വികസനത്തിന്​ വേഗമേകാൻ മക്ക റോയൽ കമീഷൻ

ജിദ്ദ: ‘മക്ക, മശാഇർ റോയൽ കമീഷൻ’ രൂപവത്​കരിക്കാനുള്ള രാജകൽപന മക്കയിലേയും പുണ്യസ്​ഥലങ്ങളായ മിന, അറഫ, മുസ്​ദലിഫ എന്നിവിടങ്ങളിലേയും വികസനവും തീർഥാടകർക്കുള്ള സേവനങ്ങളും കൂടുതൽ മികച്ചതും കാര്യക്ഷമവുമാക്കും. മക്കയിലെ താമസക്കാർക്കും അവിടെയത്തുന്ന തീർഥാടകർക്കും ഒരുപോലെ സന്തോഷം നൽകുന്നതാണ്​ രാജകൽപന. മക്കയുടെ വി​ശുദ്ധിയും ഒൗന്നത്യവും നിലനിർത്തി​​ വികസനത്തിന്​ കൂടുതൽ ഉൗന്നൽ നൽകി തീർഥാടകർക്കുള്ള സേവനം മികച്ചതാക്കുക ലക്ഷ്യമിട്ടാണ്​ ‘മക്ക, മശാഇർ റോയൽ കമീഷൻ’ രൂപവത്​കരിക്കുന്നത്​.

ലോക മുസ്​ലിംകളുടെ പുണ്യകേന്ദ്രം സ്​ഥിതി ചെയ്യുന്ന മക്കക്ക്​ സൗദി ഭരണകൂടം നൽകിവരുന്ന വലിയ ​ശ്രദ്ധയും പ്രധാന്യവുമാണ്​ ഇത്​ വ്യക്​തമാക്കുന്നത്​. സൗദി സ്​ഥാപക ഭരണാധികാരിയായിരുന്ന അബ്​ദുൽ അസീസ്​ രാജാവി​​​െൻറ കാലം മുതൽ ഇന്നോളം നിരവധി വികസന പ്രവർത്തനങ്ങൾക്കാണ്​ മക്കയും മശാഇറുകളും സാക്ഷ്യം വഹിച്ചത്​.​ ഒരോ ബജറ്റിലും ഭീമമായ സംഖ്യയാണ്​ മക്കയുടെയും പുണ്യസ്​ഥലങ്ങളുടെയും വികസനത്തിനും അവിടെയെത്തുന്ന തീർഥാടകരുടെ സേവനത്തിനും നീക്കിവെക്കുന്നത്​. പിന്നിട്ട ഒരോ ഭരണാധികാരികളുടെയും കാലത്ത്​​ നിരവധി വൻ പദ്ധതികൾ നടപ്പാക്കി​.

തീർഥാടക സേവനം എളുപ്പവും മികച്ചതുമാക്കുന്നതിലും ഹജ്ജ്​, ഉംറ സീസണുകളിലെ വിജയത്തിനും ഇൗ പദ്ധതികൾ വലിയ സഹായകമായിട്ടുണ്ട്​. സൽമാൻ രാജാവി​​​െൻറ ഭരണകാലത്തും മക്കയിലും പുണ്യസ്​ഥലങ്ങളിലും വികസനം തുടരുകയാണ്​. നേരത്തെ നടപ്പാക്കിവരുന്ന പദ്ധതികൾ പൂർത്തിയാക്കുന്നതോടൊപ്പം പുതിയ നിരവധി പദ്ധതികളാണ്​ ആസൂത്രണം ചെയ്യുന്നത്​.  മക്കയുടെ മുഖഛായ മാറ്റുന്ന പദ്ധതികളാണ് ഒരോന്നും​.

മത്വാഫ്​ വികസനം, ഹറം വടക്ക്​ അങ്കണം വികസനം, മക്കയിലെ പുരാതന ഡിസ്​ട്രിക്​റ്റുകളുടെ വികസനം, അൽഹറമൈൻ റെയിൽവേ പദ്ധതി, മക്ക പൊതുഗതാഗത പദ്ധതി എന്നിവ ഇതിൽ എടുത്തുപറയേണ്ടവയാണ്​. മക്ക, മശാഇർ റോയൽ കമീഷൻ നിലവിൽ വരുന്നതോടെ മക്കയും മിന, അറഫ, മുസ്​ദലിഫ എന്നീ പുണ്യസ്​ഥലങ്ങളും വമ്പിച്ച പുരോഗതിയിലേക്ക്​ ഇനിയും കുതിക്കുമെന്നും തീർഥാടകർക്കെന്ന പോലെ ഇരു പട്ടണങ്ങളിലെ താമസക്കാർക്കും ഇതി​​​​െൻറ നേട്ടങ്ങൾ അനുഭവിക്കാൻ കഴിയുമെന്നാണ്​ വിലയിരുത്തപ്പെടുന്നത്​.

ഉന്നത നിലവാരത്തിലുള്ള സേവനങ്ങൾ അവിടെയെത്തുന്ന ഹജ്ജ്​ ഉംറ തീർഥാടകർക്ക്​ ലഭ്യമാക്കാനും​ പുതിയ രാജകൽപന സഹായകമാകും. 
മൂന്ന്​ മാസം കൊണ്ട്​ ആവശ്യമായ നടപടികൾ പൂർത്തിയാക്കി കമീഷൻ നിലവിൽ വരണമെന്നാണ്​ തീരുമാനം. മന്ത്രി സഭാ ഉപാധ്യക്ഷ​​​െൻറ മേൽനോട്ടത്തിലായിരിക്കും കമീഷൻ പ്രവർത്തിക്കുക.

അംഗങ്ങളെ നിശ്ചയിക്കാനുള്ള അധികാരം മന്ത്രി സഭാ അധ്യക്ഷനാണ്​.മക്ക മേഖല ഗവർണർ, ആഭ്യന്തര മന്ത്രി, മക്ക മേഖല അസിസ്​റ്റൻറ്​ ഗവർണർ, ഡോ. മാജിദ്​ ബിൻ അബ്​ദുല്ല അൽഖസബി, ഹജ്ജ്​ ഉംറ മന്ത്രി,  സാമ്പത്തിക, ആസൂത്രണ മന്ത്രി മന്ത്രി, പ്രൊഫ.യാസിർ ബിൻ ഉസ്​മാൻ അൽറുമയാൻ, എൻജിനീയർ ഇബ്രാഹിം ബിൻ മുഹമ്മദ്​ അൽസുൽത്താൻ, ഡോ. ഫഹദ്​ ബിൻ അബ്​ദുല്ല തൂനിസി എന്നിവരെ കമീഷനിൽ അംഗങ്ങളാക്കി കൽപന പുറപ്പെടുവിച്ചിട്ടുണ്ട്​.