റിയാദിൽ പുതിയ വിസയിലെത്തിയ മലയാളി കുഴഞ്ഞു വീണു മരിച്ചു

റിയാദ്​: പുതിയ തൊഴിൽ വിസയിലെത്തിയ മലയാളി കുഴഞ്ഞുവീണു മരിച്ചു. കഴിഞ്ഞ മാസം വീട്ടുജോലിക്കാര​​​​െൻറ വിസയിൽ വന്ന തൃശൂർ അഴീക്കോട്​ ജെട്ടി സ്വദേശി കൊല്ലം പറമ്പിൽ നൗഷാദാണ്​ (46) മലസിലെ താമസ സ്ഥലത്ത്​ വെള്ളിയാഴ്​ച രാവിലെ മരിച്ചത്​. 

നേരത്തെ സൗദിയിൽ ജോലി ചെയ്​തിരുന്ന ഇദ്ദേഹം പ്രവാസം അവസാനിപ്പിച്ചുപോയി വർഷങ്ങൾക്ക്​ ശേഷം വീണ്ടും ഉപ​ജീവനം തേടി എത്തിയതാണ്​. ഇഖാമക്ക്​ പോലും അപേക്ഷിച്ചിരുന്നില്ല. അപേക്ഷയോടൊപ്പം ഹാജരാക്കാന​ുള്ള മെഡിക്കൽ പരിശോധന റിപ്പോർട്ടിന്​ വേണ്ടി മലസിലെ ഒരു ക്ലിനിക്കിൽ പോയി മുറിയിൽ തിരിച്ചെത്തിയ ഉടനെയാണ്​ കുഴഞ്ഞുവീണത്​. മൃതദേഹം ശുമൈസി ആശുപത്രി മോർച്ചറിയിൽ. ​കൊല്ലം പറമ്പിൽ അബുവാണ്​ പിതാവ്​. സഫിയ അബു മാതാവും. ഭാര്യ: ആബിദ നൗഷാദ്​. മക്കൾ: അൻഷാദ്​, അൻസിത. മരുമകൻ: താജുദ്ദീൻ. സഹോദരങ്ങൾ: നസീർ, റാഫി, മനാഫ്​, ആബിദ. 

തിങ്കളാഴ്​ച വൈകീട്ട്​ ഇത്തിഹാദ്​ വിമാനത്തിൽ മൃതദേഹം കൊച്ചിയിലേക്ക്​ കൊണ്ടു പോകും. കെ.എം.സി.സി ഭാരവാഹികളായ തെന്നല മൊയ്​തീൻ കുട്ടി, കബീർ വൈലത്തൂർ എന്നിവർ മരണാനന്തര നടപടി​ക്രമങ്ങൾക്ക്​ നേതൃത്വം നൽകി.