ഹജ്ജ് ഇമിഗ്രേഷൻ നടപടികൾ അതാത്​ രാജ്യങ്ങളിൽ

ജിദ്ദ: ഹജ്ജ്​ തീർഥാടകരുടെ ഇമിഗ്രേഷനും മറ്റു നടപടികളും അതാത്​ രാജ്യങ്ങളിലെ വിമാനത്താവളത്തിൽ പൂർത്തിയാക്കുന്ന സംവിധാനം ഇത്തവണ ഇന്തോനേഷ്യയിലും നടപ്പാക്കുന്നു. ഇതി​​​െൻറ തുടർ നടപടികൾ ചർച്ച ചെയ്യാൻ ​പ്രത്യേക സൗദി സംഘം ജക്കാർത്തയിലേക്ക്​ പുറപ്പെടും. സൗദി പാസ്​പോർട്ട്​ മേധാവി കേണൽ സുലൈമാൻ ബിൻ അബ്​ദുൽ അസീസ്​ അൽയഹ്​യയുടെ മേൽനോട്ടത്തിൽ ബന്ധപ്പെട്ട വകുപ്പ്​ ഉദ്യോഗസ്​ഥർ അടങ്ങിയ ഒൗദ്യോഗിക സംഘമാണ്​ പുറപ്പെടുന്നത്​. 

വിഷൻ 2030 ലക്ഷ്യമിട്ടാണ്​ ഹജ്ജ്​ തീർഥാടകരുടെ നടപടികൾ അതാതു രാജ്യങ്ങളിലെ വിമാനത്താവളങ്ങളിൽ വെച്ച്​ പൂർത്തിയാക്കുന്നത്​​. 
പരീക്ഷണാടിസ്​ഥാനത്തിൽ കഴിഞ്ഞ വർഷം മലേഷ്യൻ ഹാജിമാരുടെ നടപടികൾ സ്വദേശത്ത്​ വെച്ച്​ പൂർത്തിയാക്കിയിരുന്നു. ഇത്​ വിജയകരമായതി​​​​െൻറ അടിസ്​ഥാനത്തിലാണ്​ ഇന്തോനേഷ്യയിലും നടപ്പാക്കാൻ ശ്രമമാരംഭിച്ചത്​. ജക്കാർത്തയിലെത്തുന്ന സംഘം ഇന്തോനേഷ്യൻ അധികാരികളുമായി വിശദ ചർച്ച നടത്തും. 

നടപ്പാക്കാൻ ഉദ്ദേശിക്കുന്ന നടപടി ക്രമങ്ങളുടെ വിഷ്വൽ കാണിച്ചു കൊടുക്കും. സ്വദേശങ്ങളിൽ നിന്ന്​ യാത്ര, ലഗേജ്​ നടപടികൾ പൂർത്തിയായാൽ തീർഥാടകർക്ക്​​ ജിദ്ദ, മദീന വിമാനത്താവളങ്ങളിൽ പ്രത്യേക ട്രാക്കിലൂടെ വേഗത്തിൽ പുറ​ത്തുകടക്കാനും വേഗത്തിൽ താമസ സ്​ഥലങ്ങളിലെത്താനും സാധിക്കും. ഹജ്ജിന്​ ഏറ്റവും കൂടുതൽ തീർഥാടകർ എത്തുന്ന രാജ്യങ്ങളിലൊന്നാണ്​ ഇന്തോനേഷ്യ.