അഭയകേന്ദ്രത്തിൽനിന്ന് ആറ് സ്ത്രീകളെ ഇന്ത്യൻ എംബസി നാട്ടിലയച്ചു

ദമ്മാം: തൊഴിൽപ്രശ്നങ്ങൾ അഭയകേന്ദ്രത്തിലെത്തിച്ച ആറ് ഇന്ത്യൻ വനിതാ തൊഴിലാളികൾക്ക് മോചനം. ഇന്ത്യൻ സ്വാതന്ത്ര്യത്തിന്‍റെ 75-ാം വാർഷികത്തിൽ ഇന്ത്യൻ എംബസിയുടെ ഇടപെടലാണ് ഇവർക്ക് നാട്ടിലേക്ക് വഴിതെളിയിച്ചത്. സ്വാതന്ത്ര്യ ദിനാഘോഷത്തിന്​ മുമ്പ്​ ഇവരുടെ പ്രശ്നങ്ങൾക്ക്​ പരിഹാരം കാണണമെന്ന എംബസി ഉദ്യോഗസ്ഥരുടെ താൽപര്യമാണ്​ ഈ സ്ത്രീകൾക്ക് ഗുണകരമായത്​. പശ്ചിമ​ ബംഗാൾ മുർഷിദാബാദ്​ സ്വദേശിനി ഗസീന ഖാത്തൂൻ (25), ആന്ധ്ര കടപ്പ സ്വദേശിനികളായ ഗംഗമ്മ (49), ഖാദർബി (25), ഹൈദരാബാദ്​ സ്വദേശിനികളായ ഷാദിയ സബ (25), മെഹറുന്നിസ (30), ആന്ധ്ര, തിരുപ്പതി സ്വദേശിനി ഫൈറൂസ്​ (27) എന്നിവരാണ്​ പ്രവാസത്തിലെ ദുരിതപർവം താണ്ടി നാട്ടിലേക്ക്​ മടങ്ങിയത്​.

വാഗ്ദാനം ചെയ്യപ്പെട്ട തൊഴിലും ശമ്പളവും ലഭിക്കാതെയും തൊഴിലവകാശങ്ങൾ നിഷേധിക്കപ്പെട്ടും ദുരിതത്തിലായപ്പോ​ഴാണ്​ ഇവർ റിയാദിലെ ഇന്ത്യൻ എംബസിയുടെ അഭയകേന്ദ്രത്തിൽ എത്തിയത്​. ഇംഗീഷ്​ സാഹിത്യത്തിൽ ബിരുദാനന്തര ബിരുദമുള്ള ഷാദിയ സബ പച്ചക്കറി ഇറക്കുമതി ചെയ്യുന്ന കമ്പനിയിൽ ഓഫീസ്​ ജോലിയെന്ന വാഗ്ദാനത്തിൽ കുടുങ്ങിയാണ് സൗദിയിലെത്തിയത്. എന്നാൽ വിമാനത്താവളത്തിൽ നിന്ന്​ കമ്പനി ഉടമയുടെ സഹോദരിയുടെ വീട്ടിലെത്തിച്ച ഷാദിയക്ക്​ കഠിനമായ വീട്ടുജോലികളാണ്​ ചെയ്യേണ്ടി വന്നത്​. ആഹാരം പോലും കൃത്യമായി കിട്ടാതെ വന്നതോടെ ഷാദിയ അടുത്തുള്ള പൊലീസ്​ സ്​റ്റേഷനിൽ അഭയം തേടുകയായിരുന്നു. അവരാണ്​ ഇന്ത്യൻ എംബസിയുടെ അഭയകേന്ദ്രത്തിലേക്ക്​ അയച്ചത്​. വിവാഹം കഴിഞ്ഞ്​ ഒരു വർഷം കഴിഞ്ഞപ്പോഴേക്കും ഭർത്താവ്​ ഇരു വൃക്കകളും തകരാറിലായി രോഗിയായതോടെ​യാണ് നിസ്സഹായായ യുവതിക്ക്​ ജോലിതേടി കടൽ കടക്കേണ്ടി വന്നത്​.

ജിദ്ദയിൽ സ്വദേശി പൗരന്റെ വീട്ടിൽ ജോലിക്കാരിയായിരുന്ന ഗസീന ഖാത്തൂൻ തന്‍റെ സ്വർണ കമ്മലും മോതിരവും വിറ്റാണ്​ ജിദ്ദയിൽനിന്ന്​ റിയാദിലെ എംബസ്സിയിലേക്ക് അഭയം തേടി എത്തിയത്​. എട്ട് മാസം ജോലിചെയ്തിട്ടും ശമ്പളം കിട്ടിയില്ല. തൊഴിലുടമയുടെ മർദ്ദനങ്ങൾ കൂടി സഹിക്കേണ്ടി വന്നതോടെയാണ് അവിടെ നിന്ന്​ ഓടി രക്ഷപ്പെട്ടത്​. ആറുവർഷം ജോലിചെയ്തിട്ടും മൂന്നുവർഷത്തെ ശമ്പളം ലഭിക്കാതെയാണ്​ ഗംഗമ്മയുടെ മടക്കം. മുന്നുമാസമാണ്​ ഇവർ എംബസി അഭയകേന്ദ്രത്തിൽ കഴിഞ്ഞത്​.

ബ്യുട്ടിപാർലറിലെ ജോലിക്കായി എത്തിയ മെഹറുന്നിസക്ക്​ ബ്യൂട്ടി പാർലറിലേയും തൊഴിൽ ഇടമയുടെ വീട്ടിലെ ജോലിയും ചെയ്യേണ്ടി വന്നിട്ടും ശമ്പളം കിട്ടാതായതോടെ ഏജൻസി തന്നെ റിയാദിൽ എത്തിക്കുകയായിരുന്നു. റിയാദിലും തുറൈഫിലുമായി ഉരുകിത്തീർന്ന ആറ് വർഷത്തിനു​ശേഷമാണ്​ ഖാദർബി മടങ്ങുന്നത്​. ഖത്തറിൽനിന്ന്​ സൗദിയിലെത്തിച്ച്​ ദുരിതത്തിലകപ്പെട്ട ആളാണ്​ ഫൈറൂസ്​. റിയാദിലെ അഭയകേന്ദ്രത്തിൽ എത്തിയ ഇവരെ വെൽഫെയർ കോൺസൽ എം.ആ. സജീവിന്‍റെ നിർദേശപ്രകാരം തർഹീൽ ചുമതലയുള്ള എംബസി ഉദ്യോഗസ്ഥരായ ആഷിഖ്​, ഖാലിദ്​ എന്നിവരാണ്​ ദമ്മാമിൽ എത്തിച്ചത്​.

സാമൂഹിക പ്രവർത്തകനായ നാസ്​ വക്കം ദമ്മാമിലെ ഡീപോട്ടേഷൻ മേധാവിയുടെ സഹായത്തോടെ ഇവർക്ക്​ എക്സിറ്റ് വിസ​ ലഭ്യമാക്കുകയായിരുന്നു. അവധി ദിവസമായിട്ടും സെക്കൻഡ്​ സെക്രട്ടറി ബിപിൻ എൻ. പാണ്ഡെ ഓഫീസിൽ എത്തി ഇവർക്കുള്ള യാത്ര ടിക്കറ്റുകൾ അനുവദിക്കുകയും ചെയ്തു. ഒരു ദിവസം നാസ്​ വക്കത്തിന്റെ നേതൃത്വത്തിലുള്ള താൽക്കാലിക ഷെൽട്ടറിൽ കഴിഞ്ഞ ഇവരെ കഴിഞ്ഞ ദിവസം നാട്ടിലേക്ക് അയച്ചു.