ഹരിത കാന്തിയിൽ ദേശീയദിനാഘോഷത്തിനൊരുങ്ങി രാജ്യം

റിയാദ്: രാജ്യം സ്ഥാപിതമായതി​​െൻറ 87ാം വാർഷിക ദിനം ഹരിത കാന്തിയിൽ ആഘോഷിക്കാനൊരുങ്ങി സൗദി അറേബ്യ. ദേശീയ ദിനം ശനിയാഴ്​ചയാണെങ്കിലും ആഘോഷം വ്യാഴാഴ്​ച​ വൈകീ​േട്ടാടെ ആരംഭിച്ചു. ഞായറാഴ്​ച രാത്രി വരെ നീളും. ഇതാദ്യമായി ആഘോഷപരിപാടികളിൽ പ​െങ്കടുക്കാൻ സ്​ത്രീകളെയും ക്ഷണിച്ച്​ സാംസ്​കാരിക മന്ത്രാലയം പുതിയ ചരിത്രവും കുറിച്ചു. 

റിയാദ്​ ബഗ്ലഫിലെ കിങ്​ ഫഹദ്​ ഇൻറർനാഷനൽ ഫുട്​ബാൾ സ്​റ്റേഡിയത്തിലും കിങ്​ ഫഹദ്​ കൾച്ചറൽ സ​െൻററിലും ജിദ്ദ, ദമ്മാം നഗരങ്ങളിലടക്കം നടക്കുന്ന ഒദ്യോഗികാഘോഷ പരിപാടികളിലെല്ലാം പ​െങ്കടുക്കാനും സ്​ത്രീകളുൾപ്പെടെ കുടുംബങ്ങൾക്കും വിദേശികൾക്കും ബാച്ചിലേഴ്​സിനും ക്ഷണമുണ്ട്​. മുൻകാലങ്ങളിൽ ദേശീയദിനാഘോഷ പരിപാടികളിൽ സ്​ത്രീകളെ അനുവദിച്ചിരുന്നില്ല. എന്നാൽ ഇത്തവണ മുതൽ ഇൗ നയത്തിൽ മാറ്റം വരുത്തുകയാണ്​. സാംസ്​കാരിക മന്ത്രാലയം തുറന്ന ക്ഷണമാണ്​ രാജ്യത്തെ മുഴുവനാളുകൾക്കും നൽകിയിരിക്കുന്നത്​. 40,000 ആളുകളെ ഉൾക്കൊള്ളാൻ കഴിയുന്ന കിങ്​ ഫഹദ്​ സ്​റ്റേഡിയത്തിനുള്ളിൽ കുടുംബങ്ങൾക്കും ബാച്ചിലേഴ്​സിനും ഇരിപ്പിടങ്ങൾ വെവ്വേറെയായി തിരിക്കും. 

രാജ്യത്തി​​െൻറ സമഗ്ര സാമ്പത്തിക, സാമൂഹിക പരിഷ്​കരണ പദ്ധതിയായ ‘വിഷൻ 2030’​​െൻറ ഭാഗമായാണ്​ പൊതു ആഘോഷ പരിപാടികളിൽ സ്​ത്രീജനങ്ങൾക്കും പ​െങ്കടുക്കാൻ അനുമതി നൽകുന്ന ഇൗ നയംമാറ്റമെന്നും ഒൗദ്യോഗിക വൃത്തങ്ങൾ വ്യക്​തമാക്കുന്നു. ഇൗ വർഷം ജൂലൈയിൽ വിദ്യാഭ്യാസ മന്ത്രാലയം സ്​കൂൾ തലങ്ങളിലെ കായിക മത്സരങ്ങളിൽ പ​െങ്കടുക്കാൻ പെൺകുട്ടികൾക്ക്​ അനുമതി നൽകിയിരുന്നു. ജനറൽ ഇൗവൻറ്​ അതോറിറ്റിയുടെ നേതൃത്വത്തിൽ രാജ്യത്ത്​ 17 നഗരങ്ങളിലായി മൊത്തം 27 ആഘോഷ പരിപാടികളാണ്​ നടക്കുക. റിയാദ്​, ദറഇയ, ജിദ്ദ, ദമ്മാം, അൽഖോബാർ, ജുബൈൽ, ഹുഫൂഫ്​, ഹഫർ അൽബാതിൻ, ഹാഇൽ, തബൂക്ക്​, ഉനൈസ, യാമ്പു, മദീന, സകാക, അബഹ, നജ്​റാൻ, ജീസാൻ എന്നീ 17 നഗരങ്ങളിലാണ്​ ഒൗദ്യോഗിക ആഘോഷ പരിപാടികൾ. വിവിധ സർക്കാർ വകുപ്പുകൾ, ഷോപ്പിങ്​ മാളുകൾ, സ്‌കൂളുകൾ, യൂനിവേഴ്സിറ്റികൾ, സ്വകാര്യ കമ്പനികൾ, ഹോട്ടലുകൾ തുടങ്ങി വിവിധ സ്ഥാപനങ്ങളും ഉത്സവ പരിപാടികൾ സംഘടിപ്പിക്കുന്നുണ്ട്​.

റിയാദ്​ ഉൾപ്പെടെ രാജ്യത്തെ മുഴുവൻ നഗരങ്ങളും ചെറുപട്ടണങ്ങളും ദേശീയ പതാകയും തോരണങ്ങളും വൈദ്യുതി ദീപങ്ങളും കൊണ്ട്​ അലങ്കരിച്ച്​ ഹരിതാഭമായി കഴിഞ്ഞു. റിയാദിൽ വീടുകളിൽ പോലും അലങ്കാരങ്ങൾ നിറഞ്ഞുകഴിഞ്ഞു. ഗതാഗത മന്ത്രാലയം റോഡുകളും പാലങ്ങളും തുരങ്കളുടെ ഉൾഭാഗവുമെല്ലാം പച്ച ലൈറ്റുകൾ കൊണ്ടും ​പതാകയും തോരണങ്ങളും കൊണ്ട്​ ഹരിതകാന്തി വരുത്തിയിട്ടുണ്ട്​. 

ആകാശത്ത് നിറ വിസ്മയം തീര്‍ക്കുന്ന വ്യോമാഭ്യാസ പ്രകടനങ്ങൾ, വെടിക്കെട്ടുകൾ, സംഗീത നിശകൾ, കുട്ടികളുടെ കലാപരിപാടികൾ എന്നിവയാണ്​ ആ​േഘാഷങ്ങൾക്ക്​ പൊലിമയേറ്റുന്ന പ്രധാന പരിപാടികൾ. പൈതൃക നഗരമായ ദറഇയ്യയിൽ വ്യാഴാഴ്ച വൈകീട്ട് നാ​േലാടെയാണ്​ ആഘോഷപരിപാടികൾക്ക്​ തുടക്കം കുറിച്ചത്​. ഞായറാഴ്​ച വരെ എല്ലാ ദിവസവും വൈകീട്ട് 4.30 മുതൽ രാത്രി 11 വരെയാണ്​ പരിപാടികൾ. സൗദി അറേബ്യയുടെ ചരിത്രവും ശ്രദ്ധേയമായ നേട്ടങ്ങളും ഉയർത്തിക്കാണിക്കുന്ന ദൃശ്യാവിഷ്​കാര പരിപാടികളും നാടോടി നൃത്തമായ ‘അർദ’യും റിയാദിൽ മാത്രം എട്ടിലേറെ വേദികളിൽ അരങ്ങേറും. 
ദറഇയയിലെ വാദി ഹനീഫയിൽ വൈകീട്ട് 4.30 മുതൽ സൈക്കിൾ മാരത്തോൺ, വെള്ളി മുതൽ തിങ്കൾ വരെ കിങ്​ സഊദ് യൂനിവേഴ്സിറ്റി സ്​റ്റേഡിയത്തിൽ കുടുംബങ്ങൾക്കുവേണ്ടിയുള്ള വിനോദ പരിപാടികൾ, ഞായർ തിങ്കൾ ദിവസങ്ങളിൽ കിങ്​ ഫഹദ് അന്തരാഷ്​ട്ര സ്​റ്റേഡിയത്തിൽ രാത്രി ഒമ്പതിന്​ ആധുനിക സാങ്കേതിക വിദ്യയിൽ വിടരുന്ന അറേബ്യൻ ഉപദ്വീപി​​െൻറ ചരിത്രത്തെ കുറിച്ചുള്ള സംഗീത നൃത്താവിഷ്കാരം, ദറഇയയിൽ ഞായറാഴ്ച  രാത്രി 9.15 മുതൽ 9.45 വരെ വെടിക്കെട്ട്. ഞായറാഴ്ച രാത്രി എട്ട്​ മുതൽ 12 വരെ വിസ്​മയ സമ്മാന പരിപാടിയായ ‘സർപ്രൈസ് ബോക്സ്’. നൂറുകണക്കിന് വാണിജ്യ സ്ഥാപനങ്ങൾ പങ്കെടുക്കുന്ന ഈ പരിപാടിയിൽ ചെറുതും വലുതുമായി ഒട്ടനവധി സമ്മാനങ്ങൾ പൊതുജനങ്ങൾക്കായി ഒരുക്കിയിരിക്കുന്നു. റിയാദി​​െൻറ അടയാള ഗോപുരമായ കിങ്‌ഡം ടവർ ലേസർ ലൈറ്റിങ്​ സംവിധാനത്തിലൂടെ പച്ചയണിഞ്ഞ്​ തിളങ്ങും. 

രാജ്യത്തിന് വേണ്ടി ജീവൻ വെടിഞ്ഞ രക്തസാക്ഷികൾക്ക് ആദരവ്​ അർപ്പിച്ച്​ റിയാദ് ഇൻറർനാഷനൽ എക്​സിബിഷൻ സ​െൻററിൽ പ്രത്യേക പരിപാടി നടക്കും. രക്തസാക്ഷികളുടെ കുടുംബങ്ങൾ അതിഥികളാവും. റിയാദ്​ തഹ്‌ലിയ തെരുവിൽ 25,000 പേർക്ക്​ ഒരേ സമയം വീക്ഷിക്കാനാവുന്ന രീതിയിൽ പരേഡും ഫാഷൻ ഷോയും നടക്കും. പുറമെ നഗര സഭയുടെ കീഴിൽ പ്രധാന വേദികളിലെല്ലാം കവിയരങ്ങ്​, സംഗീത പരിപാടികൾ, പാരമ്പര്യ നൃത്തം, കുട്ടികൾക്കായി പ്രസംഗം, കവിത ചൊല്ലൽ, ചിത്ര രചന തുടങ്ങിയ പരിപാടികൾ എല്ലാം അരങ്ങേറും.