വിവേചനബുദ്ധിയാണ് ഒരാളെ യഥാർഥ മനുഷ്യനാക്കുന്നത് -നാസർ മുണ്ടക്കയം
text_fieldsജിദ്ദ: മറ്റു ജീവജാലങ്ങളിൽനിന്ന് മനുഷ്യനെ വ്യത്യസ്തനാക്കുന്നത് അവന്റെ വിവേചനബുദ്ധിയാണെന്നും അത് ശരിയായ രൂപത്തിൽ ഉപയോഗിക്കുമ്പോഴാണ് ഒരാൾ യഥാർഥ മനുഷ്യനാകുന്നതെന്നും ഐ.എസ്.എം സംസ്ഥാന വൈസ് പ്രസിഡൻറും സാമൂഹിക പ്രവർത്തകനുമായ നാസർ മുണ്ടക്കയം അഭിപ്രായപ്പെട്ടു. ‘വിശ്വാസം; കരുത്തും കരുതലും’ എന്ന വിഷയത്തിൽ ജിദ്ദ ഇന്ത്യൻ ഇസ്ലാഹി സെന്ററിൽ പ്രഭാഷണം നടത്തുകയായിരുന്നു അദ്ദേഹം.
നമ്മൾ ‘എ.ഐ’ യുഗത്തിലാണെന്ന് അഹങ്കരിക്കുമ്പോഴും വയനാടുണ്ടായത് പോലുള്ള പ്രകൃതിദുരന്തങ്ങൾ പ്രവചിക്കാൻ മനുഷ്യർക്ക് ഇന്നും പൂർണമായി കഴിയുന്നില്ല. എന്നാൽ മറ്റു പല ജീവികളും അത് മുൻകൂട്ടി കാണുകയും അവിടെനിന്ന് രക്ഷപ്പെടുകയും ചെയ്യുന്ന കാഴ്ചകൾക്കും നമ്മൾ സാക്ഷികളായി.
ഇത്തരം പ്രകൃതിദുരന്തങ്ങളും കൂട്ടമരണങ്ങളുമെല്ലാം നമ്മെ മരണത്തെക്കുറിച്ച് കൂടുതൽ ചിന്തിപ്പിക്കാനും നമ്മുടെ ആദർശത്തിൽ ഉറച്ചുനിന്നുകൊണ്ട് മറ്റുള്ളവരോട് കൂടുതൽ കാരുണ്യം കാണിക്കാനുമൊക്കെ പ്രേരകമാകേണ്ടതുണ്ടെന്നും അദ്ദേഹം പറഞ്ഞു. അന്ധവിശ്വാസങ്ങൾക്കും ചൂഷണങ്ങൾക്കുമെതിരെ ഏകദൈവാരാധനയെന്ന ആശയം ഉയർത്തിപ്പിടിച്ചുകൊണ്ടാണ് ലോകത്ത് വന്ന സകല പ്രവാചകൻമാരും പോരാടിയതെന്നും ആ മാതൃക പിൻപറ്റി ശക്തമായി പ്രബോധനപ്രവർത്തനങ്ങൾ തുടരണമെന്നും അദ്ദേഹം ഓർമപ്പെടുത്തി. നൂരിഷ വള്ളിക്കുന്ന് അധ്യക്ഷത വഹിച്ചു. നൗഫൽ കരുവാരക്കുണ്ട് സ്വാഗതവും ഷാഫി ആലപ്പുഴ നന്ദിയും പറഞ്ഞു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.