ഹജ്ജ്​: മടക്കയാത്ര സമയപരിധി ശനിയാഴ്​ച അവസാനിക്കും

ജിദ്ദ: ഹജ്ജ്​ തീർഥാടകരുടെ മടക്കയാത്രക്കുള്ള അവസാന തീയതി ശനിയാഴ്​ച. ഈ വർഷം വിദേശത്തുനിന്ന്​ ഹജ്ജിനെത്തി രാജ്യത്ത്​ അവശേഷിക്കുന്നവർ ശനിയാഴ്​ചക്കുള്ളിൽ രാജ്യം വിടു​മെന്ന്​ ഹജ്ജ്​, ഉംറ മന്ത്രാലയം വ്യക്തമാക്കി. മുഴുവൻ ഹജ്ജ്​ സേവന സ്ഥാപനങ്ങളും തീർഥാടകരുടെ മടക്കയാത്ര ഷെഡ്യൂൾ കൃത്യമായി പാലിക്കണം. യാത്ര നടപടികൾ പൂർത്തിയായെന്ന്​ ഉറപ്പുവരുത്തുകയും വേണം.

അതേസമയം വിവിധ രാജ്യങ്ങളിൽനിന്ന്​ ഹജ്ജിനെത്തിയവരുടെ തിരിച്ചുപോക്ക്​ തുടരുകയാണ്​. പല രാജ്യങ്ങളിലെയും തീർഥാടകരുടെ മടക്കം​ പൂർത്തിയായിട്ടുണ്ട്​. ഇന്ത്യൻ തീർഥാടകരെല്ലാം മടങ്ങിക്കഴിഞ്ഞു. അവശേഷിക്കുന്ന മറ്റ്​ രാജ്യക്കാരായ തീർഥാടകർ ശനിയാഴ്​ചയോടെ പുണ്യസ്ഥലങ്ങളോട്​ വിടപറയും. നേരത്തെ നിശ്ചയിച്ചിട്ടുള്ള ഷെഡ്യൂൾ അനുസരിച്ചാണ്​ മടക്കയാത്ര.