സി.ബി.എസ്​.ഇ ക്ലസ്​റ്റർ മീറ്റിൽ ഇരട്ട സ്വർണ നേട്ടവുമായി മുഹമ്മദ് അമാൻ

റിയാദ്: സൗദി അറേബ്യയിലെ സി.ബി.എസ്​.ഇ സ്കൂളുകൾ നടത്തിയ ക്ലസ്​റ്റർ മീറ്റിൽ വ്യക്തിഗതയിനങ്ങളിൽ ഇരട്ട സ്വർണം ​നേടി മലയാളി വിദ്യാർഥി മുഹമ്മദ്​ അമാൻ. 17 വയസിന് താഴെയുള്ളവരുടെ വിഭാഗത്തിൽ ഡിസ്കസ് ത്രോയിലും ഹൈജമ്പിലും ഇരട്ട സ്വർണവും വ്യക്തിഗത ചാമ്പ്യൻഷിപ്പുമാണ്​ കൊല്ലം വടക്കുംതല സ്വദേശിയായ മുഹമ്മദ് അമാൻ സ്വന്തമാക്കിയത്​.

ഒക്ടോബർ ആദ്യ വാരം ഇന്ത്യയിൽ നടക്കുന്ന നാഷനൽ മീറ്റിലേക്ക് യോഗ്യത നേടിയ മുഹമ്മദ് അമാൻ ചെറുപ്പം മുതൽ പല കായിക മത്സരങ്ങളിലും വിജയിച്ചിട്ടുണ്ട്. റിയാദിൽ നടന്ന ക്ലാസ്​റ്റർ മീറ്റ്​ സമാപന ചടങ്ങിൽ റിയാദ്​ ഇൻറർനാഷനൽ ഇന്ത്യൻ സ്​കൂൾ പ്രിൻസിപ്പൽ മീര റഹ്​മാൻ ട്രോഫി മുഹമ്മദ്​ അമാന്​ സമ്മാനിച്ചു.

റിയാദ് മോഡേൺ ഇൻറർനാഷനൽ സ്കൂളിലെ 10-ാം ക്ലാസ്​ വിദ്യാർഥിയാണ്. റിയാദ് ന്യൂ ക്രസൻറ് ഇൻറർനാഷനൽ സ്കൂൾ മനേജിങ് ഡയറക്ടർ അൻസാരിയുടെയും നസീമ അൻസാരിയുടെയും മകനാണ്. മോഡേൺ സ്‌കൂളിലെ മുഴവൻ അധ്യാപകരുടെയും അകമഴിഞ്ഞ പ്രോത്സാഹനവും കഠിനാധ്വാനവുമാണ് ത​െൻറ നേട്ടത്തിന് കാരണമെന്ന് അമാൻ പറഞ്ഞു. നാഷനൽ മീറ്റിൽ പങ്കെടുത്ത് വിജയം ആവർത്തിക്കുമെന്നുള്ള ശുഭപ്രതീക്ഷയിലാണ്​ മുഹമ്മദ്​ അമാൻ.