മലയാളി ഹാജിമാർ പുണ്യഭൂമിയിൽ; ആദ്യ വിമാനത്തിൽ 410 പേർ

ജിദ്ദ​/മക്ക: മലയാളി ഹാജിമാരുടെ ആദ്യ സംഘം മക്കയിലെത്തി. ബുധനാഴ്​ച രാവിലെ 8.30 ഒാടെയാണ്​ നെടുമ്പാശേരിയിൽ നിന്നുള്ള സൗദി എയർലൈൻസ്​ വിമാനം 410 തീർഥാടകരുമായി ജിദ്ദയിൽ ഇറങ്ങിയത്​.  മൂന്നുമണിക്കൂർ വൈകിയാണ്​ വിമാനം എത്തിയത്​. ഇവരെ ജിദ്ദയിലെ ഇന്ത്യൻ കോൺസൽ ജനറൽ മുഹമ്മദ്​ നൂർ റഹ്​മാൻ ശൈഖി​​​െൻറ നേതൃത്വത്തിൽ സ്വീകരിച്ചു. കോൺസൽ അനന്ത്​കുമാർ, കോൺസുലേറ്റ്​ ഉദ്യോഗസ്​ഥരായ ബോബി മാനാട്ട്​, മാജിദ്​ എന്നിവരും നിരവധി സംഘടനാപ്രമുഖരും സ്വീകരിക്കാൻ എത്തിയിരുന്നു.

എട്ടുമാസം മാത്രം പ്രായമുള്ള ഫാത്തിമ ഷാസയാണ്​ ഏറ്റവും പ്രായം കുറഞ്ഞ തീർഥാടക. നടപടിക്രമങ്ങൾ പൂർത്തീകരിച്ച്​ സംഘം മക്കയിലേക്ക്​ പോയി. ഉച്ചക്ക്​ 12 മണിയോടെ മക്കയിലെത്തി. ഹജ്ജ്​ കോൺസൽ ശാഹിദ്​ ആലമും മിഷൻ ഉദ്യോഗസ്ഥരും വിവിധ സംഘടന വളണ്ടിയർമാരും സ്വീകരിക്കാൻ എത്തിയിരുന്നു. അസീസിയ കാറ്റഗറിയിലുള്ള ഹാജിമാർക്ക്​ ആറ്​, ഏഴ്​ ബ്രാഞ്ചുകളിലാണ്​ താമസമൊരുക്കിയത്​. ചെറുവിശ്രമത്തിന്​ ശേഷം ഇവർ ഉംറക്കായി മസ്​ജിദുൽ ഹറാമിലേക്ക്​ പോയി. ആദ്യദിവസം രണ്ടുവിമാനങ്ങളാണ്​ ജിദ്ദയിൽ എത്തിയത്​.

ഇന്ത്യയിൽ നിന്നുള്ള ആദ്യസംഘം ജൂലൈ 14 ന്​ ന്യൂഡൽഹിയിൽ നിന്ന്​ മദീനയിൽ എത്തിയിരുന്നു. രണ്ടാഴ്​ചത്തെ മദീന വാസത്തിന്​ ശേഷം അവർ മക്കയിലേക്ക്​ വന്നുതുടങ്ങിയിട്ടുണ്ട്​. ജിദ്ദയിലേക്കുള്ള ആദ്യ വിമാനം ചെന്നൈയിൽ നിന്ന്​ ഞായറാഴ്​ചയായിരുന്നു. ഇത്തവണ കൊച്ചി അടക്കം 11 എംബാർക്കേഷന്‍ പോയിൻറുകളിൽ നിന്നുള്ള ഹാജിമാരാണ്‌ ജിദ്ദയില്‍ എത്തുന്നത്.