ഹജ്ജ്​ രാഷ്​ട്രീയ മു​ദ്രാവാക്യങ്ങൾക്കുള്ള വേദിയല്ല - അറഫ പ്രഭാഷണം

അറഫ: ഹജ്ജ് മതപരമായ അനുഷ്​ടാനമാണെന്നും രാഷ്​ട്രീയ മുദ്രാവാക്യങ്ങൾക്കുള്ള വേദിയല്ലെന്നും അറഫ പ്രഭാഷണത്തിൽ മക്ക ഹറം ഇമാം ശൈഖ്​ ഡോ. മാഹിർ അൽമുഅയ്​ഖലി. ശനിയാഴ്​ച ഉച്ചക്ക്​ 20 ലക്ഷത്തിലധികം തീർഥാടകരെ സാക്ഷി നിർത്തി മസ്​ജിദുന്നമിറയിൽ നടത്തിയ അറഫ പ്രഭാഷണത്തിൽ​ ഫലസ്തീൻ ജനതയുടെ മോചനത്തിനായി നെഞ്ചുരുകി പ്രാർഥിക്കാൻ ആഹ്വാനം ചെയ്യുകയും ചെയ്​തു. ആചാരാനുഷ്ഠാനങ്ങളുടെയും ദൈവത്തെ ആരാധിക്കുന്നതിലെ ആത്മാർഥതയുടെയും പ്രകടനമാണ് ഹജ്ജ്. രാഷ്​ട്രീയ മുദ്രാവാക്യങ്ങൾക്കോ ​​ഏതെങ്കിലും രാഷ്​ട്രീയ പക്ഷം പിടിക്കാനോ ഉള്ളതല്ല ഹജ്ജ്​ കർമങ്ങൾ.

തീർഥാടകർക്ക്​ അവരുടെ ആചാരങ്ങളും അനുഷ്ഠാനങ്ങളും സുരക്ഷിതമായി നിർവഹിക്കുന്നതിന്​ ഹജ്ജ്​ നിയന്ത്രണങ്ങളും നിർദേശങ്ങളും എല്ലാവരും പാലിക്കേണ്ടതുണ്ട്. ഇഹത്തിലും പരത്തിലും നല്ല ഫലവും വിജയവും കൈവരിക്കുന്നതിന് ദൈവത്തെ ഭയപ്പെടണമെന്നും ഇമാം തീർഥാടകരോടും ലോക മുസ്​ലീങ്ങളോടും ആഹ്വാനം ചെയ്തു. അറഫയിൽ നിൽക്കുമ്പോൾ മഹത്തായ അനുഗ്രഹങ്ങൾ നേടിയെടുക്കാനും തീർഥാടകരോട് അഭ്യർഥിച്ചു.

ദൈവത്തിന്​ മാത്രം ആരാധനകൾ അർപ്പിക്കുകയും അത്​ മറ്റാർക്കും സമർപ്പിക്കാതിരിക്കുകയും ചെയ്യുക എന്നത് നിർബന്ധമായ ദൈവഭയത്തി​െൻറ ഭാഗമാണ്. ഇതാണ് ദൈവത്തി​െൻറ മതവും നിയമവും. അവൻ അത്​ സൃഷ്ടികൾക്കായി തെരഞ്ഞെടുക്കുകയും അതിലൂടെ അവരോട് കരുണ കാണിക്കുകയും ചെയ്​തിരിക്കുന്നു. അത് അവർക്ക് നന്മയും നേട്ടങ്ങളും നൽകുകയും തിന്മയിലും അഴിമതിയിലും നിന്ന്​ അവരെ സംരക്ഷിക്കുകയും ചെയ്യുന്നു. ശരീഅത്ത് പുണ്യം നേടുന്നതിനും നന്മ വർധിപ്പിക്കുന്നതിനും തിന്മകളെ തടയുന്നതിനുമുള്ള വ്യവസ്​ഥയാണ്​. ദ്രോഹം തടയുന്നതിന് മുൻഗണന നൽകണമെന്നതാണ്​ അതി​െൻറ തേട്ടം.

അത്​ ജീവിതത്തെ അഭിവൃദ്ധിപ്പെടുത്തുന്നതിനും വികസനം കൈവരിക്കുന്നതിനും പ്രാപ്തമാക്കുന്ന എല്ലാ കാര്യങ്ങളും ഉൾക്കൊള്ളുന്നതാണ്​. മറ്റുള്ളവരെ ഉപദ്രവിക്കുന്നത് ​അത് നിരോധിച്ചിരിക്കുന്നു. നീതി, ധാർമികത, മാതാപിതാക്കളെ ബഹുമാനിക്കുക, കുടുംബബന്ധങ്ങൾ നിലനിർത്തുക, സത്യം പറയുക, അവകാശങ്ങൾ അതി​െൻറ ആളുകൾക്ക് കൈമാറുക, ഉത്തരവാദിത്വം സത്യസന്ധമായി നിർവഹിക്കുക, കരാറുകളും ഉടമ്പടികളും പാലിക്കുക, രക്ഷാകർതൃത്വമുള്ളവരെ ശ്രദ്ധിക്കുകയും അനുസരിക്കുകയും ചെയ്യുക എന്നിവ അത്​ കൽപിച്ചിരിക്കുന്നുവെന്നും ഇമാം പറഞ്ഞു.

മതം, ആത്മാവ്, മനസ്​, പണം, ബഹുമാനം എന്നിവ സംരക്ഷിക്കുന്നതിനുള്ള നിയമങ്ങൾ പരിപാലിക്കേണ്ടത്​ ശരീഅത്തി​െൻറ ആവശ്യമാണ്​. അത് ലംഘിക്കുന്നത് ശിക്ഷാർഹമായ കുറ്റമാണ്​. ഈ ആവശ്യങ്ങൾ സംരക്ഷിക്കുക എന്നത് സ്വർഗത്തിൽ പ്രവേശിക്കുന്നതിനും ഈ ലോകത്തിലെ പുരോഗതിക്കും നാഗരികതക്കുമുള്ള ഒരു കാരണമാണ്. അത് നഷ്​ടപ്പെട്ടാൽ, ജീവിതം അസ്വസ്ഥമാകും. അത് ലംഘിക്കുന്നത് മരണാനന്തര ജീവിതത്തിൽ ശിക്ഷയിലേക്ക് നയിക്കും.

പ്രവാചകന്‍ പറഞ്ഞു: നിങ്ങളുടെ രക്തവും സമ്പത്തും നിങ്ങള്‍ക്ക് പവിത്രമാണ്. ഈ നാട്ടിലെ, ഈ മാസത്തിലെ, ഈ ദിനത്തി​െൻറ പവിത്രത പോലെ. അന്യായമായി ഒരാളെ വധിക്കുന്നത്​ ശരീഅത്ത്​ വിലക്കിയിട്ടുണ്ട്​. ആളുകളുടെ സമ്പത്തും മനസും സംരക്ഷിക്കേണ്ടതി​െൻറ ആവശ്യകത ഉൗന്നിപ്പറഞ്ഞിട്ടുണ്ട്​. ആളുകളുടെ അഭിമാനത്തിൽ ഇടപെടുന്നത് വിലക്കുകയും ചെയ്​തിരിക്കുന്നത്​. അതിനാൽ ശരീഅത്തി​െൻറ ലക്ഷ്യങ്ങൾ ഒരോ മുസ്​ലിം സംരക്ഷിക്കേണ്ടതുണ്ട്​. അതിനെ സംരക്ഷിക്കുന്നതിൽ ഓരോരുത്തർക്കും അവരവരുടെ ഉത്തരവാദിത്തത്തിനും പ്രവൃത്തിക്കും അനുസരിച്ചുള്ള ഉത്തരവാദിത്തമുണ്ടെന്നും ഇമാം പറഞ്ഞു.

ശത്രുവി​െൻറ ആക്രമണം സഹിച്ചും ഭക്ഷണം, മരുന്ന്​, പോഷണം, വസ്ത്രം എന്നിവ നിഷേധിക്കപ്പെട്ടും കഴിയുന്ന ഫലസ്തീനിലെ സഹോദരങ്ങൾക്കുവേണ്ടി പ്രാർഥിക്കണമെന്നും​ ഇമാം അറഫ പ്രസംഗത്തിൽ തീർഥാടകരോട് ആഹ്വാനം ചെയ്തു.