പീഡനപർവത്തിൽനിന്ന് മോചനം; അരുൺ രാജും അനീഷും നാടണഞ്ഞു

റിയാദ്: കുടിവെള്ള വിതരണക്കമ്പനിയിലെത്തി സൗദി അറേബ്യയിൽ ദുരിതത്തിലായ മലയാളി യുവാക്കൾ സാമൂഹിക പ്രവർത്തകരുടെ തുണയിൽ നാടണഞ്ഞു. വൻതുക ചെലവഴിച്ച്​ ട്രാവൽ ഏജൻസി വഴി​ വിസ തരപ്പെടുത്തി സൗദി മധ്യ​ പ്രവിശ്യയിലെ വാദി ദവാസിറിൽ എത്തിയ തിരുവനന്തപുരം കാട്ടാക്കട സ്വദേശി അരുൺ രാജും കൊല്ലം കൊട്ടാരക്കര സ്വദേശി അനീഷും ഒന്നര വർഷം നീണ്ട പീഡനപർവത്തിൽനിന്ന്​ രക്ഷപ്പെട്ടാണ്​ നാട്ട​ിലേക്ക്​ മടങ്ങിയത്​. ഇന്ത്യൻ സോഷ്യൽ ഫോറം വളൻറിയർമാരാണ്​ ഇതിന്​ ഇവരെ സഹായിച്ചത്​. മൂന്നര വർഷം മുമ്പാണ് വാദി ദവാസിറിലെ സ്വകാര്യ കുടിവെള്ള കമ്പനിയിലേക്ക് എത്തിയത്. ആദ്യ രണ്ടു വർഷക്കാലത്തോളം ജോലിയും ശമ്പളവും ലഭിച്ചിരുന്നതായി അരുൺരാജും അനീഷും പറഞ്ഞു.

എന്നാൽ, തുടർന്ന്​ ഒന്നര വർഷത്തോളം ജോലിയും ശമ്പളവുമില്ലാതെ താമസസ്ഥലത്ത് കഴിച്ചുകൂ​േട്ടണ്ടിവന്നു. മാത്രമല്ല, മൂന്നു വർഷമായിട്ടും ഇരുവർക്കും ഇഖാമയോ മറ്റു രേഖകളോ കമ്പനി എടുത്തുനൽകിയിരുന്നില്ല. കമ്പനി ഉടമയിൽനിന്ന്​ ഒരു സഹായവും കിട്ടാത്തതിനെ തുടർന്ന്​ ജീവിതച്ചെലവിനു പോലും മറ്റുള്ളവരെ ആശ്രയിക്കേണ്ടതായിവന്നു. ഇന്ത്യൻ സോഷ്യൽ ഫോറം പ്രവർത്തകരുടെയും മറ്റു സുമനസ്സുകളുടെയും സഹായത്തിലാണ്​ ഒന്നര വർഷത്തോളം ഇരുവരും കഴിഞ്ഞുപോന്നത്. അതിനിടെ അനീഷി​െൻറ സഹോദരി അസുഖം ബാധിച്ചു കിടപ്പായതോടെ അവരെ ശുശ്രൂഷിക്കാൻ മറ്റാരുമില്ലാത്തതിനാൽ നാട്ടിലെത്താൻ സഹായിക്കണമെന്ന് കമ്പനി അധികൃതരോട് അപേക്ഷിച്ചെങ്കിലും വിഫലമാവുകയായിരുന്നു.

ദുരിതക്കയത്തിലായ അരുൺ രാജി​‍െൻറയും അനീഷി​െൻറയും പ്രശ്​നത്തിൽ ഫോറം വാദി ദവാസിർ ഘടകം ഇടപെട്ട് നിയമപരമായി പ്രശ്​നം കൈകാര്യം ചെയ്യാൻ തയാറായപ്പോൾ ഇരുവർക്കുമെതിരെ കള്ളക്കേസ് കൊടുത്ത്​ ദ്രോഹിക്കുകയായിരുന്നു കമ്പനി. ഇഖാമ എടുത്തുനല്‍കാന്‍ കോടതി ആവശ്യപ്പെട്ടിട്ടും സ്പോൺസര്‍ തയാറാകാതെ വന്നപ്പോള്‍ കോടതി ഇടപെട്ട്​ സ്പോൺസറുടെ എല്ലാ ഗവൺമെൻറ്​ സർവിസുകളും നിര്‍ത്തിവെക്കുകയായിരുന്നു. പിന്നീട് സ്പോൺസറുടെ മകനുമായി സോഷ്യല്‍ ഫോറം വെല്‍ഫെയര്‍ ഇന്‍ ചാര്‍ജ് ലത്തീഫ് മാനന്തേരി സംസാരിക്കുകയും പ്രശ്​നം ഒത്തുതീര്‍പ്പാക്കുകയും ഇരുവർക്കും വിസ കാൻസൽ ചെയ്​ത്​ സ്വദേശത്തേക്കു തിരിച്ചുപോകാനുള്ള രേഖകൾ ശരിയാക്കി നല്‍കുകയുമായിരുന്നു. അതോടൊപ്പം നാലു മാസത്തെ ശമ്പള കുടിശ്ശികയും വിമാന ടിക്കറ്റും നൽകാൻ കമ്പനി തയാറാവുകയും ചെയ്​തു. ദുരിതക്കയത്തിൽനിന്ന് മോചിതരായി കഴിഞ്ഞദിവസമാണ് റിയാദ് വിമാനത്താവളത്തില്‍നിന്ന്​ തിരുവനന്തപുരത്തേക്കുള്ള എയര്‍ ഇന്ത്യ എക്​സ്​പ്രസ്​ വിമാനത്തില്‍ യുവാക്കൾ യാത്രയായത്. ഫോറം ബ്ലോക്ക്‌ ജോയൻറ്​ സെക്രട്ടറി അബ്​ദുല്‍ ലത്തീഫ് കരുനാഗപ്പള്ളിയും അവരോടൊപ്പം യാത്രയില്‍ അനുഗമിച്ചു.