മലയാളിയെ കവർച്ച സംഘം ഇരുമ്പ്​ വടി കൊണ്ട്​ അടിച്ച്​ പരിക്കേൽപിച്ചു

 റിയാദ്​: കവർച്ച സംഘം മലയാളിയെ ഇരുമ്പ്​ വടി കൊണ്ട്​ അടിച്ച്​ പരിക്കേൽപിച്ചു. കെ.എം.സി.സി പ്രവര്‍ത്തകനായ ഓമാനൂര്‍ അശ്‌റഫിനെയാണ്​ ചൊവ്വാഴ്​ച വൈകീട്ട്​ ബത്ഹ ശാറ റെയിലിലെ റിയാദ്​ ബാങ്കിന്​ സമീപത്തെ ഗല്ലിയിൽ വെച്ച്​ നാലംഗ സംഘം ഇരുമ്പ്​ ദണ്ഡ്​ കൊണ്ട്​​ തലയിൽ അടിച്ച്​ പരിക്കേൽപിച്ച്​ പണം കവർന്നത്​. അസര്‍ നമസ്‌കാര സമയത്താണ്​ സംഭവം. 2,300 റിയാലാണ്​ കവര്‍ന്നത്. ബത്ഹ പൊലീസ് കേസെടുത്തു. ജോലി കഴിഞ്ഞ് താമസസ്ഥലത്തേക്ക് പോകുമ്പോള്‍ മുറിയുടെ വാതിലിന്​ അരുകിൽ വെച്ചാണ് അശ്‌റഫിനെ സംഘം പിടികൂടിയത്. പാൻറും ടീഷര്‍ട്ടും ധരിച്ച, അറബി സംസാരിക്കുന്ന കവർച്ചക്കാർ അശ്‌റഫിനെ ശരീരമാസകലം ഇരുമ്പുവടി കൊണ്ട് അടിക്കുകയായിരുന്നു. പഴ്‌സിലുണ്ടായിരുന്ന 2,300 റിയാല്‍ എടുത്ത ശേഷം ഇഖാമ വലിച്ചെറിഞ്ഞ് രക്ഷപ്പെട്ടു. തലയിൽ മാരക മുറിവേറ്റ അശ്​റഫിനെ രക്തമൊലിക്കുന്ന നിലയിൽ സുഹൃത്തുക്കള്‍ സഫാമക്ക പോളിക്ലിനിക്കിലെത്തിക്കുകയായിരുന്നു. പ്രാഥമിക ചികിത്സ നല്‍കിയ ശേഷം പൊലീസില്‍ വിവരമറിയിച്ചു. പൊലീസ് ആവശ്യപ്പെട്ട പ്രകാരം ശുമൈസി ആശുപത്രിയിലെത്തിച്ചു. തലയില്‍ 30 ലേറെ തുന്നലുണ്ട്. പിന്നീട് ബത്ഹ പൊലീസില്‍ ഹാജരാക്കി മൊഴി രേഖപ്പെടുത്തി.