സാമൂഹികമായി വേദനിപ്പിക്കുന്ന പലതും എഴുതേണ്ടി വരുന്നു -കവി അൻവർ അലി

ദമ്മാം: ഭാഷാവാദിയെന്ന നിലയിൽ സാമൂഹിക പ്രതികരണ കലയായി​ കവിതയെ ഉപയോഗിക്കേണ്ട നിലയിലേക്ക്​ വർത്തമാന സാമൂഹികാവസ്ഥ തന്നെ വലിച്ചിഴക്കുകയാണെന്ന്​ പ്രമുഖ കവിയും ഗാനരചയിതാവുമായ അൻവർ അലി. നവോദയ സാംസ്​കാരിക വേദിയുടെ ‘ലിറ്റ്​ ഫെസ്​റ്റി’ൽ പ​ങ്കെടുക്കാനെത്തിയ അദ്ദേഹം ‘ഗൾഫ്​ മാധ്യമ’വുമായി സംസാരിക്കുകയായിരുന്നു.

കവിതകൾ പബ്ലിക്​ ആർട്ടായി പ്രവർത്തിക്കണം എന്ന ശക്തമായ അഭിപ്രായത്തിലേക്ക്​ ഈ അവസ്ഥകൾ എന്നെ കൊണ്ടെത്തിച്ചിട്ടുണ്ട്​. അതുകൊണ്ടാണ്​ ‘സൊറാബ്​ദ്ദീൻ കൊലമാല’യും ‘മെഹ്​ബൂബ്​ എക്​സ്​പ്രസും’ പോലുള്ള കവിതകൾ ഞാൻ എഴുതുന്നത്​. ആ കവിതകൾ ഞാനെഴുതിയതല്ല, മറിച്ച്​ പുതിയ കാലത്തെ അധികാരകേന്ദ്രങ്ങൾ എന്നെകൊണ്ട്​ എഴുതിപ്പിക്കുകയായിരുന്നു.

മതം അനുഷ്​ടിച്ചാലും ഇല്ലെങ്കിലും മുസ്​ലിം സത്വബോധം പേറുന്ന ഓരോരുത്തരും ഈ പ്രശ്​നം നേരിടുന്നുണ്ട്​. എന്നാൽ നിഷ്​പക്ഷമതികൾ പോലും ഇത്​ ആഴത്തിൽ മനസ്സിലാക്കാത്തത്​ സങ്കടകരമാണെന്നും ഒരു ചോദ്യത്തിനുത്തരമായി അദ്ദേഹം പറഞ്ഞു. എന്നാൽ ഈ അവസ്ഥകൾ സാഹിത്യത്തെ പിന്നോട്ട്​ വലിക്കുകയല്ല മറിച്ച്​ മുന്നോട്ട്​ കുതിക്കാൻ പ്രേരിപ്പിക്കുകയാണ്​ ചെയ്യുന്നതെന്നും അദ്ദേഹം പറഞ്ഞു. പക്ഷെ ഇതുമായി മുന്നേറുന്ന മനുഷ്യർ കുഴപ്പത്തിലായേക്കാം.

അതേസമയം സാഹിത്യം ഏറ്റവും ശക്തമായ പ്രതികരണ ഉപാധിയായി മാറും. നാസിസത്തിലും ഫാഷിസത്തിലും എന്തിന്​ ഇന്ത്യയിലെ അടിയന്തരാവസ്ഥകാലത്തും നമുക്കത്​ ബോധ്യപ്പെട്ടതാണ്​. എന്നാൽ നാസിസകാലത്ത്​ ചില മുതിർന്ന എഴുത്തുകാരും പ്രതികരണ വാദികളുമൊക്കെ പരോക്ഷമായി അതിനെ പിന്തുണച്ച അവസ്ഥയുണ്ടായിട്ടുണ്ട്​.

എന്നാൽ ലോകം ഒരുപാട്​ തുറന്ന ഈ കാലത്ത്​ ഇത്തരത്തിൽ ഒളിച്ചുള്ള പിന്തുണകൾ സാധ്യമല്ല. അതേസമയം കലാകാരന്മാർ ചില മാനസിക അസുഖങ്ങളുടെ ഭാഗമായി ചില പ്രലോഭനങ്ങളിൽ പെട്ടുപോകാറുണ്ട്​. പക്ഷെ യഥാർഥത്തിലുള്ള എഴുത്ത്​ എപ്പോഴും ഇതിനെ എതിർത്തുകൊണ്ടിരിക്കും എന്നതാണ്​ ത​െൻറ എക്കാലത്തേയും പ്രതീക്ഷയെന്നും അദ്ദേഹം പറഞ്ഞു. പണിയെടുത്തത്​ മുഴുവനും കവിതയിലാണെങ്കിലും എല്ലാ സ​ങ്കേതങ്ങളും ഉപയോഗിച്ച്​ ശീലിച്ചതിനാൽ പാ​ട്ടെഴുത്തി​െൻറ രൂപപരമായ ഘടന സ്വായത്തമാക്കാൻ അതെന്നെ സഹായിച്ചിട്ടുണ്ട്​.

ത​െൻറ സ്വത്വം രൂപപ്പെട്ട ഗ്രാമജീവിതത്തി​െൻറ താളങ്ങൾ പാട്ടി​െൻറ താളങ്ങളായി മാറിയിട്ടുണ്ട്​. അതിനേക്കാളുപരി ചെറുപ്പക്കാരുമായി ചെലവഴിക്കാനുള്ള ത​െൻറ ആഹ്ലാദം കൂടിയാണ്​ തന്നെ പാ​ട്ടെഴുത്തുകാരനാക്കി മാറ്റിയത്​. കെട്ടകാലത്ത്​ അധികം മാനസിക സമ്മർദമില്ലാതെ മക്കളുടെ പ്രായത്തിലുള്ളവരുമായി സാഹിത്യം പങ്കിടുന്നത്​ വലിയ ആഹ്ലാദമാണ്​. വലിയ പാ​ട്ടെഴുത്തുകാരനായി മാറണമെന്ന്​ ഒരിക്കലും ആഗ്രഹിക്കാത്ത ഒരാളായിരുന്നു ഞാൻ. കോടമ്പാക്കാത്തെ മാർവാടികൾക്ക്​ സ്വന്തം പ്രതിഭ വിറ്റയാളാണെന്ന്​ ഒ.എൻ.വിയെ വിമർശിച്ച തനിക്ക്​ അദ്ദേഹം പാ​ട്ടെഴുതിയ അതേ ഹോട്ടലിൽ ഇരുന്ന്​ പാ​ട്ടെഴുതേണ്ടി വന്നിട്ടുണ്ട്​.

ത​െൻറ ചെറുപ്പത്തിലേയുള്ള വാശി തെറ്റായിരുന്നുവെന്നും അത്​ ആശയപരമായ മുൻവിധിയായിരുന്നുവെന്നുമുള്ള തിരിച്ചറിവ്​ കൂടിയാണ്​ പാ​ട്ടെഴുത്തുകാരനാക്കിയതെന്നും അദ്ദേഹം പറഞ്ഞു. കവിതക്ക്​ ആത്​മനിഷ്​ഠത കൂടുതലാണ്​. കവിയെന്നുള്ള ഒരാളുടെ ജീവിതം തുടങ്ങുന്നത്​ അയാളുടെ മരണശേഷമാണ്​. പലപ്പോഴും ചില ആശയങ്ങളുടെ ഉള്ളിൽ കയറിയാൽ അത്​ നമ്മളെ മുന്നോട്ട്​ കൊണ്ടുപോകും.

ചിലപ്പോൾ അത്ഭുതകരമായി ഭാഷ കൃത്യമായ ചില വാക്കുകൾ കൊണ്ടു​വന്ന്​ ഇട്ടുതരും. എഴുതിക്കഴിഞ്ഞാൽ നിങ്ങൾ നിശിതമായ വായനക്കാരനായി മാറണം. അങ്ങനെയാണ്​ ചില കവിതകളിലെ അത്ഭുതങ്ങൾ ഉണ്ടാകുന്നതെന്നും അദ്ദേഹം സൂചിപ്പിച്ചു. സമൂഹത്തിൽ നടക്കുന്ന​തിനെക്കുറിച്ചെല്ലാം പ്രതികരിക്കേണ്ടവരല്ല എഴുത്തുകാർ. മനുഷ്യരുടെ എല്ലാ വികാരങ്ങളും പേറുന്നവരാണ്​ അവരും.

അതേസമയം അവസാനത്തെ ദിവസം നെഞ്ചിൽ ​കൈവെച്ച്​ ചോദിക്കുന്ന ചോദ്യങ്ങൾക്ക്​ ഉത്തരമുണ്ടാകണം എന്നതാണ്​ പ്രധാനം.സൗദിയിൽ ആദ്യമായാണ്​ എത്തുന്നതെന്നും രാജ്യത്തെ പുതിയ മാറ്റങ്ങൾ തന്നെ ആഹ്ലാദിപ്പിക്കുന്നുവെന്നും ഇവിടുത്തെ ചിരിത്രവഴികളിലുടെ സഞ്ചരിക്കാൻ താൻ ഇനിയുമെത്തുമെന്നും അൻവർ അലി പറഞ്ഞുനിർത്തി.