സൗദിയിൽ ഗാർഹിക തൊഴിലാളികളുടെ സ്​പോൺസർഷിപ്പ്​​ മാറ്റത്തിന്​​​ ‘മുസാനിദ്​’

ജിദ്ദ: ഗാർഹിക തൊഴിലാളികളുടെ സ്​പോൺസർഷിപ്പ് ‘മുസാനിദ്​’ എന്ന ഓൺലൈൻ പോർട്ടൽ വഴി മാറ്റാനാകുമെന്ന്​ സൗദി മാനവ വിഭവശേഷി-സാമൂഹിക വികസന മന്ത്രാലയം അറിയിച്ചു. ഇന്ന് മുതൽ ഈ സേവനം ലഭ്യമായി തുടങ്ങി. സ്​പോൺസർമാർക്കിടയിലാണ്​ തങ്ങളുടെ വീട്ടുജോലിക്കാരെ ഓൺലൈൻ നടപടിക്രമങ്ങളിലൂടെ മാറ്റാൻ കഴിയുന്നത്​. മന്ത്രാലയത്തെ ഉദ്ധരിച്ച്​ ഉക്കാദ്​ പത്രമാണ്​ ഇക്കാര്യം​ റിപ്പോർട്ട്​ ചെയ്​തത്​​.

രാജ്യത്തെ ഗാർഹിക തൊഴിൽ മേഖലയുടെ വികസനം, റിക്രൂട്ട്‌മെന്റിന്റെ ഗുണനിലവാരം വർധിപ്പിക്കൽ, അവകാശ സംരക്ഷണം, തൊഴിലുടമയും തൊഴിലാളിയും തമ്മിലുള്ള കരാർ ബന്ധം വ്യവസ്ഥാപിതമാക്കൽ എന്നീ ഉദ്ദേശ്യങ്ങളോടെ​ മന്ത്രാലയം നടപ്പാക്കുന്ന പദ്ധതികളുടെ ഭാഗമാണിത്​.

റിക്രൂട്ട്‌മെന്റ് നിയന്ത്രണങ്ങൾ, നിയമങ്ങൾ, വ്യവസ്ഥകൾ എന്നിവക്ക് അനുസൃതമായി ഓൺലൈനായി ലളിതമായ നടപടിക്രമങ്ങളിലൂടെ മുസാനിദ്​ പോർട്ടൽ വഴി ഗാർഹിക തൊഴിലാളിയെ നിലവിലെ തൊഴിലുടമയിൽനിന്ന് പുതിയ തൊഴിലുടമയിലേക്ക് മാറ്റാൻ കഴിയും. നിലവിലെ തൊഴിലുടമയും ഗാർഹിക തൊഴിലാളിയും പുതിയ തൊഴിലുടമയും കൈമാറ്റ പ്രക്രിയക്ക് സമ്മതിച്ച​ ശേഷമാണ് സ്​പോൺസർഷിപ്പ്​ മാറ്റം പൂർത്തിയാക്കാനാവുക. അംഗീകൃത ഓൺലൈൻ പേയ്‌മെൻറ്​ ചാനലുകളിലൂടെ നിശ്ചിത ഫീസ്​ അടക്കണം. സ്​പോൺസർഷിപ്പ്​ മാറുന്ന സമയത്ത്​ ഉടമയുടെയും വീട്ടുജോലിക്കാരുടെയും അവകാശങ്ങൾ സംരക്ഷിക്കുന്നതിന് ഈ നടപടിക്രമം സഹായിക്കുമെന്ന് മന്ത്രാലയം സൂചിപ്പിച്ചു.

രാജ്യത്തെ റിക്രൂട്ട്‌മെന്റ് മേഖല വികസിപ്പിക്കുന്നതിനുള്ള സംരംഭങ്ങളിലൊന്നായാണ്​ ‘മുസാനിദ്​’ പ്ലാറ്റ്​ഫോം മന്ത്രാലയം ആരംഭിച്ചത്​. റിക്രൂട്ട്‌മെന്റ് നടപടികൾ മെച്ചപ്പെടുത്തുന്നതിനും സുഗമമാക്കുന്നതിനും തൊഴിൽ കരാർ സംബന്ധിച്ചുള്ള പരാതികളും തർക്കങ്ങളും പരിഹരിക്കുന്നതിനും ഇരു കൂട്ടരുടെയും അവകാശങ്ങൾ സംരക്ഷിക്കുന്നതിനും ഈ പോർട്ടലിൽ സേവനങ്ങൾ ലഭ്യമാണ്​.