ആ കാവൽകാരനെ നിങ്ങൾക്ക്​ കാണാതിരിക്കാനാവില്ല

ജിദ്ദ: മക്ക ഹറമിൽ നൂറുക്കണക്കിന്​ സുരക്ഷ ഉദ്യോഗസ്​ഥർ വിവിധ ഭാഗങ്ങളിൽ  സേവന നിരതരായി രംഗത്തു​​ണ്ടെങ്കിലും അതിൽ നിന്നെല്ലാം വ്യത്യസ്​തമാണ്​ ഹജ്​റുൽ അസ്​വദിനരികിലെ കാവൽകാര​​​​െൻറ ഡ്യൂട്ടി. തിക്കും തിരക്കിനുമിടയിൽ, ​പ്രത്യേകിച്ച്​ റമദാൻ^ഹജ്ജ്​ സീസണുകളിൽ ഇവർ ചെയ്​തു കൊണ്ടിരിക്കുന്ന സേവനം ത്വവാഫിനിടയിൽ ആർക്കും കാണാതെ മുന്നോട്ടു നീങ്ങാൻ ​കഴിയുകയില്ല. ഹജ്​റുൽ അസ്​വദ്​ ചുംബിക്കാനും തൊടാനും വെമ്പൽ കൊള്ളുന്നവരെ തിരക്കിനിടയിൽ ഏറെ സാഹസപ്പെട്ട് നിയന്ത്രിക്കാനും തീർഥാടകരുടെ സുരക്ഷ ഉറപ്പാക്കാനും ശരിയായ രീതി കാണിച്ച​ുകൊടുക്കാനും നിർദേശങ്ങൾ നൽകാനും ഹജ്റുൽ അസ്​വദ് കേടുപാട്​ കൂടാതെ കാത്തു സൂക്ഷിക്കാനും ഇവർ പാടുപെടുന്നത്​ ശ്രദ്ധേയമാണ്​​. 

ചൂടും തണുപ്പും വക വെക്കാതെ അടിതെറ്റാതെ കഅ്​ബയിൽ കെട്ടിയ പ്രത്യേക കയറി​​​െൻറ താങ്ങിലാണ്​ ഹജ്​റുൽ അസ്​വദിനനടുത്ത്​ അൽപം ഉയരത്തിൽ പിടിച്ചു നിന്ന് ഇവർ ​ സേവന നിരതരാകുന്നത്​. റമദാൻ, ഹജ്ജ്​ സീസണുകളിലും വ്യാഴം, വെള്ളി ദിവസങ്ങളിലുമാണ് ഹജ്​റുൽ അസ്​വദിനടുത്ത് വലിയ തിരക്ക്​ അനുഭവപ്പെടാറുള്ളത്​​. ഇൗ സമയങ്ങളിൽ​ ആളുകളെ നിയന്ത്രിക്കാൻ ഇവർക്ക്​ കൂടുതൽ പാടുപെടേണ്ടി വരുന്നു. 

ഹജ്​റുൽ അസ്​വദ്​ ചുംബിക്കാനും തൊടാനുമെത്തുന്നവരെ നിയ​ന്ത്രിക്കുകയും സുരക്ഷ ഉറപ്പുവരുത്തുകയും മാത്രമല്ല, മറ്റുള്ളവർക്ക്​ കൂടി ഹജ്​റുൽ അസ്​വദ്​ ചുംബിക്കാൻ അവസരമൊരുക്കലും അവരെ സഹായിക്കലും ഇവരുടെ ജോലിയാണെന്ന്​ ഹറം സുരക്ഷ സേന വക്​താവ്​ കേണൽ റാഇദ്​ അൽസലമി പറഞ്ഞു. 
സ്​ഥലത്ത്​ ഏതെങ്കിലും തീർഥാടകർ അബോധാവസ്​ഥയിലാകുകയോ, വീഴുകയോ ചെയ്​താൽ ഉടനെ ബന്ധപ്പെട്ടവരെ വിവരമറിയിക്കുകയും വേണം. ജോലിയിൽ കൂടുതൽ ശ്രദ്ധ കേന്ദ്രീകരിക്കുന്നതിനും സേവനം മികച്ചതാക്കുന്നതിനും ഒരോ മണിക്കൂറിലും സുരക്ഷാ ഉദ്യോഗസഥരെ മാറ്റുന്നതായും ഹറം സുരക്ഷ സേന വക്​താവ്​ പറഞ്ഞു.