വ്യാജ വാഗ്‌ദാനങ്ങളിലൂടെ അധികാരത്തിലേറിയ ഇന്ത്യൻ ഫാഷിസം തകരാനുള്ളത് -ഹമീദ് വാണിയമ്പലം

ദമ്മാം: വ്യാജമായ വാഗ്‌ദാനങ്ങളാൽ പ്രലോഭിപ്പിച്ച്​ വ്യത്യസ്​ത ജാതിവിഭാഗങ്ങളെ കബളിപ്പിച്ച്​ മുന്നേറുന്ന ഇന്ത്യൻ ഫാഷിസം തകരാനുള്ളതാണെന്ന് ഹ്രസ്വ സന്ദർശനത്തിന് സൗദിയിലെത്തിയ വെൽഫെയർ പാർട്ടി ദേശീയ വൈസ് പ്രസിഡൻറ്​ ഹമീദ് വാണിയമ്പലം അഭിപ്രായപ്പെട്ടു. പ്രവാസി വെൽഫെയർ കിഴക്കൻ പ്രവിശ്യാകമ്മിറ്റി ഒരുക്കിയ സൗഹൃദസംഗമത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം.

നിരവധി സംസ്‌കാരങ്ങളെ ഇല്ലാതാക്കി ഏകശിലാസംസ്‌കാരത്തിലേക്ക് രാജ്യത്തെ ജനങ്ങളെ മാറ്റാൻ ശ്രമിക്കുകയാണ് ഹിന്ദുത്വശക്തികൾ. ഇത് ഇന്ത്യയുടെ വൈവിധ്യങ്ങൾക്ക് വിരുദ്ധമാണ്. ഇന്ത്യയുടെ ആത്മാവ് വ്യത്യസ്​ത സംസ്‌കാരങ്ങളെ ഉൾക്കൊള്ളുന്നതാണ്, തിരസ്‌കരിക്കുന്നതല്ല. മതന്യൂനപക്ഷങ്ങളെയും ദലിത് വിഭാഗങ്ങളെയും ശത്രുപക്ഷത്ത് നിർത്തി വ്യാജമായ രാഷ്​ട്രസങ്കൽപ വാഗ്‌ദാനം നൽകി ഇപ്പോൾ രാഷ്​ട്രീയ നേട്ടമുണ്ടാക്കിയത് ആധികകാലം നിലനിർത്താൻ കഴിയില്ല.

ധ്രുവീകരണ രാഷ്​ട്രീയത്തിലൂടെ രാഷ്​ട്രീയനേട്ടം ഉണ്ടാക്കി അധികാരത്തിലേറിയ ഫാഷിസ്​റ്റ്​ ശക്തികളെ താഴെയിറക്കാൻ പ്രതിപക്ഷ കക്ഷികളുടെ യോജിപ്പ് ഈ അവസരത്തിൽ അനിവാര്യമാണെന്നും ഡൽഹി തെരഞ്ഞെടുപ്പുഫലത്തെ ചൂണ്ടിക്കാണിച്ച് അദ്ദേഹം കൂട്ടിച്ചേർത്തു. സംഗമത്തിൽ കിഴക്കൻ പ്രവിശ്യയിലെ സാമൂഹിക സാംസ്‌കാരികരംഗത്തുള്ള നിരവധിപേർ പങ്കെടുത്തു. പ്രസിഡൻറ്​ ഷബീർ ചാത്തമംഗലം അധ്യക്ഷത വഹിച്ചു. കെ.എം. സാബിഖ് മോഡറേറ്റർ ആയിരുന്നു. ഷക്കീർ ബിലാവിനകത്ത് നന്ദി പറഞ്ഞു.