മദീനയിൽ 31 ഹാജിമാർക്ക്​ ഹൃദയ ശസ്​ത്രക്രിയ

ജിദ്ദ: മദീനയിലെ  ഹൃദയചികിൽസാ കേന്ദ്രത്തിൽ വിവിധ രാജ്യങ്ങളിൽ നിന്നുള്ള 31 ഹാജിമാർക്ക്​ ഹൃദയ ശസ്​ത്രക്രിയ നടത്തിയാതായി ബന്ധപ്പെട്ടവർ അറിയിച്ചു. ഇതിൽ ഒരാൾക്ക്​ ഹൃദയം തുറന്ന ശസ്​ത്രക്രിയയാണ്​ നടത്തിയത്​. ഹൃദയസംബന്ധമായ അസുഖവുമായെത്തിയ 220 രോഗികൾക്ക്​ ഇൗ ആശുപത്രിയിൽ ചികിൽസ നൽകി. പുണ്യഭൂമിയിലെത്തുന്ന ഹാജിമാർക്ക്​ വിദഗ്​ധ ചികിൽസ ഉറപ്പാക്കി ഹജ്ജ്​ കർമം നിർവഹിക്കാൻ ഹാജിമാരെ പ്രാപ്​തരാക്കാൻ സൗദി സർക്കാർ വിപുലമായ സംവിധാനങ്ങളാണ്​ ഒരുക്കുന്നത്​. 

മക്കയിൽ ത്വവാഫിനിടെ ഹൃദയാഘാതം വന്ന ഇറാനിൽ നിന്നുള്ള തീർഥാടകന്​ മക്കയിലെ കിങ്​ അബ്​ദുല്ല മെഡിക്കൽ സിറ്റിയിൽ ശസ്​ത്രക്രിയ നടത്തിയതായി ആശുപത്രി ഡയറക്​ടർ ഡോ.നജീബ്​ ജഹ അറിയിച്ചു. ഹജ്ജ്​ സീസണിൽ ഹൃദയശസ്​ത്രക്രിയ വർധിച്ചതായും റെക്കോർഡ്​ വേഗത്തിൽ ശസ്​ത്രക്രിയ പൂർത്തിയാക്കി രോഗികളെ സാധാരണ ജീവിതത്തിലേക്ക്​ കൊണ്ടു വരാൻ സാധിക്കുന്നുണ്ടെന്നും അദ്ദേഹം പറഞ്ഞു.