ആർദ്ര സംഗീതാനുഭവം പകർന്ന്​ മലയാളി സമാജം 'ഗസൽ രാവ്​'

ദമ്മാം: സൗദി മലയാളി സമാജം ദമ്മാം ഘടകം ഒരുക്കിയ 'ഗസൽരാവ്' ആർദ്രസംഗീതത്തിന്റെ മാസ്മരികാനുഭവം സമ്മാനിച്ചു. മഹാമാരിയുടെ ഭീതിദമായ നാളുകളിൽനിന്ന് മുക്തമായിക്കൊണ്ടിരിക്കുന്ന സാഹചര്യത്തിൽ, സമാജം ഒരുക്കിയ കഥാസന്ധ്യക്കും കാവ്യസന്ധ്യക്കും ശേഷമാണ്​ 'ഗസൽ രാവ്​ അരങ്ങേറിയത്​​. എഴുത്തും വായനയും സംഗീതവും സിനിമയും ഇഷ്ടപ്പെടുന്ന കിഴക്കൻ പ്രവിശ്യയിലെ കലാസ്നേഹികൾക്കായി ഒരുക്കിയ ഗസൽരാവ്​ ആസ്വാദകർക്ക്​ ഏറെ ഹൃദ്യവും അവിസ്മരണീയവുമായി.

അതിഥികളായി പ​​ങ്കെടുത്ത സുബൈർ ഉദിനൂർ, പ്രവീൺ വല്ലത്ത്​, മൂസക്കോയ, ഹലീം ഡൽഹി എന്നിവർ സംസാരിച്ചു. ഖദീജ ഹബീബിന്റെ നേതൃത്വത്തിൽ നടന്ന 'മധുരം മലയാളം' മത്സരത്തിൽ നിരവധിപേർ പ​​ങ്കെടുത്തു. ​ശേഷം നടന്ന ഗസൽ മഴക്ക്​ റഊഫ്​ ചാവക്കാട്​ നേതൃത്വം നൽകി. ലതാ മങ്കേഷ്‌കർക്ക് ശ്രദ്ധാഞ്ജലിയർപ്പിച്ച്​ അവരുടെ എക്കാലത്തെയും സൂപ്പർ ഹിറ്റായ​ 'ലഗ്​ജാദലേ...' എന്ന ഗാനമാലപിച്ചുകൊണ്ടായിരുന്നു ഗസൽ രാവിന്റെ തുടക്കം.

റഊഫ്​ അണ്ടത്തോട്​, അരവിന്ദ്​ വടകര, ​പ്രമോദ്​ പൊന്നാനി, ഷെബീർ കേച്ചേരി, അനസ്​, ഷിബിൻ ആറ്റുവ, എം.സി. വിനോദ്​ എന്നിവർ ഗസലുകൾ ആലപിച്ചു. അസ്​ഹറുദ്ദീൻ, ആതിര ലിയോ എന്നിവർ കവിതകൾ ആലപിച്ചു. വർത്തമാനകാല സംഭവങ്ങ​ളെ കോർത്തിണക്കി സഫീർ കുണ്ടറയുടെ ഏകാംഗപ്രകടനവും അരങ്ങേറി.സാജിദ്​ ആറാട്ടുപുഴ, മാലിക്​ മഖ്​ബൂൽ എന്നിവർ സമാജത്തിന്റെ തുടർ പ്രവർത്തനങ്ങളെക്കുറിച്ച്​ വിശദീകരിച്ചു. ബിനു കുഞ്ഞ്​ സ്വാഗതവും ഷനീബ്​ അബൂബക്കർ നന്ദിയും പറഞ്ഞു. ഡോ. സിന്ധു ബിനു അവതാരകയായിരുന്നു.