പുതിയ ഹജ്ജ്​, ഉംറ സീസൺ: ചരിത്രത്തിലെ ഏറ്റവും വലിയ പ്രവർത്തന പദ്ധതിയുമായി ഇരുഹറം കാര്യാലയം

ജിദ്ദ: ഹിജ്​റ വർഷാദ്യം മുതൽ ചരിത്രത്തിലെ ഏറ്റവും വലിയ പ്രവർത്തന പദ്ധതിക്ക്​ തുടക്കമാകുമെന്ന്​ ഇരുഹറം കാര്യാലയം അറിയിച്ചു. ഏതാനും ദിവസങ്ങൾ കഴിഞ്ഞാൽ പുതിയ ഹിജ്​റ വർഷം ആരംഭിക്കും. അന്നു മുതൽ നടപ്പാക്കേണ്ട പദ്ധതികൾ ആസൂത്രണം ചെയ്തുവരുകയാണ്​. കഴിഞ്ഞ ഹജ്ജ്​, റമദാൻ സീസൺ പദ്ധതികൾ വിജയകരമായതിനുശേഷമാണ്​ അടുത്ത വർഷത്തേക്ക്​ പ്രവർത്തന പദ്ധതികൾ ആവിഷ്​കരിക്കുന്ന​ത്​.

അടുത്ത ഹജ്ജ്​, ഉംറ സീസണുകളിലെ സംഘാടനം, ഒാപറേഷൻ എന്നീ രംഗങ്ങളിലെ പ്രവർത്തനങ്ങളും ആസൂത്രണം ചെയ്യുന്നതിലുൾപ്പെടുമെന്നും ഇരുഹറം കാര്യാലയം വ്യക്തമാക്കി. ആസൂത്രണ, വികസന, വിഷൻ, പൊതു അഡ്മിനിസ്ട്രേ​ഷൻ എന്നീ വകുപ്പുകൾ സംയുക്തമായി അടുത്ത സീസണുകളിലേക്ക്​​ വേണ്ട സമഗ്രപദ്ധതി തയാറാക്കാൻ ഇരുഹറം കാര്യാലയ മേധാവി ഡോ. അബ്​ദുറഹ്​മാൻ അൽസുദൈസ്​ നിർദേശം നൽകി. പ്രവർത്തനങ്ങൾ വികസിപ്പിക്കുക, പ്രകടനം മെച്ചപ്പെടുത്തുക, ഡിജിറ്റൽ ഇൻഫ്രാസ്​ട്രക്​ചർ വികസിപ്പിക്കുക, മാനവ വിഭവശേഷി യോഗ്യമാക്കുക, ഇരുഹറമുകളിലെ ജോലിക്കാർക്കും ഉദ്യോഗസ്​ഥർക്കുമുള്ള പരിശീലന കോഴ്​സുകൾ ഇരട്ടിയാക്കുക തുടങ്ങി ഹറമിലെത്തുന്നവർക്ക്​ മികച്ച സേവനങ്ങൾ മുഴുവൻസമയം ലഭ്യമാക്കുന്നതിനു​ വേണ്ട പ്രവർത്തന പദ്ധതികൾ ആവിഷ്​കരിക്കാനാണ്​ നിർദേശിച്ചിരിക്കുന്നത്​. പരിധിയില്ലാത്ത സഹായങ്ങളാണ്​ ഭരണകർത്താക്കളിൽനിന്ന്​ ലഭിക്കുന്നത്​. ഇരുഹറമുകളുടെ വികസനത്തിന്​ സാധ്യമായ എല്ലാ കഴിവുകളും വി​ നിയോഗിച്ചിട്ടുണ്ട്​. മസ്​ജിദുൽ ഹറാമിലെ മൂന്നാംഘട്ട സൗദി വികസനവും മസ്​ജിദുന്നബവിയിലെ വികസന പദ്ധതികളുമെല്ലാം ഇതി​െൻറ ഭാഗമാണ്​. പ്രവർത്തന മേഖല വ്യവസ്ഥാപിതമാക്കി പൂർണമായും വികസിപ്പിക്കുകയെന്ന ലക്ഷ്യത്തോടെയുള്ളതായിരിക്കും പുതിയ ​പ്രവർത്തന പദ്ധതിയെന്നും ഇരുഹറം കാര്യാലയ മേധാവി പറഞ്ഞു. കോവിഡ്​ പശ്ചാത്തലത്തിൽ ​ജോലി സ്ഥലങ്ങളിൽ ഹാജരാകുന്നതിന്​ താൽക്കാലിക വിലക്കേർപ്പെടുത്തിയപ്പോൾ ​ജീവനക്കാർക്കും തൊഴിലാളികൾക്കും ബദൽ പദ്ധതി ഇരുഹറം കാര്യാലയം തയാറാക്കിയിരുന്നു. ഷിഫ്​റ്റുകളിലായാണ്​ അവർ പ്രവർത്തിച്ചിരുന്നത്​. ആരോഗ്യ പരിസ്ഥിതി സുരക്ഷ ഉറപ്പുവരുത്താൻ ഇരുഹറമുകളിലും ശുചീകരണ, അണുമുക്ത നടപടികൾ ശക്തമാക്കുകയും ആരോഗ്യ മുൻകരുതൽ നടപടികൾ കർശനമാക്കുകയും ജോലിക്കാരെയും​ തൊഴിലാളികളെയും ഇടക്കിടെ പരിശോധനക്ക്​ വിധേയമാക്കുകയും ചെയ്​തിരുന്നതായും ഡോ. അൽസുദൈസ് പറഞ്ഞു.