മെസ്സി റിയാദിൽ

റിയാദ്​: സൗദിയിൽ ഞാൻ പ്രതീക്ഷിക്കാത്ത ചിലത് എപ്പോഴും കണ്ടെത്താറുണ്ടെന്ന്​ ലോകപ്രശസ്​ത ഫുട്​ബാൾ താരം ലയണൽ മെസ്സി. ഈ മാസം 29ന്​ റിയാദിൽ തുടങ്ങുന്ന റിയാദ്​ സീസൺ കപ്പ്​ ടൂർണമെൻറിൽ പ​ങ്കെടുക്കാൻ അമേരിക്കൻ ടീമായ ഇൻറർ മിയാമിക്കൊപ്പം റിയാദിലെത്തിയതായിരുന്നു അദ്ദേഹം.

സൗദി ടൂറിസം അംബാസഡർ കൂടിയായ മെസ്സി ശേഷം ഇൻസ്​റ്റാഗ്രാമിൽ പങ്കുവച്ച വീഡിയോയിലാണ്​ ഇക്കാര്യം പറഞ്ഞത്​. സൗദി അറേബ്യയിലേക്കുള്ള ത​െൻറ യാത്രക​ളെ ഇഷ്​ടപ്പെടാനുള്ള കാരണം പ്രതീക്ഷിക്കാത്തത് എപ്പോഴും അവിടെ കണ്ടെത്തുന്നു എന്നത് കൊണ്ടാണ്. നിങ്ങൾ അടുത്തിടെ സൗദി അറേബ്യ സന്ദർശിച്ചിട്ടുണ്ടെങ്കിൽ നിങ്ങളുടെ അനുഭവവും അതിൽ നിങ്ങൾക്ക് പ്രത്യേകിച്ചും ഇഷ്​ടപ്പെട്ട കാര്യങ്ങളും പങ്കിടണമെന്നും മെസി പറഞ്ഞു.

റിയാദ് സീസൺ കപ്പ് ടൂർണമെൻറിൽ പങ്കെടുക്കാൻ വ്യാഴാഴ്ചയാണ്​ മെസ്സി റിയാദിലെത്തിയത്​. അൽഹിലാൽ, അൽ നസ്​ർ ടീമുകൾക്കൊപ്പം റിയാദ് സീസൺ കപ്പിനായി മത്സരിക്കാനാണ്​ മെസ്സിയുടെ നേതൃത്വത്തിലുള്ള അമേരിക്കൻ ഇൻറർമിയാമി സംഘം റിയാദിലെത്തിയിരിക്കുന്നത്​. 29ന് നടക്കുന്ന ആദ്യ മത്സരത്തിൽ ഇൻറർ മിയാമി സൗദി എതിരാളി അൽ ഹിലാലിനെ നേരിടും. ഫെബ്രുവരി ഒന്നിന് നടക്കുന്ന ‘ദി ലാസ്റ്റ് ഡാൻസ്’ എന്ന അൽനസ്​ർ-ഇൻറർ മിയാമി പോരാട്ടത്തിൽ മെസ്സിയും ക്രിസ്​റ്റ്യാനോ റൊണാൾഡോയും മുഖാമുഖം എറ്റുമുട്ടും.

കുടുംബത്തോടൊപ്പം മെസ്സി മാസങ്ങൾക്ക്​ മുമ്പ്​​ റിയാദിലെ പൗരാണിക നഗരിയായ ദറഇയ സന്ദർശിച്ചിരുന്നു. അന്ന്​ ടൂറിസം മന്ത്രി അഹമ്മദ് അൽ ഖത്തീബ് മെസ്സിയെ സ്വാഗതം ചെയ്തത്​ ശ്രദ്ധേയമായിരുന്നു. സൗദി അറേബ്യയിലേക്കുള്ള രണ്ടാമത്തെ ടൂറിസ്​റ്റ്​ യാത്രയിൽ സൗദി ടൂറിസം അംബാസഡർ ലയണൽ മെസ്സിയെയും കുടുംബത്തെയും സ്വാഗതം ചെയ്യുന്നതായാണ്​ അന്ന്​ സൗദി ടൂറിസം മന്ത്രി പറഞ്ഞത്​. 2022ലാണ്​ മെസ്സി സൗദി ടൂറിസത്തി​െൻറ അംബാസഡറായത്​. ആ സമയത്ത്​​ മെസ്സി ജിദ്ദയിലെ ചരിത്രമേഖലയിൽ പര്യടനം നടത്തുകയും ചെങ്കടലിൽ വിനോദ സഞ്ചാരം നടത്തുകയും ചെയ്തിരുന്നു.