നോട്ട്​ പെട്ടി സി.പി.എം അന്വേഷിച്ചോ​ട്ടെ; ഞങ്ങളുടെ ലക്ഷ്യം വോട്ടുപെട്ടി -മാത്യു കുഴൽനാടൻ എം.എൽ.എ

ദമ്മാം: ജനകീയ വിഷയങ്ങൾ ചർച്ച ​ചെയ്യാൻ മടിക്കുന്ന ഇടതുപക്ഷം വ്യാജ തിരക്കഥയുണ്ടാക്കി നോട്ട്​ പെട്ടികളുടെ പിറകെ കൂടിയിരിക്കുകയാണെന്ന്​ മാത്യു കുഴൽനാടൻ എം.എൽ.എ ആരോപിച്ചു. ഒ.ഐ.സി.സി സൗദി ദേശീയ പ്രസിഡൻറായിരുന്ന പരേതനായ പി.എം. നജീബി​െൻറ സ്​മരണാർഥം ദമ്മാം റീജനൽ കമ്മിറ്റി സംഘടിപ്പിച്ച പി.എം. നജീബ് എജ​ുക്കേഷനൽ ​മെറിറ്റ്​ അവാർഡ്​ ചടങ്ങ്​ ഉദ്​ഘാടനം ചെയ്യാൻ ദമ്മാമിലെത്തിയ അദ്ദേഹം മാധ്യമങ്ങളോട്​ സംസാരിക്കുകയായിരുന്നു.

ഇടതുപക്ഷത്തി​െൻറ ജനവിരുദ്ധ ഭരണം മടുത്ത ജനങ്ങൾ കോൺഗ്രസിന്​ നൽകുന്ന പിന്തുണ കണ്ട്​ വിറളിപടിച്ചാണ്​ ഈ നാടകങ്ങളൊക്കെ സൃഷ്​ടിക്കുന്നത്​. എന്നാൽ ഇതിലെല്ലാം സ്വയം അപഹാസ്യരാകാനാണ്​ അവരുടെ വിധിയെന്ന്​ അദ്ദേഹം പരിഹസിച്ചു. കൊടകര കള്ളപ്പണ്ണ ​കേസിൽ സുരേന്ദ്രന്​ അനുകൂലമായ നിലപാടുകൾ സ്വീകരിച്ചതിനുള്ള പ്രത്യുപകാരമാണ്​ മുഖ്യമന്ത്രിയുടെ മകൾ വീണക്ക്​ ഇപ്പോൾ ലഭിച്ചുകൊണ്ടിരിക്കുന്നത്​.

കേന്ദ്ര ഏജൻസികൾ ഇവരോട്​ മൃദുസമീപനം സ്വീകരിക്കുന്നത്​ ഇത്തരം കൊടുക്കൽ വാങ്ങലുകളുടെ പ്രതിഫലമായാണ്​. എഡി.ജി.പി റാങ്കിലുള്ള പൊലീസിനെ ഉപയോഗിച്ച്​ പൂരം കലക്കിയതും തൃശുർ വിജയം ബി.ജെ.പിക്ക്​ താലത്തിൽ വെച്ച്​ നൽകിയതും ഇത്​ കൂടുതൽ വ്യക്തമാക്കുന്നു. ബി.ജെ.പി ഇടതുബാന്ധവം തുടങ്ങിയിട്ട്​ കാലമേറെയായെങ്കിലും ഇപ്പോഴത്​ കൂടുതൽ തെളിവോടെ പുറത്തുവന്നിരിക്കുന്നു. പാലക്കാട്​ ബി.ജെ.പിയെ ജയിപ്പിക്കാൻ സ്വന്തം രാഷ്​ട്രീയ വിശ്വാസങ്ങളെ സി.പി.എം കുരുതികൊടുക്കുമോ എന്ന സംശയത്തിലാണ്​ തങ്ങൾ ഇപ്പോഴെന്നും അത്​ കൂടുതൽ സൂക്ഷ്​മതയോടെ നിരീക്ഷിച്ച്​ വരികയാണെന്നും അദ്ദേഹം പറഞ്ഞു.

ഇത്തവണത്തെ മൂന്ന്​ ഉപതെരഞ്ഞെടുപ്പുകളെ ഏറെ ആത്​മ വിശ്വാസത്തോടെയാണ് യു.ഡി.എഫ്​​ സമീപിക്കുന്നത്​. വയനാട്​ രാഹുൽ ഗാന്ധിയേക്കാൾ ഭൂരിപക്ഷത്തിലായിരിക്കും പ്രിയങ്കയുടെ ജയം. പാലക്കാട്​ സ്വന്തമായി സ്ഥാനാർഥിയെപ്പോലും കണ്ടെത്താൻ കഴിയാത്ത ഇടതുപക്ഷത്തിന്​ പ്രസക്തിയില്ല. അവിടെ മത്സരം ബി.ജെ.പിയുമായാണ്​. ​ചേലക്കരയിൽ 28 കൊല്ലമായി ഇടതുപക്ഷം ജയിക്കുന്ന മണ്ഡലമാണ്​. പക്ഷെ ഇത്തവണ സഖാക്കൾ പോലും കോൺഗ്രസിന്​ ഒപ്പം നിന്ന്​ പ്രതീക്ഷ പകരുകയാണെന്നും​ ചേലക്കര തെരഞ്ഞെടുപ്പ് പ്രചാരണ​ ചുമതല വഹിക്കുന്ന കുഴൽനാടൻ പറഞ്ഞു. അഹമ്മദ്​ പുളിക്കൻ, ബിജു കല്ലുമല, ഇ.കെ. സലീം, ശിഹാബ്​ കായംകുളം, പ്രമോദ് ​പൂപ്പാല എന്നിവരും വാർത്താസമ്മേളനത്തിൽ പ​ങ്കെടുത്തു.