ജിദ്ദ വിമാനത്താവള പ്രതിസന്ധി: അന്വേഷണത്തിന് ഗതാഗത മന്ത്രി ഉത്തരവിട്ടു

ജിദ്ദ: ജിദ്ദയിലെ കിങ് അബ്ദുൽ അസീസ് അന്താരാഷ്​ട്ര വിമാനത്താവളത്തിൽ കഴിഞ്ഞ ദിവസങ്ങളിൽ യാത്രക്കാരുടെ തിക്കുംതിരക്കും ഉണ്ടാവാനും വിമാന സർവിസുകൾ താറുമാറാവാനും ഇടയായതിനെ കുറിച്ച്​ അന്വേഷിക്കാൻ സൗദി ഗതാഗത വകുപ്പ് മന്ത്രി സ്വാലിഹുൽ ജാസിർ ഉത്തരവിട്ടു. സിവിൽ ഏവിയേഷൻ മേധാവിയുടെ നേതൃത്വത്തിൽ പ്രത്യേക അന്വേഷണ സമിതിയെ ഇതിനായി ചുമതലപ്പെടുത്താനും മന്ത്രി നിർദേശം നൽകി.

കഴിഞ്ഞ ദിവസങ്ങളിൽ അനുഭവപ്പെട്ട തിക്കുംതിരക്കും അന്താരാഷ്ട്ര വിമാനങ്ങളുടെ സർവിസുകളുടെ താളംതെറ്റലും അതിനുള്ള കാരണങ്ങളുമാണ്​ സമിതി അ​ന്വേഷിക്കുക. സാധാരണ സംഭവിക്കാത്ത തിരക്കിനും സർവിസുകളുടെ താളപ്പിഴവിനും എന്താണ്​ കാരണമെന്നതാണ്​ പ്രധാനമായും അന്വേഷണ പരിധിയിൽ വരിക. ഇത്തരമൊരു പ്രതിസന്ധിയുണ്ടായിട്ടും അത് പരിഹരിക്കാൻ കഴിയാത്ത സാഹചര്യവും ആരാണ്​ ഉത്തരവാദികളെന്നതും അന്വേഷിക്കും. കുറ്റമറ്റ സേവനങ്ങൾ വിമാനയാത്രക്കാർക്ക് നൽകാൻ എന്ത് സൗകര്യങ്ങളാണ് ഇനിയും ഒരുക്കേണ്ടതെന്ന വിഷയങ്ങളും പഠിച്ച്​ അവതരിപ്പിക്കാൻ അന്വേഷണ സമിതിക്ക്​ നിർദേശമുണ്ട്​. ഒരാഴ്ചക്കുള്ളിൽ റിപ്പോർട്ട് സമർപ്പിക്കണം.

മലയാളികളടക്കം ഉംറ തീർഥാടകരാണ്​ വിമാനത്താവളത്തിലുണ്ടായ പ്രതിസന്ധിയിൽ അകപ്പെട്ട്​ ദുരിതം അനുഭവിച്ചത്​. ഇങ്ങനെ വിവിധ രാജ്യങ്ങളിലേക്കുള്ള യാത്രക്കാർ വിമാനങ്ങളുടെ സർവിസ്​ താളംതെറ്റലിൽ പെട്ട്​ ഒരു ദിവസത്തോളം വിമാനത്താവളത്തിൽ കഴിച്ചുകൂ​േട്ടണ്ട സാഹചര്യമുണ്ടായി. പ്രായമായവരും സ്ത്രീകളും കുട്ടികളുമൊക്കെ ഭക്ഷണം ലഭിക്കാതെയും വിശ്രമിക്കാൻ കഴിയാതെയും ദുരിതം നേരിട്ടിരുന്നു. വിവിധ രാജ്യങ്ങളിലേക്ക്​ തീർഥാടകരുടെ ഒരുമിച്ചുള്ള മടക്കവും ചില വിമാനങ്ങളുടെ വൈകലും കാരണമാണ് പ്രതിസന്ധി ഉടലെടുത്തത്.

മലയാളികളുൾപ്പെടെ നിരവധി തീർഥാടകർ ഏറെ ആശങ്കയിലായിരുന്നു. പലർക്കും മണിക്കൂറുകൾ വൈകിയാണ് യാത്ര ചെയ്യാനായത്. യാത്ര പോകേണ്ടുന്ന വിമാനത്തി​ന്‍റെ ബോഡിങ് പാസ് കിട്ടാതെയും വിമാനത്താവളത്തിന് അകത്ത് കയറാൻ പറ്റാതെയുമാണ്​ മിക്കവരും പുറത്തായി ദുരിതത്തിലായത്​. ചിലർക്ക് ലഗേജുകൾ ഇല്ലാതെ വിമാനത്തിൽ യാത്ര ചെയ്യേണ്ട അവസ്ഥയും ഉണ്ടായി. ഇപ്പോൾ പ്രശ്നങ്ങൾ പരിഹരിച്ച് ഏറെക്കുറെ ഷെഡ്യൂളുകൾക്ക്​ അനുസൃതമായി തന്നെ വിമാന സർവിസുകൾ നടക്കുന്നുണ്ട്​. സലാം എയർലൈൻസ്​ വിമാനത്തിൽ മസ്​കറ്റ്​ വഴി തിരുവനന്തപുരത്തേക്കുള്ള 23ഉം ഇൻഡിഗോ വിമാനത്തിൽ നേരിട്ട് കോഴിക്കോ​േട്ടക്ക്​ പോകേണ്ട 45ഉം യാത്രക്കാരാണ്​ പ്രതിസന്ധിയിലായവരിലെ മലയാളി തീർഥാടകർ. ചൊവ്വാഴ്​ച വൈകീട്ട്​ നാട്ടിലേക്ക്​ പോകേണ്ട ഇവർക്കെല്ലാം ബുധനാഴ്​ച രാത്രി വൈകിയും വ്യാഴാഴ്​ച പുലർച്ചെയുമായാണ്​ യാത്ര ചെയ്യാനായത്​.