വാഹനമോടിച്ച് ആശുപത്രിയിലേക്ക് പോകുന്നതിനിടെ ഹൃദയാഘാതം: കർണാടക സ്വദേശി ജുബൈലിൽ മരിച്ചു
text_fieldsജുബൈൽ: നെഞ്ചുവേദന അനുഭവപ്പെട്ടതിനെ തുടർന്ന് ആശുപത്രിയിലേക്ക് വാഹനമോടിച്ച് പോകുന്നതിനിടെ ഇന്ത്യക്കാരൻ സ്റ്റിയറിങിൽ കുഴഞ്ഞു വീണു മരിച്ചു. ജുബൈലിലെ പ്ലാൻറ് ടെക് അറബിയ ജനറൽ മാനേജർ കർണാടക സ്വദേശി മരിയൻ ആൽവിൻ മിസ് ക്വിത്ത് (65) ആണ് മരിച്ചത്. വ്യാഴാഴ്ച രാത്രി ഒമ്പത് മണിയോടെ തോളിൽ വേദന അനുഭവപ്പെട്ടതിനെ തുടർന്ന് ഭാര്യ എമിലിയ ാനയെയും കൂട്ടി ജുബൈലിലെ താമസ സ്ഥലത്തുനിന്ന് ഫാനാതീർ അൽ-മന ആശുപത്രിയിലേക്ക് പോവുകയായിരുന്നു.
വാഹനം ഓടിക്കുന്നതിനിടെ ഹൃദയാഘാതം വന്ന് കുഴഞ്ഞു വീണതിനെ തുടർന്ന് കാർ നിയന്ത്രണം വിട്ട് ഇടിച്ച് നിൽക്കുകയായിരുന്നു. അപകടം കണ്ട് ഓടിക്കൂടിയ സ്വദേശികൾ അദ്ദേഹത്തെ ആശുപത്രിയിലെത്തിച്ചപ്പോഴേക്കും മരണം സംഭവിച്ചിരുന്നു. അപകടത്തിൽ ഭാര്യ പരിക്കേൽക്കാതെ രക്ഷപ്പെട്ടു. ഇരുപത് വർഷം മുമ്പ് സൗദിയിൽ എത്തിയ ആൽവിൻ അനബീബ് കമ്പനിയിൽ പ്രൊജക്റ്റ് ലീഡർ ആയിട്ടാണ് തുടക്കം.
12 വർഷം മുമ്പ് പ്ലാൻറ് ടെക്ക് അറബിയ എന്ന സ്ഥാപനം ആരംഭിച്ചു. പെട്രോ കെമിക്കൽ പ്ലാൻറുകളിൽ ഷട്ട്ഡൗൺ ജോലികൾ കരാർ എടുത്ത് ചെയ്തിരുന്ന സ്ഥാപനം ആൽവിെൻറ നേതൃത്വത്തിൽ വളരെ വേഗം വളർന്നു. ആയിരത്തിലേറെ ജീവനക്കാരുള്ള കമ്പനി തൊഴിലാളികളോട് വളരെ നല്ല നിലയിലാണ് ഇടപെട്ടിരുന്നത്. കഴിഞ്ഞ വർഷം ജുബൈലിലെ വ്യവസായ കമ്പനിയിലെ ജോലിക്കിടെ പൊട്ടിത്തെറി ഉണ്ടാവുകയും പ്ലാൻറ് ടെക് അറബിയയുടെ എട്ട് തൊഴിലാളികൾ മരണപ്പെടുകയും ചെയ്തിരുന്നു. അന്ന് മരിച്ച എട്ടുപേരുടെയും വീടുകളിൽ ഇപ്പോഴും അവരുടെ ശമ്പളം കമ്പനി എല്ലാ മാസവും അയച്ചു കൊടുക്കുന്നുണ്ട്. കമ്പനിയുടെ ഈ തീരുമാനത്തിന് പിന്നിൽ ആൽവിൻ ആയിരുന്നു.
സ്വദേശികളും വിദേശികളുമുൾപ്പടെ വലിയൊരു സൗഹൃദ വലയം അദ്ദേഹം കാത്ത് സൂക്ഷിച്ചിരുന്നു. അൽ-മന ആശുപത്രിയിൽ സൂക്ഷിച്ച മൃതദേഹം നാട്ടിൽ കൊണ്ടുപോകുന്നതിനുള്ള നടപടികൾ ആരംഭിച്ചു. മക്കൾ : ഷാരോൺ ഫ്ളാവിയ, ഷാമിൻ, ഷോൺ. മരുമകൻ കെൽവിൻ അറോസ.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.