മുഴുവൻ തീർഥാടകരും മിനയോട്​ വിടപറഞ്ഞു

മക്ക: ഹജ്ജ്​ കർമങ്ങൾ പൂർത്തിയാക്കി മുഴുവൻ തീർഥാടകരും മിന താഴ്​വരയോട്​ വിടപറഞ്ഞു. വ്യാഴാഴ്​ച വൈകുന്നേരം തുടങ്ങിയ തിരികെയാത്ര വെള്ളിയാഴ്​ച രാത്രിയോടെ പൂർത്തിയായി. ആറ്​ ദിവസമായി  ജനസാഗരമായിരുന്ന കൂടാര നഗരം ഇതോടെ  വിജനതക്ക്​ വഴിമാറി. അതേ സമയം അവസാന ദിവസം മിനയിൽ നിന്ന്​ പുറപ്പെട്ട ഹാജിമാർ താമസകേന്ദ്രത്തിലെത്താൻ വൈകി.

ഗതാഗതത്തിരക്കും ചില ബസ്​ ഡ്രൈവർമാർക്ക്​ വഴിയറിയാത്ത പ്രശ്​നവും ലക്ഷ്യത്തിലെത്തുന്നതിന്​ തടസ്സമായതായി തീർഥാടകർ പറഞ്ഞു. ഇന്ത്യയിൽ നിന്ന്​ ഹജ്ജ്​ കമ്മിറ്റി മ​ുഖേന എത്തിയ മുഴുവൻ പേരും മക്ക അസീസിയയിലെയും ഹറം പരിസരത്തെയും  താമസകേന്ദ്രങ്ങളിലെത്തി​. വ്യാഴാഴ്​ച കർമങ്ങൾ പൂർത്തിയാക്കി മടങ്ങിയവർക്ക്​ ഇന്നലെ ഹറമിലെ ജുമുഅയിൽ പ​​െങ്കടുക്കാനായി. സംസ്​ഥാന ഹജ്ജ്​ കമ്മിറ്റി മഖേന എത്തിയ മലയാളി ഹാജിമാർ വെള്ളിയാഴ്​ചയാണ്​ മിനയിൽ നിന്ന്​ മടങ്ങിയത്​. അവർ ആറ്​ ദിവസത്തെ മിനാവാസം കഴിഞ്ഞാണ്​ മടങ്ങിയത്​. അവസാന ദിവസവും കടുത്ത ചൂടുണ്ടായിരുന്നു മിനയിൽ. അതേ സമയം സൂര്യാസ്​തമയത്തോടെ പല ദിവസങ്ങളിലും തണുത്ത കാറ്റ്​ വീശി. അറഫ ദിനത്തിന്​ തലേന്ന്​  നേരിയ മഴ ലഭിച്ചിരുന്നു. പകുതിയോളം ഹാജിമാർ നേരത്തെ മടങ്ങിയതിനാൽ വെള്ളിയാഴ്​ച മിനയിലെ തിരക്കിന്​ ശമനമുണ്ടായി. 

ആഗസ്​റ്റ്​ 27 മുതലാണ്​ ഇന്ത്യൻ ഹാജിമാരുടെ തിരിച്ചുപോക്ക്​ തുടങ്ങുക. കേരളത്തിൽ നിന്ന്​ ഹജ്ജ്​ കമ്മിറ്റി വഴി എത്തിയ ആദ്യ സംഘം സെപ്​റ്റംബർ 12^ന്​ നാട്ടിലെത്തും. അതേ സമയം സ്വകാര്യ ഗ്രുപ്​ വഴി എത്തിയവർ ഇതിനകം നാട്ടിൽ എത്തിത്തുടങ്ങി. വിദേശ രാജ്യങ്ങളിലേക്കുള്ള ഹാജിമാരുടെ മടക്കം വെള്ളിയാഴ്​ച ജിദ്ദ വിമാനത്താവളത്തിൽ തുടങ്ങി.