രാജ്യം ആഘോഷ നിറവിൽ

ജിദ്ദ: സൗദി അറേബ്യയുടെ 87ാം ദേശീയദിനം ഇന്ന്​. രാജ്യം മുഴക്കെ ആഘോഷനിറവിലാണ്​. ഞായറാഴ്​ചയും സർക്കാർ അവധി പ്രഖ്യാപിച്ചിട്ടുണ്ട്​.  1932^ൽ  രൂപീകൃതമായ കിങ്​ഡം ഒാഫ്​ സൗദി അറേബ്യയുടെ ഇത്തവണത്തെ ദേശീയ ദിനം പരമ്പരാഗത രീതിയിൽ നിന്ന്​ നിരവധി മാറ്റങ്ങ​ളോടെയാണ്​. വ്യാഴാഴ്​​ച വരെ നീളുന്ന  പരിപാടികളാണ്​ രാജ്യത്തി​​െൻറ വിവിധ ഭാഗങ്ങളിൽ നടക്കുന്നത്​. സൗദി അറേബ്യയോട്​ ​െഎക്യദാർഢ്യം പ്രകടിപ്പിച്ച്​  യു.എ.ഇ, കുവൈത്ത്​, ബഹ്​റൈൻ തുടങ്ങിയ രാജ്യങ്ങളിലും വിവിധ പരിപാടികൾ നടക്കുന്നുണ്ട്​.

സൗദിയിലെ 17 നഗരങ്ങൾ കേന്ദ്രീകരിച്ചാണ്​ സർക്കാർ ആഘോഷപരിപാടികൾ. റിയാദ്​, ദറഇയ, ജിദ്ദ, ദമ്മാം, അൽഖോബാർ, ജുബൈൽ, ഹുഫൂഫ്​, ഹഫർ അൽബാതിൻ, ഹാഇൽ, തബൂക്ക്​, ഉനൈസ, യാമ്പു, മദീന, സകാക, അബഹ, നജ്​റാൻ, ജീസാൻ എന്നീ 17 നഗരങ്ങളിലാണ്​ ഒൗദ്യോഗിക ആഘോഷ പരിപാടികൾ. വിവിധ സർക്കാർ വകുപ്പുകൾ, ഷോപ്പിങ്​ മാളുകൾ, സ്‌കൂളുകൾ, യൂനിവേഴ്സിറ്റികൾ, സ്വകാര്യ കമ്പനികൾ, ഹോട്ടലുകൾ തുടങ്ങിയ സ്ഥാപനങ്ങളും ഉത്സവ പരിപാടികൾ സംഘടിപ്പിക്കുന്നുണ്ട്​.  വ്യോമാഭ്യാസ പ്രകടനങ്ങൾ, വെടിക്കെട്ടുകൾ, സംഗീത നിശകൾ, കുട്ടികളുടെ കലാവിരുന്ന്​  എന്നിവയാണ്​   പ്രധാന പരിപാടികൾ. പൊതു സ്​ഥലങ്ങളിൽ ഒരുക്കുന്ന പരിപാടികൾ  ആസ്വദിക്കാൻ സ്​ത്രീകൾക്കും സർക്കാർ സൗകര്യമൊരുക്കിയിട്ടുണ്ട്​.