ഹൃദയാഘാതം: മലപ്പുറം സ്വദേശി ത്വാഇഫിൽ നിര്യാതനായി

ത്വാഇഫ്: നെഞ്ചുവേദനയെ തുടർന്ന് ത്വാഇഫ് കിങ്​ ഫൈസൽ ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചിരുന്ന മലപ്പുറം പോരൂർ പൂതറക്കോവ് കൊട്ടാടൻ വീട്ടിൽ പ്രതീഷ് (46) മരിച്ചു. അൽ മജാൽ മാൻപവർ കോൺട്രാക്​റ്റ്​ കമ്പനിയിൽ ആറ്​ വർഷമായി ഇലക്ട്രീഷ്യനായിരുന്നു. ഒരുവർഷം മുമ്പാണ് അവധി കഴിഞ്ഞ് നാട്ടിൽനിന്നും തിരിച്ചെത്തിയത്.

പിതാവും മാതാവും ഭാര്യയും 19 വയസായ മകനും 10 വയസ്സായ മകളുമടങ്ങുന്നതാണ്​ കുടുംബം. മരണാനന്തര നടപടികൾ പൂർത്തീകരിക്കാൻ കൂടെ ജോലി ചെയ്യുന്ന സുഹൃത്ത് തമിഴ്നാട്ടുകാരനായ സയ്യിദ് സുലൈമാനെ കുടുംബം ചുമതലപ്പെടുത്തി. ത്വാഇഫ് കെ.എം.സി.സി സെൻട്രൽ കമ്മിറ്റി പ്രസിഡൻറും ജിദ്ദ ഇന്ത്യന്‍ കോൺസുലേറ്റ് കമ്യൂണിറ്റി വെൽഫെയർ പ്രതിനിധിയുമായ നാലകത്ത് മുഹമ്മദ് സാലിഹ് നടപടികള്‍ പൂര്‍ത്തിയാക്കാൻ രംഗത്തുണ്ട്​. മൃതദേഹം നാട്ടിലെത്തിക്കും.