സൗദി ആണവോര്‍ജ നയത്തിന് മന്ത്രിസഭയുടെ അംഗീകാരം

റിയാദ്: സമാധാന ആവശ്യത്തിന് ആണവോർജം എന്ന തത്വത്തിലൂന്നി രാഷ്​ട്രത്തി​​​െൻറ ആണവ നയത്തിന് സൗദി മന്ത്രിസഭ അംഗീകാരം നല്‍കി. സല്‍മാന്‍ രാജാവി​​​െൻറ അധ്യക്ഷതയില്‍ തലസ്ഥാനത്തെ അല്‍യമാമ കൊട്ടാരത്തില്‍ ചൊവ്വാഴ്ച ചേര്‍ന്ന മന്ത്രിസഭ യോഗമാണ് ഊർജ പ്രതിസന്ധിക്ക് പരിഹാരം കാണാനുള്ള തീരുമാനത്തിന് അംഗീകാരം നല്‍കിയത്. പെട്രോളിതര ഊർജ സ്രോതസ്​ കണ്ടെത്തുക എന്ന ലക്ഷ്യത്തോടെയാണ് രാജ്യത്ത് ആണവ നിലയങ്ങള്‍ സ്ഥാപിക്കാന്‍ തീരുമാനിച്ചത്.

സൗദി ഊർജ, വ്യവസായ മന്ത്രി എൻജി. ഖാലിദ് അല്‍ഫാലിഹ് സമര്‍പ്പിച്ച കരടിന് മന്ത്രിസഭ അംഗീകാരം നല്‍കുകയായിരുന്നു. ഏതാനും നിബന്ധനകളുടെയും വ്യവസ്ഥകളുടെയും അടിസ്​ഥാനത്തിലാണ്​ ആണവ നയം രൂപപ്പെടുത്തിയിട്ടുള്ളത്. എല്ലാ ആണവ പദ്ധതികളും സമാധാന ആവശ്യത്തിന് മാത്രമായി പരിമിതപ്പെടുത്തുക, ആണവ പരിപാടികളില്‍ സുതാര്യത കാത്തുസൂക്ഷിക്കുക എന്നിവക്ക്​ പുറമേ, ആണവ നിലയങ്ങളുടെ സ്വതന്ത്ര നിരീക്ഷണം, റേഡിയേഷന്‍ പോലുള്ള പ്രശ്​നങ്ങളില്‍ നിന്നുള്ള സുരക്ഷ, ആണവ അസംസ്കൃത വസ്തുക്കളുടെ മാതൃകാപരമായ ഉപയോഗം, ആണവ മാലിന്യത്തി​​​െൻറ കാര്യക്ഷമവും അന്താരാഷ്​ട്ര മാനദണ്ഡം അനുസരിച്ചുമുള്ള കൈകാര്യം എന്നിവ ഉറപ്പുവരുത്തണം എന്നതാണ്​ മന്ത്രിസഭ നിശ്ചയിച്ച നിബന്ധനകള്‍. ആണവ നിലയങ്ങളുടെ മേല്‍നോട്ടം, സ്വതന്ത്ര നിരീക്ഷണം, റേഡിയേഷന്‍ തടയല്‍ തുടങ്ങിയവക്കുള്ള പ്രത്യേക സഭ രൂപീകരിക്കാനും മന്ത്രിസഭ അംഗീകാരം നല്‍കി.