റിയാദിൽ ശക്തമായ മഴ

റിയാദ്​: സൗദി തലസ്ഥാന നഗരമായ റിയാദിൽ അതിശക്തമായ മഴ. ഉച്ചകഴിഞ്ഞത്​ മുതൽ ആകാശം മൂടിക്കെട്ടിയിരുന്നെങ്കിലും മേഘ പെയ്​ത്താരംഭിച്ചത് വൈകീട്ട്​ ആറോടെയാണ്​. നഗരത്തിന്റെ ചില ഭാഗങ്ങളിൽ കോരിച്ചൊരിയുന്നത്​ പോലെയാണ്​ മഴ പെയ്​തിറങ്ങിയത്​. ചാറിപ്പോയ ഭാഗങ്ങളുമുണ്ട്​. എന്നാൽ അതിശക്തമായ കാറ്റുവീശി. ഇടിമിന്നലുമുണ്ടായി. മഴപെയ്​തതോടെ അന്തരീക്ഷത്തിന്​ തണുപ്പും കൂടിയിട്ടുണ്ട്​. ​

നഗരത്തിന്റെ വടക്കുഭാഗത്ത്​ റോഡുകളിൽ വെള്ളക്കെട്ടുകളുണ്ടായി. കാറുകൾ പോലുള്ള ചെറിയ വാഹനങ്ങളുടെ ടയറുകൾ മുങ്ങിപ്പോകും വിധം പലയിടങ്ങളിലും റോഡുകളിൽ വെള്ളം നിറഞ്ഞു. ഗതാഗതത്തിന്​ നേരിയ തടസ്സം അനുഭവപ്പെട്ടു. തണുപ്പിലേക്ക്​ രാജ്യത്തിന്റെ കാലാവസ്ഥ മാറുന്നതിന്റെ സൂചനയായി ഒരാഴ്​ചയിൽ കൂടുതലായി പല ഭാഗങ്ങളിലും വ്യാപകമായ മഴ ​പെയ്യുന്നുണ്ടെങ്കിലും റിയാദിൽ നല്ല മഴയുണ്ടായത്​ ഇന്നാണ്​.

മഴ കാണാൻ കാത്തിരുന്നവർക്ക്​ ഇത്​ നല്ല ആഘോഷവുമായി. മഴയുടെയും ഇടിമിന്നലിന്റെയും കാറ്റടിക്കുന്നതിന്റെയും ദൃശ്യങ്ങൾ മൊബൈൽ ഫോണുകളിൽ പകർത്തി നഗരവാസികൾ സോഷ്യൽ മീഡിയകളിൽ നിറച്ചുകഴിഞ്ഞു. കഴിഞ്ഞ ദിവസം ജിദ്ദയിലും മക്കയിലും അതിശക്തമായ മഴയും തുടർന്ന്​ വെള്ളപ്പൊക്കവുമുണ്ടായിരുന്നു.