ഡൊണാൾഡ് ട്രംപിനെ അഭിനന്ദിച്ച്​ സൽമാൻ രാജാവും കിരീടാവകാശിയും

റിയാദ്​: അമേരിക്കൻ പ്രസിഡൻറ് തെരഞ്ഞെടുപ്പിൽ വിജയിച്ച ഡൊണാൾഡ് ട്രംപിനെ സൗദി ഭരണാധികാരി സൽമാൻ രാജാവും കിരീടാവകാശി അമീർ മുഹമ്മദ് ബിൻ സൽമാനും അഭിനന്ദിച്ചു.

പ്രസിഡൻറ് തെരഞ്ഞെടുപ്പിൽ വിജയിച്ച ഈയവസരത്തിൽ ഡൊണാൾഡ് ട്രംപിന് ആത്മാർഥമായ അഭിനന്ദനങ്ങളും വിജയാശംസകളും നേരുന്നു. അമേരിക്കയിലെ ജനങ്ങൾക്ക്​ കൂടുതൽ പുരോഗതിയും സമൃദ്ധിയും ഉണ്ടാക​ുന്നതിന്​ ആശംസിക്കുന്നുവെന്നും​ അഭിനന്ദന സന്ദേശത്തിൽ സൽമാൻ രാജാവ്​ പറഞ്ഞു.

എല്ലാ മേഖലകളിലും ശക്തിപ്പെടുത്താനും വികസിക്കാനും ശ്രമിക്കുന്ന ഇരു രാജ്യങ്ങളും ജനങ്ങളും തമ്മിൽ നിലനിൽക്കുന്ന ചരിത്രപരമായ ഉറ്റ ബന്ധത്തി​െൻറ മികവിനെ സൽമാൻ രാജാവ്​ പ്രശംസിച്ചു.

കിരീടാവകാശി അമീർ മുഹമ്മദ് ബിൻ സൽമാനും ഡൊണാൾഡ് ട്രംപിന് അഭിനന്ദനങ്ങൾ അറിയിച്ചു. ചൊവ്വാഴ്ച നടന്ന തെരഞ്ഞെടുപ്പ്​ വിജയത്തി​ലൂടെ അമേരിക്കയുടെ 47-ാമത് പ്രസിഡൻറായി വൈറ്റ് ഹൗസിലേക്കുള്ള ‘ചരിത്രപരമായ തിരിച്ചുവരവ്’ അടയാളപ്പെടുത്തിയിരിക്കയാണ്​ റിപ്പബ്ലിക്കൻ സ്ഥാനാർഥി ഡൊണാൾഡ് ട്രംപ്.