ഖത്തർ ആർട്ട് ഫെസ്​റ്റിവലിൽ സൗദിയെ പ്രതിനിധീകരിച്ച് മലയാളി ചിത്രകാരി ഷാബിജ

ദമ്മാം: 73 രാജ്യങ്ങളിൽനിന്നെത്തിയ 360ഓളം അതിപ്രശസ്ത ചിത്രകാരർ അണിനിരന്ന ഖത്തർ അന്താരാഷ്​ട്ര ആർട്ട് ഫെസ്​റ്റിവലിൽ സൗദി അറേബ്യയെ പ്രതിനിധികരിച്ച് മലയാളിയായ ഷാബിജയും. അതിമനോഹര ചിത്രരചനയിലുടെ ലോക വേദികളി​ൽ ശ്രദ്ധിക്കപ്പെട്ട ഷാബിജ രണ്ടാം തവണയാണ് ഖിയാഫിൽ എത്തുന്നത്. നാലു ചിത്രങ്ങളാണ്​ ഖിയാഫിൽ പ്രദർശിപ്പിച്ചത്.

കോഴിക്കോട് വെള്ളിമാടുകുന്ന് സ്വദേശിനിയായ ഷാബിജ ഗൾഫിൽ എത്തിയതിന് ശേഷമാണ് ചിത്രകലയിൽ മുന്നേറ്റം നടത്തുന്നത്​. പ്രവാസത്തി​െൻറ ഏകാന്തതയും വിരസതയും ചിത്രകാരിയെ തൊട്ടുണർത്തുകയായിരുന്നു. തനിക്ക് ചുറ്റുമുള്ള കാഴ്ചകളെ ഷാബിജ കാൻവാസിലാക്കി. കഴിഞ്ഞ വർഷമാണ് ഷാബിജ ആദ്യമായി ഖത്തർ ആർട്ട് ഫെസ്​റ്റിവലിൽ എത്തുന്നത്. അന്നത്തെ ചിത്രങ്ങൾ ശ്രദ്ധിക്കപ്പെട്ടതോടെയാണ് ഇത്തവണയും ക്ഷണമെത്തിയത്​.

ഇത്തവണ പ്രദർശിപ്പിച്ച പെയിൻറിങ്ങുകളിലൊന്ന്​​ ഷാബിജയുടെ ഒരു അമൂർത്ത രചനയായിരുന്നു. ‘ഏകാന്തതയുടെ നിറരേഖകള്‍’ എന്നായിരുന്നു അതി​െൻറ പേര്​. പ്രകൃതിയും മനുഷ്യവുമായുള്ള ആന്തരിക ബന്ധത്തെ പ്രതിനിധീകരിക്കുന്നതായിരുന്നു എണ്ണച്ചായാ ചിത്രം. നീലയുടെ സുതാര്യതയും വെളുപ്പി​െൻറ ശാന്തതയും പരസ്​പരം ലയം കൊണ്ട കവിതയായി കാഴ്​ചക്കാരുടെ ഉള്ളിലേക്ക്​ പടരാൻ തക്ക സംവേദന ക്ഷമതയുണ്ട്​ ആ പെയിൻറിങ്ങിന്​. രണ്ടാമത്തേത്​ ഒരു പ്രാപ്പിടിയിൻ പക്ഷിയുടെ കണ്ണുകളായിരുന്നു.

‘ഐസ് ഓഫ് ഹൊറൈസൺ’ എന്ന പേരുള്ള പെയിൻറിങ്​ പ്രതീക്ഷകളുടെ ചക്രവാളങ്ങളിലേക്കുള്ള ഉറ്റുനോട്ടമാണ്​. ജീവിതത്തി​െൻറ സമ്മിശ്രഭാവങ്ങൾക്കിടയിലുടെ പ്രതീക്ഷകളുടെ തുരുത്തുകൾ തേടി പറന്ന് പോകുന്ന പ്രാപ്പിടിയൻ പക്ഷിയുടെ ഇഛാശക്തി പ്രതിബന്ധങ്ങളെ മറിടക്കാനുള്ള മനുഷ്യ​ന്​ പ്രചോദനമാവുകയാണ്. നിറഞ്ഞു കത്തുന്ന വിളക്കിലെ പ്രകാശം സ്വപ്നങ്ങളെ നിറം ചാർത്തുമ്പോൾ അതിന് ഷാബിജ നൽകിയത് ‘ഗ്ലോറി’ എന്ന പേരായിരുന്നു. നാലാമത്തേത്​ ‘ഏകാന്ത യാത്രികൻ’ എന്ന പെയിൻറിങ്ങാണ്​. ഈ നാല്​ പെയിൻറിങ്ങൂം ഷാബിജയുടെ കലാത്മക ദര്‍ശനത്തിന്‍റെ സമഗ്രത വ്യക്തമാക്കുന്നവ എന്ന നിലയിൽ ഏറെ ശ്രദ്ധിക്കപ്പെട്ടു.

ദമ്മാമിലെ ഐ.എസ്​.ജി സ്കൂളിൽ ഐ.ടി അധ്യാപികയാണ്​ ഷാബിജ. ഭർത്താവ് ബിസിനസുകാരനായ അബ്​ദുറഹീം. അമൽ, അധുൻ, അഹീൽ, അഷ്​വ എന്നിവർ മക്കളാണ്. ഖത്തർ ആർട്ട് ഫെസ്​റ്റിവലിൽനിന്ന് ലഭിച്ച ക്ഷണമനുസരിച്ച് അമേരിക്കയിൽ ചിത്ര പ്രദർശനം നടത്താനുള്ള ഒരുക്കത്തിലാണ് ഷാബിജ. കവി കൂടിയായ ഷാബിജ എല്ലാ വർഷവും ഷാർജ അന്താരാഷ്​ട്ര പുസ്തകോത്സവത്തിൽ പ്രസിദ്ധീകരിക്കുന്ന ‘ബുക്കിഷി’ലും കവിതകൾ എഴുതാറുണ്ട്.