ഇന്ത്യൻ കരസേനാ മേധാവി ഞായറാഴ്​ച സൗദിയിൽ, ചരിത്രത്തിലാദ്യം

റിയാദ്​: ഇന്ത്യൻ കരസേനാ മേധാവി ജനറൽ എം.എം. നരവനെ സൗദി അറേബ്യ സന്ദർശിക്കുന്നു. പ്രതിരോധ രംഗത്തെ ഇരുരാജ്യങ്ങളുടെയും സഹകരണം മെച്ചപ്പെടുത്താൻ ലക്ഷ്യമിട്ടുള്ള സന്ദർശനം ഇൗ മാസം 13നും 14നുമാണ്​. ആദ്യമായാണ്​ ഒരു ഇന്ത്യൻ സൈനിക തലവൻ സൗദി അറേബ്യയിലെത്തുന്നത്​.

സൗദി തലസ്ഥാന നഗരത്തിലെത്തുന്ന അദ്ദേഹം ദ്വദിന പര്യടനത്തിനിടയിൽ ഉന്നത പ്രതിരോധ, സൈനിക തല യോഗങ്ങളിൽ സംബന്ധിക്കും. പ്രതിരോധ, സൈനീക രംഗത്തെ ഉന്നത ഉദ്യോഗസ്​ഥരുമായി കൂടിക്കാഴ്​ചകൾ നടത്തും. രാജ്യസുരക്ഷയും പ്രതിരോധവുമായി ബന്ധപ്പെട്ട വിവിധ വിഷയങ്ങളിലെ ഇരുരാജ്യങ്ങളുടെയും കാഴ്​ചപ്പാടുകൾ കൈമാറും. റോയൽ സൗദി ലാൻഡ്​ ഫോഴ്​സി​െൻറയും ജോയിൻറ്​ ഫോഴ്​സ്​ കമാൻഡി​െൻറയും ആസ്ഥാനങ്ങളും കിങ്​ അബ്​ദുൽ അസീസ്​ മിലിറ്ററി അക്കാദമിയും ഇന്ത്യൻ സൈനിക തലവൻ സന്ദർശിക്കും.

സൗദി നാഷനൽ ഡിഫൻഡ്​ യൂനിവേഴ്​സിറ്റി സന്ദർശിക്കുന്ന അദ്ദേഹം വിദ്യാർഥികളെയും വിവിധ ഫാക്കൽറ്റികളെയും അഭിസംബോധന ചെയ്യും. ഇന്ത്യൻ കരസേനാ മേധാവി യു.എ.ഇയും സന്ദർശിക്കുന്നുണ്ട്​. ബുധനാഴ്​ച യു.എ.ഇയിൽ എത്തുന്ന അദ്ദേഹം വ്യാഴാഴ്​ച വരെ അവിടെയുണ്ടാവും. മുതിർന്ന സൈനീക ഉദ്യോഗസ്ഥരുമായി അദ്ദേഹം അവിടെ കൂടിക്കാഴ്​ചകൾ നടത്തും. ആദ്യമായാണ്​ ഒരു ഇന്ത്യൻ പട്ടാള മേധാവി യു.എ.ഇയും സന്ദർശിക്കുന്നത്​. സൗദി, യു.എ.ഇ സന്ദർശനങ്ങൾ പുതിയ ചരിത്രം കുറിക്കുമെന്നാണ്​ വിശേഷിപ്പിക്കപ്പെടുന്നത്​.