റിയാദിലെ എണ്ണ ശുദ്ധീകരണശാലക്ക്​ നേരെ ഹൂതി ഡ്രോൺ ആക്രമണം

ജിദ്ദ: റിയാദിലെ എണ്ണ ശുദ്ധീകരണശാലക്ക്​ നേരെ ഹൂതി ഡ്രോൺ ആക്രമണം. വെള്ളിയാഴ്​ച രാവിലെ ആറിനാണ് എണ്ണ ശുദ്ധീകരണ ശാലക്ക്​ നേരെ ആക്രമണമുണ്ടായതെന്ന്​ ഊർജ്ജ മന്ത്രാലയ വ്യത്തങ്ങൾ പറഞ്ഞു. ആക്രമണത്തെ തുടർന്നു തീപിടിത്തമുണ്ടായെങ്കിലും ഉടൻ നിയന്ത്രണവിധേയമാക്കി. സംഭവത്തിൽ ആർക്കെങ്കിലും പരി​ക്കുകളോ, മരണമോ ഉണ്ടാവുകയോ പെട്രോളിയം വിതരണത്തെ ബാധിക്കുകയോ ചെയ്തിട്ടില്ലെന്ന് ഊർജ്ജ മന്ത്രാലയ വൃത്തങ്ങൾ പറഞ്ഞു.

ഭീരുത്വം നിറഞ്ഞ ആക്രമണത്തെ രാജ്യം ശക്തമായി അപലപിക്കുന്നുവെന്നും സുപ്രധാന സ്​ഥാപനങ്ങൾക്കും സിവിലിയൻ വസ്​തുക്കൾക്കെുമെതിരെ ആവർത്തിച്ചുള്ള തീവ്രവാദ അട്ടിമറി പ്രവർത്തനങ്ങളെ സ്ഥിരീകരിക്കുന്നതാണ്​ റിയാദ്​ റിഫൈനറിക്ക്​ നേരെയുള്ള ആക്രമണമെന്നും ഊർജ്ജ മന്ത്രാലയ വൃത്തങ്ങൾ പറഞ്ഞു. ഏറ്റവും ഒടുവിലായി റാസ് ​തനൂറ റിഫൈനറിക്കും സൗദി ആരാംകോ ​താമസകേന്ദ്രങ്ങളെയും ലക്ഷ്യമിട്ടായിരുന്നു ഭീകരുടെ ആക്രമണശ്രമം.

ഇത്​ രാജ്യത്തെ മാത്രം ലക്ഷ്യമിട്ടുള്ളതല്ല. ലോകത്തിലെ ഊർജ്ജ വിതരണ സുരക്ഷയും സ്ഥിരതയും ആഗോള സമ്പദ്​ വ്യവസ്​ഥയും ലക്ഷ്യമിട്ടുള്ളതാണ്​. ഇത്തരം തീവ്രവാദ അട്ടിമറി ആ​ക്രണങ്ങൾക്കെതിരെ നില​കൊള്ളാനും അതു ​നടപ്പാക്കുന്നവരെയും അവർക്ക്​ സഹായം നൽകുന്നവരെയും നേരിടാനും ലോകരാജ്യങ്ങളോടും സംഘടനകളോടും വീണ്ടും ആവശ്യപ്പെടുന്നുവെന്നും ഊർജ്ജ മന്ത്രാലയ വൃത്തങ്ങൾ പറഞ്ഞു.