാടകർ വെള്ളിയാഴ്​ച രാത്രി മുതൽ അറഫയിലേക്ക് നീങ്ങിത്തുടങ്ങും. ശനിയാഴ്ച ഉച്ചക്ക്​ മുമ്പായി മുഴുവൻ തീർഥാടകരും അറഫയിൽ എത്തും. രോഗികളായി ആശുപത്രികളിലുള്ളവരെ ആംബുലൻസുകളിലും എയർ ആംബുലൻസുകളിലുമായി അറഫയിൽ എത്തിക്കും. മദീനയിൽ നിന്നുള്ള രോഗികളെ നേരത്തേ മക്കയിലെ ആശുപത്രികളിൽ എത്തിച്ചിരുന്നു. ഹജ്ജിലെ ഏറ്റവും സുപ്രധാനമായ ചടങ്ങ് അറഫയാണ്. അറഫ ലഭിക്കാത്തവർക്ക് ഹജ്ജില്ലെന്നാണ് പ്രവാചക വചനം. പ്രവാചക​ന്റെ പ്രസംഗത്തെ ഓർമിപ്പിക്കുന്ന അറഫാ പ്രഭാഷണം ഉച്ച (ദുഹ്ർ) സമയത്താണ് നടക്കുന്നത്. സൗദിയിലെ മുതിർന്ന പണ്ഡിതനും ഹറം ഇമാമുമായ ഡോ. മാഹിർ ബിൻ ഹമദ്​ അൽമുഹൈഖ്​ലിയാണ്​ അറഫ സംഗമത്തിന്​ നേതൃത്വം നൽകുക. അറഫ പ്രഭാഷണം അദ്ദേഹം നിർവഹിക്കും. ഇത്തവണ 50 ലോകഭാഷകളിൽ അറഫ പ്രസംഗം മൊഴിമാറ്റപ്പെടും.

ഹജ്ജ്​ കർമങ്ങൾ ശേഷിക്കുന്ന നാലു ദിവസങ്ങളിലും തീർഥാടകരുടെ താമസം മിനായിലാണ്. ഹജ്ജ്​ സമയത്ത്​ ഏറ്റവും കൂടുതൽ സമയം ചെലവഴിക്കുന്ന ഇടമാണ് ലോകത്തെ ഏറ്റവും വലിയ തമ്പുകളുടെ നഗരിയായി അറിയപ്പെടുന്ന മിനാ താഴ്വാരം. കർമങ്ങളെല്ലാം അവസാനിക്കുന്ന ദുൽഹജ്ജ് 13 വരെയും ഈ താഴ്വാരം വിശ്വാസികളാൽ നിറഞ്ഞിരിക്കും.