പുതിയ പാക്കേജുകൾ പ്രഖ്യാപിച്ച്​ ഹജ്ജ്​ മന്ത്രാലയം

ജിദ്ദ: ഇൗ വർഷത്തെ ഹജ്ജിന്​ ഹജ്ജ്, ഉംറ മന്ത്രാലയം പുതിയ പാക്കേജുകൾ പ്രഖ്യാപിച്ചു. ഹജ്ജ് ചെയ്യാൻ ആഗ്രഹിക്കുന്ന പൗരന്മാർക്കും താമസക്കാർക്കും എളുപ്പമുള്ള യാത്രയും സമ്പന്നമായ അനുഭവവും ആനുകൂല്യങ്ങളും സേവനങ്ങളും നൽകുന്നതാണ്​ പുതിയ പാക്കേജുകൾ. ഒന്ന്​ ‘അബ്​റാജ്​ കിദാന അൽവാദി’ പാക്കേജ് ആണ്​. യാത്രയിലുടനീളം സുഖപ്രദമായ എയർകണ്ടീഷൻ ചെയ്ത ബസുകളിലെ ഗതാഗതം, പുതിയ ടവറുകളായ മിനയിലെ‘അബ്​റാജ്​ കിദാന വാദി’യിൽ താമസം, യാത്രയിലുടനീളം നൽകുന്ന വൈവിധ്യമാർന്ന മെനു, ശീതളപാനീയങ്ങൾ, അറഫയിൽ സജ്ജീകരിച്ച തമ്പുകൾ, മുസ്​ദലിഫയിലെ താമസ സേവനങ്ങൾ ഇതിലുൾപ്പെടുന്നു. 13,000 റിയാൽ മുതലാണ് ഇതി​െൻറ ചാർജ്ആരംഭിക്കുന്നത്​. മറ്റൊന്ന്​ നാലായിരം റിയാൽ മുതൽ ആരംഭിക്കുന്ന സാമ്പത്തിക (ഇഖ്​തിസാദിയ) പാക്കേജാണ്​. ഇത്​ തെരഞ്ഞെടുക്കുന്നവർക്ക്​‘തർവിയ, നഹ്ർ, തശ്‌രീഖ്’ദിവസങ്ങളിൽ അടിസ്ഥാന സേവനങ്ങൾ സജ്ജീകരിച്ച റസിഡൻഷ്യൽ കെട്ടിടങ്ങളിൽ മക്കയിലായിരിക്കും താമസമെന്നതാണ്​ ഇതി​െൻറ സവിശേഷത. മിനയിൽ താമസസൗകര്യം നൽകുന്നത് ഇതിലുൾപ്പെടുന്നില്ല. യാത്രാ ചാർജ്​ ലക്ഷ്യസ്ഥാനത്തെ ആശ്രയിച്ചിരിക്കും. ആഭ്യന്തര തീർഥാടകർക്ക് ഇലക്ട്രോണിക് പാതയിൽ പ്രവേശിച്ച്​ പുതിയ പാക്കേജുകൾക്കായി അപേക്ഷിക്കാവുന്നതാണെന്ന്​ ഹജ്ജ്​ ഉംറ മന്ത്രാലയം പറഞ്ഞു.